Mariko 7

Yeso okoiraneria abwo baare koengereria ekiagera aborokigwa baye tibabwateti chingencho chi’abagaaka

(Mat 15:1-20)

1Erio Abafarisai na abande ase aborokia b’amariiko barwete Yerusalemu, bagasangererekana asare. 2Bakarora abande baborokigwa baye bakoragera namaboko are neriko, engencho yaye ataisabiri. 3(Inaki Abafarisai na Abayahudi bonsi tibakoragera ritang’ani bataraisaba amaboko. Igo babwatetie engencho y’abagaaka babo. 4Naende kobakorwa echiiro, tibakoria batesibetie. Naende nchire chingencho chinde babwate buna ogosibia ebikombe ne chinyongo, na ebinto bie chitaai.) 5Bono Abafarisai baria na aborokia b’amariiko bakabooria Yeso, “Nase ki aborokigwa bao batari kobwata chingencho chi’abagaaka, korende bakoragera namaboko are neriko?” 6#Isaya 29:13Yeso akabateebia Isaya nigo abaanete buya igoro yaino, inwe abang’ainereria, buna eriikire;

Abanto aba nigo bansigete ase ebikoba biabo igoro,

korende chinkoro chiabo nigo chire aare korwa ase ’nde.

7Abwo nigo bagonsasiima ogosasiima kwa bosa,

bakworokereria amorokererio ayare amachiiko a Mwanyabaanto oka.

8Igo mogotiga richiiko ria Nyasae, mwabwata chingencho chia Mwanyabaanto.

9Yeso akagenderera kobateebia, “Mwangire richiiko ria Nyasae ng’a monyare kobwata chingencho chiaino. 10#Okong’ 20:12; Okoir 5:16; Okong’ 21:17; Abal 20:9Inaki Musa nigo ateebete: Sika iso na nyoko, na: Oyorakwane bobe ase ise, gose ase ng’ina, ogokwa nakwe. 11Korende inwe moteeba: Omonto karateebie ise gose ng’ina: Bionsi ebi anga kwanyora korwa ase ’nde nakio Korbani (engencho yaye: Ebiarurwe ase Nyasae) — 12timori komotiga naende amokorere ise gose ng’ina ring’ana rinde. 13Igo mogosaria ring’ana ria Nyasae ase chingencho chiaino chia kare. Naende amange mwakorire mware koenana omogwekano bw’ayio.”

14Erio Yeso akarangeria omoganda naende, akayoteebia, “Nyigwe mwensi, naende manya: 15Tari egento kere isiko y’omonto, na gekomosoa, keranyare komobekera ogotacheneka, korende ebikorwa ase omonto nabio bikomobekera ogotacheneka. [ 16Omonto kare namato akoigwera, tiga aigwe.]” 17Goika agachia gosoa nyomba, gatigire omoganda, aborokigwa baye bakamobooria amang’ana y’omobayeeno oria. 18Akabateebia, “Nonya ninwe timori nobong’aini? Timomanyeti ng’a kera egento kere isiko y’omonto gokeramosoe, tigekonyara komobekera ogotacheneka, 19ekiagera tigekomosoa enkoro, otatiga ase enda yoka, erio kiagwa kebara?” (Ase ogoteeba igo, osibirie chindagera chionsi.) 20Akabora “Ekegosoka korwa ase omonto nakio gekomobekera ogotacheneka. 21Ekiagera ime ase chinkoro chi’ abanto nigo bikorwao ebirengererio ebibe, obonyaka, oboibi, oboiti, obotomani, 22okogania okobe, obobe, obong’ainereria, oboenenu, ribero, oborami, obwerori, oboriri. 23Aya onsi amabe nigo akorwa ime, naro akobekera omonto ogotacheneka.”

Okwegena kw’omokuungu oyomo

(Mat 15:21-28)

24Yeso akaimoka korwa aria, akagenda goika omochie o Turo. Agasoa ase enyomba, akarigia tamanyekana na monto, korende tanyara kobiseka. 25Erio agwo omokungu oyomo, omwana oye enyaroka obwatire nekerecha ki’eubi, akaigwa amang’ana aye, agacha akamogwera ase amagoro aye. 26Omokungu oria n’Omogiriki orenge, egesaku kiaye n’Omosurofenisia. Akamosaba amosererie ekerecha korwa ase enyaroka yaye. 27Yeso akamoteebia, “Tiga abana baigote ritang’ani, ekiagera tari buya kobogoria endagera y’abana, gotugutera chisese.” 28Korende omokungu oria akamoiraneria, “Nab’Omonene, nonya nechisese nyaro ye chimesa nigo chikoria amatori y’abana.” 29Yeso akamoteebia, “Ase engencho ye ring’ana eri, genda bwoo, ekerecha kiarure ase enyaroka yao.” 30Akagenda mwaye, akanyora omwana oria bwareirie borere, na ekerecha keria kiamorure.

Yeso Okogwenia omonto orenge omotiino naende rimama

(Mat 15:29-31)

31Erio Yeso akarua agwo ase ensemo ya Turo, agaeta gati‐gati ya Sidoni, akagenda goika enyancha ya Galili, egati y’ensemo ya Dekapoli. 32Bakamorentera omonto ore omotiino, naende nigo are gotutura kagokwana; bagasorora Yeso abeeke okoboko kwaye igoro asare. 33Yeso akamwatanana korwa ase omoganda bobisi, akabeeka ebiara biaye ase amato aye, agatwa amate, akamokuna oromeme. 34Erio akarigereria gochia igoro, agaita egekoe, akamoteebia, “Efatha,” engencho yaye, “Igoreka.” 35Bwango amato aye agatiinoka, egesibo ki’oromeme rwaye gekororoba, agakwana buya. 36Yeso akabatianera tibateebia monto, korende buna amentete kobakania, naboigo bamentete koraria amang’ana aya. 37Abanto bagakumia mono kobua, bakaboora, “Okorire onsi buya. Abarenge emetiino obatiinoire, na abarenge amamama bakwane.”

Currently Selected:

Mariko 7: EKGE

Highlight

Copy