Mariko 6

Yeso okwangwa Nazareti

(Mat 13:53-58; Luk 4:16-30)

1Yeso akarua agwo, agaika ase ense yaye omonyene; aborokigwa baye bakamotunyana. 2Na ekero gi’Esabato agachaaka kworokereria ase esinagogi; abange abamoigwete bagakumia, bagateebania, “Oyo ng’ai anyorire aya? Mbong’aini ki obo aeirwe oyo? Ogokora gwe chinguru ki oko okonene kogokoreka ase amaboko aye? 3Oyo tari oria omobaachi, omwana o Mariamu, momura omwabo Yakobo, na Yose, na Yuda, na Simioni, na basubati bamwabo tibari aiga seito?” Bakagechigwa nere. 4#Yoh 4:44Yeso akabateebia, “Omobani takomocha gosikwa, otatiga ase ense yaye, na ase eamate yaye, na ase enka yaye.” 5Gose tanyara gokora ogokora gwe chinguru aroro, otatiga abegete amaboko aye igoro ase abarwaire bake, akabagwenia. 6Agakumia ase engencho y’ogotegena kwabo.

Yeso Ogotoma Abatomwa ikomi na babere

(Mat 10:5-15; Luk 9:1-6)

Agaetanana ase ebinyoro biaetanaineo okworokereria. 7Akarangeria baria ikomi na babere, agachaaka kobatoma babere babere, akabaa okobua igoro ase ebirecha bi’eubi; 8akabakaania tibaira gento ase orogendo rwabo, otatiga enyimbo yoka. Tibaira nonya nomogati, nonya nesaro, nonya nechitaabu ase ebimoya biabo. 9Korende babeeke ebikoroto, ko tibeboyia chianga ibere. 10Akabateebia, “Enyomba ende yonsi ase moraroisigwe, mobeere aroro goika ekero moraimoke korwa aase aria. 11#Ogok 13:51#Luk 10:4-11Na kera aase abanto batabaroiseti inwe, gose kobaigwa, komokorua aroro, mokong’onte orotu rore inse ase amagoro aino, robe kirori ase bare.” 12Bagasoka, bakarandia ng’a abanto baonchoke. 13#Yakb 5:14Bagaseria ebirecha ebinge, bagaaka abanto abange amaguta, abwo barenge abarwaire, bakabagwenia.

Ogokwa kwa Yohana Omobatisi

(Mat 14:1-12; Luk 9:7-9)

14 # Mat 16:14; Mar 8:28; Luk 9:19 Omorwoti Herode akaigwa amang’ana, ekiagera erieta ria Yeso konya riakumire kera ase. Abanto bande bakaboora, “Yohana Omobatisi obokire korwa ase abakuure, nakio gekogera chinguru echi chigokora emeremo ime asare.” 15Korende abande bakaboora, “N’Elija.” Na abande bakaboora, “Oyo nomobani, gose nigo anga buna oyomo bw’ababani.”

16Korende Herode agachia koyaigwa, akabora, “Oyio Yohana oria nanachete omotwe, obokire.” 17#Luk 3:19,20Inaki Herode omonyene nigo atomete abanto kobwata Yohana, akamosiba echela ase engencho ya Herodia moka Filipo momura omwabo, oria Herode atwarete, 18ekiagera Yohana amokanetie Herode, “Tai boronge ase ore komenyana na moka momura omino.” 19Nabo oria Herodia akaba nokogecha asare, akarigia komoita, korende tanyara, 20ekiagera Herode nairogete Yohana, konya omanyire ng’a nomonto omooronge, omochenu, akamorenda. Nigo anchete komoigwa, nonya orenge goichana mono kamoigure. 21Rituko rigwenerete rigaika Herodia akanyora ribaga ekero Herode ase rituko ri’okoinyora okoiborwa kwaye ekero akora omoyega ase abatang’ani bare inse yaye, na abatang’ani b’esegi, na abanto abanene ba Galili. 22Erio omoiseke bwe Herodia gasoa gotenga, akagokia Herode amo nabwo baikaransete nere ase omoyega. Omorwoti agateebia omoiseke oria, “Nsabe kende gionsi ekio origetie, na inche ninkoe.” 23Akamoriera eira, “Kende gionsi ekio orarigie korwa ase ’nde ninkoe, nonya nekeng’ese ki’oborwoti bwane.” 24Omoiseke oria agasoka, akaboria ng’ina, “Inki ’ndasabe?” Ng’ina akamoiraneria, “Omotwe o Yohana Omobatisi.” 25Erio kegima agasoa nomoayerero ase obosio bw’omorwoti, agasaba, akabora, “Nindigetie ong’e omotwe o Yohana Omobatisi bono iga ase esani.” 26Omorwoti akaba nomoichano mono, korende ase engencho ye chiira chiaye, na ase engencho y’abwo baikaransete ase omoyega, tarigetie kwanga. 27Erio kegima omorwoti agatoma omorwani oyomo, agachiika ng’a omotwe o Yohana orentwe. Omorwani oria akagenda akamonacha omotwe aria echela ime, 28akayorenta ore ase esani, akayoa omoiseke oria, na omoiseke oria akayoa ng’ina. 29Ekero aborokigwa ba Yohana baigwete amang’ana aya, bakagenda bakabogoria egetondo, bakagetindeka.

