Matayo 9

Yeso okogwenia omonto orenge rigata

(Mar 2:1-12; Luk 5:17-26)

1Agasoa obwato, akaamboka, agaika omochie oye#9:1 Omochie oye: Omochie oyio noro Kapernaumu ase Yeso amenyete magega y’ogokwa kwa Yohana Omobatisi. Rora Mat. 4:13. 2Na rigereria, bakamorentera omonto orenge rigata, oraire borere; na, ekero Yeso achia korora okwegena kwabo, agateebia oria rigata, “Remia enkoro, omwana one, ebibe biao biabeirwe.” 3Na rora, abande ase aborokia b’amariiko bakaboora ase emioyo yabo, “Omonto oyo ’nkorama are Nyasae.” 4Korende Yeso namanyete ebirengererio biabo, akababoria, “Nase ki inwe mokorengereria ebirengererio ebibe ase chinkoro chiaino? 5Ndiriri rire riango, goteeba: Ebibe biao biabeirwe, gose goteeba: Imoka ogende? 6Korende monyare komanya ng’a Omwana‐o‐Mwanyabaanto nare nokobua ase ense gw’okwabera ebibe.” Erio agwo agateebia oria orenge rigata, “Imoka, bwetweke egeseero#9:6 Egeseero: nakio kiarenge ekerarero kiomonto arenge kobogoria boigo gotaara nakio ase orogendo ki’ao, ogende bwoo.” 7Akaimoka, akagenda bwoye. 8Emeganda egachia korora aya, bakooboa, bakamotogia Nyasae, oy’oete Mwanyabaanto okobua konga buna oko.

Okorangerigwa kwa Matayo

(Mar 2:13-17; Luk 5:27-32)

9Ekero Yeso achia goeta korwa aroro akarora omonto oyomo okorokwa Matayo, oikaransete aase enyomba ekoruserigwa ebango, akamoteebia, “Ntunyana!” Akaimoka, akamotunyana.

10 # Luk 15:1,2 Ekero Yeso aikaransire nyomba koragera, rora, abarusia ebango abange amo n’abanyabibe bagaacha, bagaikaransa amo na Yeso na aborokigwa baye. 11Ekero Abafarisai bachia korora aya, bakabooria aborokigwa baye, “Nase ki Omworokia oino akoria amo nabarusia ebango n’a banyabibe?” 12Agachia koyaigwa, akabateebia, “Abare buya tibari korigia omogwenia, otatiga abarwarete. 13#Mat 12:7; Hos 6:6Genda mweorokererie engencho yaye ninki: Inche nigo ndigetie amaabera, gose tari ekeng’wanso. Inaki tincheti korangeria abanyaboronge, korende abanyabibe.”

Riborio igoro y’okweng’ata

(Mar 2:18-22; Luk 5:33-39)

14Ekero ekio aborokigwa ba Yohana bakamochiera, bakamoboria, Nase ki intwe na Abafarisai tokweng’ata ekero ase ekero, ko aborokigwa bao tibari kweng’ata 15Yeso akabateebia, “Inee! Abarangerigwa b’enyangi inabanyare korera ekero omonywomi are amo nabarabwo? Korende amatuko nache, barache kourwa omonywomi; erio nario barache kweng’ata. 16Onde tari okobeka ekeraka ki’egetambaa ekeyia ase eyanga engotu, ekiagera keria kiabekwa nigo kegotandora eyanga eria, na ase yatandogete ake nigo ekona‐gochiererera. 17Gose onde tari okobeeka edivai enyia ase ebirandi ebigotu biroisirie korwa ase amasankwa#9:17 Amasankwa: naro akorokwa ase erieta rinde “amao”. Eise kobekwa bo, ebirandi biria nigo biratandoke, na edivai eiteke, na ebirandi bisareke; korende edivai enyia nigo ekobekwa ase ebirandi ebiyia, bionsi bibere biasirana.”

