Matayo 21

Yeso ogochengerwa kagosoa Yerusalemu

(Mar 11:1-11; Luk 19:28-40; Yoh 12:12-19)

1Ekero bachia goika ang’e na Yerusalemu, bagaika Betifage, ase egetunwa ki’Emezeituni. Erio Yeso agatoma aborokigwa baye babere, 2akabateebia, “Genda ase ekenyoro keria kere bosio bwaino, erio kegima namorore etigere esibire, na emori yaye amo nero; mochisibore mochindetere. 3Na omonto karabateebie ring’ana, momoteebie: Omonene nachiganetie; erio kegima nachitome.” 4Aya onsi agakoreka, erinde anyare goikeranigwa ayatebetwe nomobani, ogoteeba,

5 # Zak 9:9 “Teebia abanto ba Sayoni,

Rigereria, Omorwoti oino nkobaachera are,

nomokanyeku, oriinire etigere,

nase emori y’etigere, akamori g’etigere.”

6Aborokigwa bakagenda, bagakora buna Yeso abachiigete. 7Bakamorentera etigere amo nemori yaye, bakaara chianga chiabo igoro ya chirochio, na Yeso akayeriina. 8Na abange b’emeganda bakaara chianga chiabo inchera; abande bakanacha chinsagia chi’emete bagachiaara nchera. 9#Zab 118:25,26Emeganda eria yatang’aine, na eyare komotunyana, bagaaka eriogi, bagateeba, “Hosana ase Omwana o Daudi! Nasesenirie oyio ogocha ase erieta ri’Omonene! Hosana, aye ore igoro mono!” 10Ekero achia gosoa Yerusalemu, omochie omogima ogasega‐sega, abanto bakabooria, “Ning’o oyio?” 11Emeganda ekairaneria, “Oyio nere Yeso, omobani o Nazareti ya Galili.”

Yeso ogochena Hekalu

(Mar 11:15-19; Luk 19:45-48; Yoh 2:13-22)

12Erio Yeso agasoa ase Hekalu ya Nyasae, akabasokia isiko bonsi abarenge koonia na kogora ime ase Hekalu, akaonchorana chimesa chi’abaare koonchoreria chitaabu, na ebirogo bi’abaare koonia amaruma. 13#Isaya 56:7; Yer 7:11Akabateebia, “Neriikire: Enyomba y’ane nerokwe enyomba y’ogosaba, na inwe mwayekorire koba ribwago ri’abauri.”

14Emeuko na amagata bakamochiera aria ase Hekalu, na ere akabagwenia. 15Korende abakuani abanene na aborokia b’amariiko bakabea, ekero bachia korora ebirage bi’ogokumia akorete, na abana bagoaka eriogi ase Hekalu ime, bakobora, “Hosana ase Omwana o Daudi!” 16#Zab 8:2Bakamobooria, “Kwaigure abana buna bakobora?” Yeso akabateebia, Ee; timwana gosoma:

Nase emenwa y’abana na ey’abakogonka

kwerenteire ogotogia ogoikeranu?

17Akabatiga, agasoka korwa ase omochie, akagenda Bethania, akarara aroro.

Omoko omogomba

(Mar 11:12-14,20-26)

18Mambia gakoirana omochie, akaigwa enchara. 19Akarora omoko oyomo ase enchera ensemo, akayochiera, tarora gento asoro otatiga amato oka. Akayoteebia, “Korwa bono tokwama amatunda nonya ndinde.” Erio kegima omoko oyio okoma. 20Ekero aborokigwa bachia korora ogokora oko, bagakumia, bakabooria, “Inaki bono omoko oyo bwoma bwango iga?” 21#Mat 17:20; 1 Abakr 13:2Yeso akabairaneria, “Nekeene nabateebirie; Komorabe nokwegena motabeti na tangutangu chinde, tari erio ri’omoko rioka morakore, korende ’namoteebie egetunwa eke: Tegoka, otugutwe enyancha ime, na rikoreke. 22Kende gionsi moraborie ase ogosaba, komoregeene namokenyore.”

