Zekaria 8
8
1AABBO Waaqi Guddaani na yaame waan naani jed'e, 2Anini dira Yerusalemu guddo jaalad'e qarqaaru fed'e, tanaafi nyaapa isaati guddo dallane. 3Ammalle anini waan jed'u, Anini dira kiyya qulqullo Yerusalemuti deebie keesa taa. Isa dira d'ugeefatani jed'aniini, gaara AABBO Waaqa Guddaa, gaara qulqullo jed'aniini. 4Ammalle jaaroleeni uwatiifi ta d'iira ta uleeni yaatu, deebite garaa dira suni keesa teeti. 5Ammalle kara isaale ijoolle d'iiratiifi ta dubra ta tabatuuti guuta.
6Woni kunini nama hafe waan intaane fakaatti, ammo naa intaati. 7AABBO Waaqi waan jed'u, Anini gumi tiyya ta boojiani lafa d'ibi geesani baase, 8ilaborutiifi ila galchule woltiini d'ufe, Yerusalemu qubachiisa. Worri gumi tiyya tahe, anileeni Waaqa worraa, ka d'ugaafi qajeelumaani worra fidu, taha.
9Jabaad'a! Isani amma dubbuma raagooti duri, gaafa yayaba Mana kiyya kayani dubbatte, d'agayuu jirtani. 10Guyya suni durati nami tokoleeni dandae nama yokhaani horile inkirrefatu, nami tokoleeni dandae fulla tokole inchochou. Wonti akanatiifi anini gaafasi nama wolti naqa. 11Ammo anini ammatana nama hafe kana aka d'ibi tolcha. 12Worri nagayaani mid'aani ufii fach'aafate, zabibuleeni mid'aani baafte, laftileeni mid'aani baafte, bokaya guddale argata. Anini eeba tana ch'ufa nama gosa tiyya ka hafeti kenna. 13Ammalle isani, worra Yudatifi ka Israeli! Duri nyaapi woli abaare waan woliini jed'e, Akuma Yerusalemufi Yudaani gaargala argate, Waaqi isani gaargalchinna! Ammo eegi anini taka tana isani baasu, nyaapi kaani akana woli eebisa: Waaqi akuma Yudafi Israeli eebise isani eebisinna! Tanaafi jabaad'a, insodaatina!
14AABBO Waaqi Guddaani waan jed'u, Gaafa ababooti teesani na dallansifte, anini waan hamtu worra balleesa iti malad'e, herega kiyya suni garagalfachu dide guute. 15Ammo amma tana anini worra Yerusalemutiifi ka Yuda mala eebisufi harkaa qaba; tanaafi insodaatina! 16#Efs 4.25 Woni isani tolchu maltani kana: D'uga wolti dubbad'a, fulla gaadisa qorsuma d'uga gula woi qora — d'uga ta nagayaani d'uftu. 17Mala hama woliini yakitani inqabaatiina, kakhattani d'ara indubbatiina. Anini d'ara dubbachafi waan hamtu akana ch'ufa guddo jibba.
18AABBO Waaqi Guddaani na yaame waan naani jed'e, 19Waan anini jed'u, Guyyaani ufi agabsani ka jia afreesotiifi ka shaneesotiifi ka torbeesotiifi ka kud'anneeso garagale jila gammadafi qilit'ama worra Yudati taha; tanaafi d'ugaafi nagaya jaalad'a.
20AABBO Waaqi Guddaani waan jed'u, Guyyaani ind'ufa, ka nami dira heddu keesaa bahe Yerusalemu d'ufu. 21Nami dira toko keesa jiru waan worra dira d'ibitini jed'u, Koota, woliini yaane, AABBO Waaqa kad'anne eeba iraa fed'anna. 22Nama heddufi gochiti jabeenna qabdu Yerusalemuti d'ufte eeba iraa fed'atti. 23Gaafasi nama kud'ani, ka gosa gosa, nama Yahudi tokoti d'ufe waan jed'uuni, Waan nu d'ageenne, Waaqi isani woliini jira, tanaafi isani woliini yau feena.
Aka gosa d'aatu jirtu wollaala iti murani
Currently Selected:
Zekaria 8: BOR
Highlight
Share
Copy
Want to have your highlights saved across all your devices? Sign up or sign in
Borana Bible © Bible Society of Kenya, 2019.
