Matayo 22

Omobayeeno bw’omoyega bw’enyangi

1Naende Yeso agakwana nabarabwo ase emebayeeno akabora, 2“Oborwoti bwa igoro nigo bogwekaine nomorwoti okorete omoyega bw’enyangi y’omwana oye. 3Agatoma abasomba baye batuunye baria konya barangerigwe ase enyangi, korende barabwo bakaanga gocha. 4Naende agatoma abasomba bande, agateeba: Bateebie abarangerigwe: Rigereria, naroisirie endagera y’ane, chieri amo n’echimori chiane chianyenyirwe, na bionsi biabeire ang’e; inchwo ase omoyega bw’enyangi. 5Korende bagachaaya amang’ana aya, bakagenda, oyomo ase omogondo oye, na oyonde ase oboonchoreria bwaye; 6na abatigarete bakabwata abasomba baye, bakabakorera bobe bakabaita. 7Omorwoti oria akaba nendamwamu, agatoma emeganda y’abarwani, egasiria abaiti baria, na koyosamba omochie obo nomorero. 8Erio agateebia abasomba baye: Ekeene enyangi yabeire ang’e, korende abaariganetigwe tibagwenereti. 9Gaki, genda ase chinchera chinene, aba moranyore bonsi mobarangerie gocha ase omoyega bw’enyangi. 10Abasomba baria bagasoka, bagaika ase chinchera, bagasangereria abanyorete bonsi, ababe na abaya; igo enyomba y’enyangi egaichorwa nabageni.

11“Korende ekero omorwoti achia gosoa korigereria abageni, akarora omonto oyomo aroro otabegete eyanga y’enyangi. 12Akamoboria: Mosani, naki gwakorete ogasoa aiga, na aye otari neyanga y’enyangi? Agakira‐kiri. 13#Mat 8:12; 25:30; Luk 13:28Erio omorwoti agateebia abakoreri: Moboe amaboko na amagoro, momotugute ase omosunte isiko; aroro abanto inababe nekerero na okoriania amaino. 14Inaki abarangerigwe nabaange, korende abachorirwe nabake.”

Riborio igoro y’okoa Kaisari ebango

(Mar 12:13-17; Luk 20:20-26)

15Erio Abafarisai bakagenda, bakaroberia buna bagochia gotega Yeso ase amang’ana aye. 16Bagatoma aborokigwa babo ase are, amo n’Abaherode, bakaboora, “Omworokia, twamanyire ng’a nigo ore omonto bw’ekeene, na enchera ya Nyasae nigo okoyiorokereria ase ekeene, gose tori koyiera monto#Mar 12:14; Luk 18:2,4; 20:21; ekiagera torengerereti obonene bw’ abanto. 17Gaki toteebie naki orooche aye? Mboronge komoa Kaisari ebango, gose taibo.” 18Korende Yeso, konya omanyire obong’ainereria bwabo, akabora, “Inaki mogonteema, inwe abang’ainereria? 19Inyorokie ebesa y’ebango.” Bakamorentera ebesa. 20Yeso akababoria, “Ekieni eke na amariiko aya nebiang’o?” 21Bakamoiraneria, “Nebia Kaisari.” Erio akabateebia, “Nabo, ebire ebia Kaisari moe Kaisari, na ebia Nyasae moe Nyasae.” 22Ekero bachia koigwa ring’ana riria, bagakumia; bakamotiga, bakagenda.

Riborio igoro y’okobokigwa

(Mar 12:18-27; Luk 20:27-40)

23 # Ogok 23:8 Rituko erio erio Abasadukai bakamochiera, baria bagoteeba ng’a okobokigwa tikoiyo, bakamobooria, 24#Okoir 25:5bakobora, “Omworokia, Musa nateebete: Omonto karakwe, na ere tari n’abana, momura omwabo atware omoboraka oria, atenenerie momura omwabo egesaku. 25Bono mbarenge abamura ba ise oyomo batano na babere egati yaito. Oyo bw’eritang’ani akanyuoma, erio agakwa, na ekiagera atarenge nabana, agatigera momura omwabo mok’aye. 26Naboigo noyo o kabere akamotwara, na oyo o gatato, goika bonsi batano na babere bakaera. 27Omoerio o bonsi omokungu oria nere agakwa. 28Inee! Ase okobokigwa, mokang’o arabe ase baria batano na babere; naki bonsi mbameny’anete nere?”

29Korende Yeso akabairaneria, “Mwasirire inwe, ekiagera timomanyeti amariiko, nonya nokobua kwa Nyasae. 30Inaki ase okobokigwa tibakonyuoma gose tibakonyuomwa, korende nigo barabe buna abamalaika ba Nyasae bare igoro. 31Na ase okobokigwa kw’abakuure timwana gosoma eri mwatebetigwe na Nyasae: 32#Okong’ 3:6Inche ninche Nyasae o Aburaamu, na Nyasae o Isaka, na Nyasae o Yakobo? Ere tari Nyasae bw’abakuure, korende Nyasae bw’abare moyo.” 33Ekero omoganda ochia koigwa aya, ogakumia ase okworokereria kwaye.

Ogochika kore okonene kobua ayande

(Mar 12:28-34)

34Korende Abafarisai, ekero bachia koigwa ng’a Yeso obakiririe Abasadukai, bagasangererekana amo. 35Oyomo ase barabwo, omonto bw’amachiiko, akamobooria ase okomoteema, 36“Omworokia, ngochiika ki kore okonene ase amachiiko onsi?” 37#Okoir 6:5Akamoteebia, “Mwanche Omonene Nyasae oo nenkoro yao yonsi, na omoyo oo bwonsi, na obong’aini bwao bwonsi. 38Oko nakwo ogochika okonene, naende nakwo kw’eritang’ani. 39#Abal 19:18Nogwa kabere gokoreng’aine noko: Mwanche omogisangio oo buna bweanchete aye omonyene. 40#Luk 10:25-28Ase amachiiko aya abere naro atenenerete amachiiko onsi na ababani.”

Riborio igoro ya Kristo

(Mar 12:35-37; Luk 20:41-44)

41Abafarisai kobasangererekanire amo, Yeso akababoria, 42“Inaki inwe mokorengereria ase Kristo? Nomwana o ng’o are?” Bakamoiraneria, “Nomwana o Daudi.” 43Akababoria, Inki rende gekogera Daudi, akoraagwa n’Omoika, akamoroka Omonene, okobora:

44 # Zab 110:1 Omonene agateebia Omonene one:

Ikaransa ensemo y’okoboko kwane gw’okorio,

goika ’mbeke ababisa bao babe inse y’amagoro ao?

45Gaki, onye Daudi okomooroka Kristo, naki rende arabe omwana oye? 46Onde tarenge ore konyara komoiraneria ing’ana; nonya nkorwa rituko riria monto onde tarenge na boremu komoboria maborio ande.

Currently Selected:

Matayo 22: EKGE

Highlight

Copy