Riborio igoro y’okobua kwa Yeso

(Mar 11:27-33; Luk 20:1-8)

23Ekero achia gosoa Hekalu ime na kworokereria, agachierwa nabakuani abanene na etureti#21:23Etureti: etureti n’abagaaka bakogamba ebiina ase ebinyoro ase erieta rinde nabwo abatureti y’abanto, bakamobooria, “Nase okobua ki ogokora amang’ana aya? Ning’o okoete okobua oko?” 24Yeso akabairaneria, “Nainche boigo nimbaboorie ring’ana erimo, komorang’iranerie, nainche boigo nimbateebie nase okobua ki ngokora aya. 25Inee! Ebatiso ya Yohana, ng’ai yarwete? Igoro yarwete, gose nase Mwanyabaanto?” Bagateebania barabwo ase barabwo, bakaboora, “Toise goteeba: Niigoro yarwete, igo aratoborie: Inaki rende motamwegenete? 26Naende toise goteeba: Nase Mwanyabaanto yarwete, nkoiroka tore omoganda, ekiagera abanto bonsi banchete ng’a Yohana nomobani orenge.” 27Bakamoiraneria, “Titomanyeti.” Ere akabateebia, “Nonya ninche tinkobateebia inwe nase kobua ki ngokora aya.

Omobayeeno bw’abana babere abamura

28“Inaki morooche? Omonto gete narenge nabana babere abamura. Akamochiera oria bw’eritang’ani, akamoteebia: Omwana one, genda reero okore emeremo ase omogondo bw’emesabibu. 29Akamoiraneria: Tindigeti kogenda, korende magega yaye akaonchoka, akagenda. 30Akamochiera oy’okabere, akamoteebia boigo. Nere akamoiraneria: Nkogenda inde, omonene; ko tagenda. 31Inee! Norori ase baria babere okorete ogwancha gwa ise?” Bakaboora, “Noria bw’eritang’ani.” Yeso akabateebia, “Nekeene nabateebirie ng’a abarusia ebango na abakungu abatayayi nkobatang’anera bare gosoa ase oborwoti bwa Nyasae. 32#Luk 3:12; 7:29,30Inaki Yohana nigo achete ase more ase enchera y’oboronge, timwamwegena; korende abarusia ebango na abakungu abatayayi bakamwegena; na inwe nonya nekero mwaroche ayio, timwaonchoka na komwegena.

Omobayeeno bw’omogondo bw’emesabibu

(Mar 12:1-12; Luk 20:9-19)

33 # Isaya 5:1,2 “Tegerera omobayeeno onde. Narenge omonto omonyene omochie; ere akarema omogondo, agasimeka emesabibu imeo, akayoetananeria orobago, agakuunya ime aroro egeteera akomitera amasabibu, akaagaacha orwaki, akaywatananera abaremi, akagenda orogendo. 34Ekero engaki y’amatunda yachia goika ang’e, agatoma abasomba baye ase abaremi, banyore amatunda aye. 35Abaremi bakabwata abasomba baye, oyomo bakamoaka, oyonde bakamoita, na oyonde bakamoaka amagena. 36Naende agatoma abasomba bande, abange kobua baria b’eritang’ani; bakabakorera boigo. 37Omoerio oye agatoma omwana oye ase bare, ogoteeba: Inabasike omwana one. 38Korende abaremi baria, ekero bachia korora omwana oria, bagateebania barabwo ase barabwo: Oyo nere omonyamwando; gaki tomoite, omwando oye toyoire. 39Bakamobwata, bakamotuguta isiko korwa ase omogondo bw’emesabibu, bakamoita. 40Inee! Karache omonyene omogondo, naki arakore abaremi baria?” 41Bakamoteebia, “Igo araite abamwamu baria ogoita okobe, na aatananere abaremi bande omogondo oria bw’emesabibu, abarache komoa amatunda ekero amire.”

42 # Zab 118:22,23 Yeso akabateebia, Timwana gosoma ase amariiko:

Rigena riria abaagachi bangete

riabeire rigena rinene ri’ekoona.

Ring’ana eri nigo riarure ase Omonene,

na rirorio nogokumia ase amaiso aito?

43Ase engencho eye nabateebirie, ng’a oborwoti bwa Nyasae naborusigwe ase more, boegwe egesaku egekwama amatunda aye. [ 44Oyoragwe igoro ase rigena eri nabunekane, na ere oyo rigena riria riragwere inarimosenyente.]

45Ekero abakuani abanene na Abafarisai bachia koigwa emebayeeno yaye, bakamanya ng’a nabwo agoteeba. 46Korende ekero bachia korigia komobwata, bakairoka emeganda, ekiagera abanto konya banchire ng’a ere nomobani.

Currently Selected:

Matayo 21: EKGE

Highlight

Copy