Omoiseke o Yairo na omokungu ore noborwaire bw’okorua amanyinga bakogwenigwa

(Mar 5:21-43; Luk 8:40-56)

18Ekero Yeso are gokwana aya, omonene oyomo agacha, akabeeka amaru inse asare, okobora, “Omwana one omoiseke okuure bono iga, korende inchwo aye, omobekere okoboko, na ere nabe moyo.” 19Yeso akaimoka agatunyana omonto oria, ere na aborokigwa baye. 20Na rora, omokungu oyomo oyorenge noborwaire bw’okorua amanyinga ase engaki y’emiaka ikomi na ebere, akamochiera korwa magega, agakuna omokoba bw’eyanga yaye. 21Igo arengereretie ase omoyo oye ime, “Inse gokuna eyanga yaye, ningwene.” 22Yeso akeonchora, akamorora, akamoteebia, “Moiseke one, remia enkoro; okwegena kwao gwakogwenirie.” Omokungu oria akagwena erio kegima. 23Yeso agachia gosoa enyomba y’omonto oria omonene, akarora ababugia ebiroria, na abanto basangererekaneteo bakorera. 24Akabateebia, “Karuo aa! Omoiseke oyo takweti, okorara araire gwoka.” Bakamosekerera. 25Korende ekero baria basangererekanete amo basogetigwe isiko, agasoa ime, akamobwata okoboko, na omoiseke oria akaimoka#1 Abar 17:17-24; 2 Abar 4; Luk 7:11-16; Yoh 11; Ogok 9:36-43. 26Amang’ana aya agasarera ase ense eria yonsi.

Yeso okogwenia abanto babere emeuko

27Ekero Yeso arenge goeta korwa aase aria, abanto babere barenge emeuko bakamotunyana, bagaaka eriogi, bakaboora, “Tororere amaabera, aye omwana o Daudi!” 28Yeso agachia gosoa nyomba, emeuko eria ekamochiera. Yeso akababoria, “Inee! Mwegenire ng’a inche ninyare gokora ring’ana eri?” Bakamoteebia, “Ee, Omonene.” 29Erio agwo agakuna amaiso abo, akabateebia, “Abe ase more koreng’ana nokwegena kwaino.” 30Amaiso abo akaramokigwa. Yeso akabatianera bokong’u, “Rigereria monto onde tabaisa komanya amang’ana aya.” 31Korende barabwo bagasoka isiko, bagasareria amang’ana aye ase ense eria yonsi.

Yeso okogwenia omonto orenge rimama, naende obwatire nekerecha

32Ekero bachia gosoka isiko, rora, abanto bakamorentera omonto orenge rimama, naende nigo ere abwatire nekerecha. 33Ekero ekerecha giachia goserigwa, omonto oria rimama agakwana. Emeganda egakumia, ekabora, “Amang’ana anga buna aya tana kororekana nonya ng’ake ase Abaisraeli.” 34#Mat 10:25; 12:24; Mar 3:22; Luk 11:15Korende Abafarisai bakaboora, “Ere nase chinguru chi’omonene bw’ebirecha agoseria ebirecha.”

35 # Mat 4:23; Mar 1:39; Luk 4:44 Yeso agaetanana emechie yonsi na ebinyoro, okworokereria ase chisinagogi chiabo, okorandia amang’ana amaya y’oborwoti na kogwenia amarwaire onsi na oboreu bwonsi.

Yeso okororera abanto amabeebe

36 # Omob 27:17; 1 Abar 22:17; 2 Amg 18:16; Ezek 34:5; Mar 6:34 Agachia korora emeganda y’ abanto, akabarorera amabeebe, ekiagera konya bachandekire, baserebekanire buna ching’ondi chitari nomorisia. 37#Luk 10:2Erio agateebia aborokigwa baye, “Rigesa nerinene, korende abakori emeremo nabake; 38gaki mosabe Omonene bwe rigesa atome abakori emeremo ase rigesa riaye.”

Currently Selected:

Matayo 9: EKGE

Highlight

Copy