Yeso okorageria abanto chilifu isano

(Mat 14:13-14; Luk 9:10; Mat 14:15-21; Luk 9:11-17; Yoh 6:1-13)

30Abatomwa bakairana ase Yeso, bakamoteebia onsi ayabakorete, na amang’ana onsi aya aborokereretie. 31Akabateebia, “Inchuo inwe mweka, togende aase abanto batari, motimoke ake.” Inaki abanto abange mbarengeo, bagocha na bakogenda; goika Yeso n’aborokigwa baye tibanyora ribaga ri’okoria. 32Bakagenda ase obwato, aase abobisi, atari nabaanto. 33Abanto bakabarora bakogenda, abange ase abwo bakabamanya, bakaminyoka bwango korwa ase emechie yonsi, batang’ane goika asare. 34#Omob 27:17; 1 Abar 22:17; 2 Amg 18:16; Ezek 34:5; Mat 9:36Yeso agachia goika korwa ase obwato, akarora omoganda omonene, akabarorera amaabera, ekiagera barenge buna ching’ondi chitari nomorisia: agachaaka koborokereria amang’ana amange.

35Goika chinsa chinyinge chi’omobaso chigaeta, aborokigwa baye bakamochiera, bakaboora, “Aase aa negesomo, na bono riagorobire. 36Kae abanto aba ribaga, erinde bagende emechie na ebinyoro, aria na aaria, begorere endagera.” 37Korende Yeso akabairaneria, “Inwe bae endagera.” Bakamobooria “Inee! Togende togore emegati ye chidinari amagana abere, tobae barie?” 38Akababoria, “Emegati nerenga mobwate? Genda morore!” Bagachia komanya bakaboora, “Netano, ne chinswe ibere.” 39Yeso akabachiika aborokigwa baye baabaikaransie bonsi, ebiombe, ebiombe, ase obonyansi obobese. 40Bagaikaransa ase chindwaro, echinde rigana erimo na echinde emerongo etano. 41Erio Yeso akabogoria emegati eria etano ne chinswe chiria ibere, akarigereria igoro, akabisesenia, agasamunyora emegati eria, akaa aborokigwa baye babiterekere abanto, ne chinswe chiria ibere, akabagabera bonsi. 42Bonsi bakaria, bakaigota. 43Bagasangereria ebisamunye biasamunyogete, na ebio bigaichoria ebitonga ikomi na bibere, naboigo nebisamunye bie chinswe. 44Na abasacha abariete emegati eria nigo barenge chilifu isano.

Yeso ogotaara ase enyancha igoro

(Mat 14:22-27; Yoh 6:16-21)

45Erio Yeso akabetereria aborokigwa baye bariine obwato, bamotang’anere kogenda ng’umbu goika Bethisaida ekero are koa omoganda ribaga ogende. 46Magega gakorire gokwana nabarabwo, akagenda egetunwa gosaba. 47Riachia koba mogoroba, obwato bokaba enyancha gati, na ere bweka ase ense enyomo. 48Akabarora bagwechanda bagwata amaache nemegango, ekiagera omwaga nigo obatangete. Koreng’ana ekero ki’oborendi bwa kane bwa botuko agacha ase bare, ogotaara igoro ase enyancha, akarigia kobaetania. 49Barabwo bagachia komorora ogotaara ase enyancha igoro, bagakaga ng’a nerirengari, bagaaka eriogi, 50ekiagera bonsi abamorooche mbaondogete. Bwango Yeso agakwana nabarabwo, akabateebia, “Remia chinkoro! Ninche. Timoiroka!” 51Akariina ime ase obwato ase bare; omwaga ogakira. Aborokigwa bagaichana mono, 52ekiagera tibamanyete amang’ana y’emegati eria, korende chinkoro chiabo nigo chiarenge chinkong’u.

Yeso okogwenia abanto ba Genesareti

(Mat 14:34-36)

53Ekero bambokire bagaika ense ya Genesareti, bakabeeka ekeroochi. 54Bagachia gosoka korwa ase obwato, abanto bakamanya Yeso bwango, 55bakaminyoka, bagaetanana ense eria yonsi, bagachaaka kobogoria abarwaire bare ase amarere abo, bakagenda kera aase baigwete ng’a nao are. 56Kera aase are kogenda ase ebinyoro, gose emechie, gose emegondo, bakabeeka abarwaire ase chichiiro, bakamosorora ng’a abae ribaga bakune nonya nomokoba bw’eanga yaye; na abwo bonsi abamokunete bakagwena.

Currently Selected:

Mariko 6: EKGE

Highlight

Copy