Zekaria 7

1Ganna afreeso ka haga hayyu Darioni lafa fide, guyya afreeso, ka jia sagaleeso, ka Kisleu jed'ani, AABBO Waaqi qonqo nati erge.

2Worri Betheli qara Sharezafi Regemmelekifi jara isaanile ya Mana AABBO Waaqa Guddati erge, aka eeba AABBO Waaqa kad'atani 3gaafi tanale qaalolefi raagoota gaafatani: Nu waan Mana Waaqaa balleesanifi, aka nu ganna heddu jia shaneeso keesa taane, ufi agabsine bohu ya malle?

4Duuba AABBO Waaqi na yaame waan naani jed'e, 5Waan atini nama lafatifi qaaloleeni jettu, Gaafa isani jia shaneesotiifi ka torbeeso ufi agabsitani ganna torbatama bootani, isani d'uguma naa jettani akasi taatani? 6Ammalle gaafa isani nyaattani d'uddani, ufumaafi nyaattani d'uddaniniti?

7Gaafa diri Yerusalemu waan ch'ufa qabu, ka nami keesa guute, ammalle ka nami hedduuni dira d'aatutiifi arda bitatiifi lafa gamooji ta ila galchu keesa jiru, dubbini tunini dubbi AABBO Waaqi afaani raagoota duritiini jed'eeniti?

Waan worra boojianifi

8AABBO Waaqi Zekaria yaame waan jed'eeni, 9Anini duri waan gumi tiyyaani jed'e, D'uga jabeesa, wolqarqaara, wolinaha, 10haad'a hiyyeesatiifi hiyyeeyifi keessumafi yokhaani nama wo inqamne tokole indabsina. Aka woliyakitani wolballeesitani immalatiina.

11Ammo gumiini tiyya mataa jabaatte na ch'aqasu didde gurra duufatte 12garaa ufii aka d'akha jabeesite. Waan worri barsiisa anini duri raagootaani erge ch'aqasu dideefi, anini guddo worrati dallane. 13Waan worri jecha kiyya ind'agayinifi, anileeni kad'acha worraa d'agayu dide. 14Aka bubbe anini worra fuud'e lafa nyaapati firfirse. Akanaani lafti worraa dansaani tunini onte badde nama d'abde.

AABBO Waaqi aka Yerusalemu finna dansaati deebisu kakhate

Currently Selected:

Zekaria 7: BOR

Highlight

Copy