1 VAKORINZO 1
1
1Ninzi Paulu, walaangwa khuvirila khu lienya lia Nyasaye khuva murumwa wa Yesu Kristo, khali musuuvili washieru Sosizene.
2Khuhandichilanga munyi vamuli likanisa lia Nyasaye lili mu litaala lia Korinzo, khandi yavo voosi valaangwa khuva vatakatifu va Nyasaye, vali veve shichila vali mu Yesu Kristo, halala na vandu voosi vali shia havundu hosi vasaalanga khu Mwami weru Yesu Kristo, uli Mwami wavo khandi weru.
3Nyasaye, uli Tata nende Mwami weru Yesu Kristo vamulole tsimbavasi, khandi vamuhe milembe.
Tsikhaavi Tsinyolekhanga mu Kristo
4Shia khase khosi sanditsanga Nyasaye wanje shichila munyi, khurulana khu tsimbavasi tsia yamuha khuvirila mu Yesu Kristo. 5Khuvirila mu Yesu Kristo, muli vahinda mu shia shindu shiosi, khali mulilomoloma liosi khandi mu vucheli vwosi. 6Makhuva khulondokhana khu Kristo ka yiyumbakha vulahi vwene mu munyi; 7khali mwanyola tsikhaavi tsiosi tsinyolekhanga khurula khu Roho, lwa mulindililanga khulolekha khwa havulavu khu Mwami weru Yesu Kristo. 8Nyasaye alatsililila khumuha tsingulu tsiu khusinjila khutukha khulitukhu liukhumalilikha, khu muvuli khunyolekhana nu vutamanu vwosi Khulitukhu liu Mwami weru Yesu Kristo. 9Nyasaye neye musuuvilwa, lwa yamulaanga khuva mu vulala nu Mwana wewe Mwami weru Yesu Kristo.
Liavukhana mu Likanisa
10Vasuuvili vashianje, mureevanga numuyaanza khuvirila mu lira liu Mwami weru Yesu Kristo, muhulishitsane vene khuvene, khu liavukhana livuli khunyolekhana hakari henyu. Muhambane, khandi muve ninganakani indala nende lienya lilala. 11Vasuuvili vashianje, vandu valala khurula mu inzu ya Kiloe vambolele havulavu makhuva khulondokhana khuli mulembananga vene khuvene. 12Lekha mbole ndi: shia mulala khu munyi avoolanga, “Nondanga Paulu.” Wundi avoola, “Nondanga Apolo.” Wundi khandi avoola, “Nondanga Kefa.”#1:12 Nondanga Kefa: nakhwo khuvoola, Petro. Na wundi avoola “Nondanga Kristo.” 13Kristo anyala khuva wayikavulanyinyamu toto? Paulu anyala khuva neye wavambwa khu musalaba shichila munyi? Munyi munyala khuva mwabatiswa khuvirila mu lira lia Paulu toto?
14Sanditsanga Nyasaye, shichila mundu avulakhuho khu munyi wanabatisa. Navutswa nabatisa Krisipa nende Gayo vonyene. 15Khulwa yako, mundu avulakhuho unyala khuvoola mwabatiswa khuvirila mu lira lianje. ( 16Nabatisa khandi vandu vi inzu ya Sitefano. Navutswa khumeeta khu venavo, shinyala khumanya niiva nabatisakhu vandu vandi khuvira venavo tawe.) 17Kristo shiyanduma khubatisa vandu tawe. Navutswa yanduma khwilwatsa Ivanjeli; khandi khuchilwatsa vuchila khurumishila vutswa vusitsa vwa vandu vali navwo mulilomoloma, khu likhutsa lia Kristo khu musalaba livuli khukalukhanyinywa shivune shialio.
Kristo neye Vusitsa khandi Tsingulu tsia Nyasaye
18Likhuva khulondokhana khu likhutsa lia Kristo khu musalaba, lilolekhanga khuli nu vusilo khu yavo vativanga; navutswa khu lweru khutsi va khuhonyinywangwa, nalio tsingulu tsia Nyasaye.
19Mahandiko Matakatifu kavoolanga,
“Niitsa khwononyinya vusitsa vwa vasitsa
khandi vucheli vwa vacheli niitsa khutivitsa.”
20Khulwa yako, ni hena wa mundu wu vusitsa ali? Ni hena wa mwechitsi wa malako ali? Ni hena wa mundu wayaanza khuhangalitsana mulilomoloma mumatukhu kanu ali? Toto, Nyasaye shiyalomba vusitsa vwa vandu vu mu shivala shinu khukwa vusilo?
21Nyasaye yali nu vusitsa nalomba vandu vu mu shivala shinu khuvula khumumanya ndi ni Nyasaye khuvirila mu vusitsa vwavo vene. Navutswa yali nu vuyaanzi vu khuhonyinya yavo vali ni lisuuvila khuvirila mu likhuva liu vusilo lia khwilwatsanga. 22Vayahudi venyanga vakholelwi viloleshitsu vinyala khuvakhola vasuuvili; navutswa Vaguriki venyelitsanga vusitsa. 23Navutswa khu lweru khutsi khwilwatsanga Kristo wavambwa khu musalaba, likhuva liu khwisikaritsa Vayahudi, khandi liu vusilo khu vandu vi tsimbia tsindi. 24Navutswa yavo va Nyasaye yalaanga, vave Vayahudi inoho Vaguriki, likhuva lienelo nalio Kristo, nali tsingulu tsia Nyasaye, khandi vusitsa vwa Nyasaye. 25Shindu shialolekhanga khuli nu vusilo vwa Nyasaye, shiali nu vusitsa vunyishi khuvira vusitsa vu mundu; khandi shindu shialolekhanga khuli nu vuteteshele vwa Nyasaye, shiali ni tsingulu tsinyishi khuvira tsingulu tsiu mundu.
26Munyi vasuuvili vashianje, yitsushitsikhu khuli mwavetsanga, Nyasaye nashili khumulaanga. Vanyishi khu munyi shiumwali nu vusitsa khulondokhana khuli vandu vu mu shivala vamulolanga tawe; vanyishi khu munyi shimwali ni tsingulu; khandi vanyishi, shivali vayivulwa mu tsingo tsiu vwimilili tawe. 27Navutswa Nyasaye yarovola kalalani shindu shia vandu vu mu shivala valolanga nashio shiu vusilo, khuha yeshio shili nu vusitsa tsisoni. Nyasaye yarovola khandi shindu shia vandu vu mu shivala valolanga ni shiteteshele, khuha shili ni tsingulu tsisoni. 28Nyasaye yarovola shindu shia vandu vu mu shivala vihonelanga nivalechelitsa, khandi valola shivula vukhonyi vwosi, khutivitsa shindu shia vandu vu mu shivala valolanga shili nu vukhonyi vunyishi muno. 29Nakhwo khuvoola mundu avulakhuho unyala khwichinjilila imbeli wa Nyasaye. 30Nyasaye neye shirula shiu vulamu vwenyu mu Yesu Kristo, wa mwene yalomba khuva vusitsa vweru. Khukholwangwa khuvirila muye khuva valunji imbeli wa Nyasaye, khuva vatakatifu khandi vavoholole. 31Khulwa yako, khuli Mahandiko Matakatifu kavoolanga,
“Leshi mundu wichinjililanga,
khwichinjilila shichila muhinzilu ku Mwami yakhola.”
Currently Selected:
1 VAKORINZO 1: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
