Mat 27

Jesû gwikua kwa Pilatû

(Mar 15.1; Luk 23.1-2; Joh 18.28-32)

1Rûûneene rûkîîrî kainda athînjîri-Mûrungu barîa anene bonthe amwe na akûrû barîa atongeeria bareetîkanîîria kûûraga Jesû. 2Baramûtheeka na baramwikia kîrî Pilatû, ûrîa waatûmi kuuma Roma aa mûrûngamîîri wa nthîgûrû îîu.

Gîkuû kîa Judasi

(Maj 1.18-19)

3 # Maj 1.18-19 Rîrîa Judasi ûrîa wamûkûnyanîîre oonere Jesû agûtuîrwa kûûragwa, nî airirîre na aracokeria athînjîri-Mûrungu barîa anene na akûrû barîa atongeeria mbeecha irîa mîrongo îthatû cia fetha. 4“Nî mbîîtie gûkunyanîra muntû ûtî na maatia ooragwa.” Îndî baramwîra atîrî, “Bûu tî ûntû kîrî tuî! Jau nî mantû jaaku.” 5Judasi aragera mbeecha iu kîûrûûne, na areeta araicuuria. 6Athînjîri-Mûrungu barîa anene barajûkia mbeecha iu na barauga, “Waatho bûtîtîkîîrîtie tûringanîra mbeecha iji na mbeecha cia kîûrû nîûntû nî itûmîte muntû ooragwa.” 7Tontû bûû, bararîîkania na bareeta kûgûra kîthaka kîa mûûmbi wa nyongû nacio nîkenda bathikaga ageni ku. 8Kîu nîkîo gîtûmi kinya naarua tûrî, kîthaka kîu gîtagwa Kîthaka kîa Tharike. 9#Zek 11.12-13 Rîu nteto irîa kîroria Jeremia augîîte iroojûra: “Nî baajûkîrîe mbeecha irîa mîrongo îthatû cia fetha. Mbeecha iu nîcio antû ba Israeli beetîkîîrîtie kûrîaa nîûntû bwaawe. 10Baragûra nacio kîthaka kîa mûûmbi wa nyongû o ta ûrîa Mwathani aambîrîte.”

Jesû kûûrua biûria nî Pilatû

(Mar 15.2-5; Luk 23.3-5; Joh 18.33-38)

11Jesû ararûngama mbere ya mûrûngamîîri ûrîa waathaga nthîgûrû îîu. Mûrûngamîîri ûu aramûûria atîrî, “Ûgwe nîgwe mûnene wa Ayahudi?” Jesû aramwîra, “Ûkuuga u.” 12Îndî rîrîa athînjîri-Mûrungu barîa anene na akûrû barîa atongeeria baamûthitangîre, Jesû arakira ki. 13Tontû bûû, Pilatû aramûûria, “Ningî nî ûkwigua mantû jarîa bagûkûthitangîra?” 14Îndî Jesû arakira ki na ararega kûmûcokeria noo atîa. Bûu bûrarigaria mûrûngamîîri ûu mono.

Jesû gûtuîrwa kûûragwa

(Mar 15.6-15; Luk 23.13-25; Joh 18.39—19.16)

15Nî kwaarî wîîthîre mûrûngamîîri wa nthîgûrû îîu kûthaûra mûbungwa ûmwe ûrîa kîrîndî kîaugaga athaûrwe îgiita rîa thîgûûnkû ya Pasaka. 16Îgiiteene rîu nî kwaarî muntû ûmûthûûku mono ncheera weetagwa Baraba. 17Tontû bûû, rîrîa antû boothûranîre amwe, Pilatû nî aaboorîrie atîrî, “Nûû bûkûenda mbûthaûrîra: Nî Baraba kana nî Jesû ûrîa wîtagwa Kristû?” 18Aboorîrie ûu nîûntû nî aamenyaga bwega atî nî rûriitho rwatûmîte banenkanîra Jesû ooragwa. 19Rîrîa Pilatû aarî akuî kûgiita îgamba, mwekûrû waawe nî aatûmanîre kîrî we arauga atîrî, “Ûgátonyeera mantûûne jegiî muntû ûu ûtî na maatia, nîûntû ûtukû nî ndîrathangîkîre mono kîrootoone nîûntû bwaawe.” 20Athînjîri-Mûrungu barîa anene na akûrû barîa atongeeria bareerenca antû bauge nî bathaûrîrwe Baraba na bauge Jesû ooragwe. 21Mûrûngamîîri ûu, tawe Pilatû arabooria kaîrî, “Nî ûrîkû kîrî baba bobaîrî bûkwenda mbûthaûrîra?” Baramûcokeria, “Nî Baraba!” 22Pilatû arabooria, “Nî atîa nthithia na Jesû ûrîa wîtagwa Kristû?” Bonthe barauganîria, “Mwambithie!” 23Pilatû arabooria, “Nîkî bûkwenda aambwa? Nî ûthûûku bûrîkû athithîtie?” Îndî bararinga gîtuma nkûrûki bakiugaga, “Mwambithie!” 24#Kûr 21.6-9 Rîrîa Pilatû oonere atî mantû nîka jagwîta na mbere jakîthûûkaga, na gîtuma ka gîkwongeereka, nî aajûkîrie rûûjî na arathamba njara mbere yaao akiugaga, “Ûûni tî ni ndaatûma muntû ûûjû ooragwa, akua nî îgûrû rîeenu!” 25Antû bonthe baramûcokeria, “Îî, nî akuee u atî nî tuî na nchiarwa cieetû twamûûraga!” 26Rîu Pilatû arareekeria Baraba kuuma ncheera, na aranenkanîra Jesû beeta kûmwamba.

Asikarî gûkurunga Jesû

(Mar 15.16-20; Joh 19.2-3)

27Rîu asikarî ba Pilatû barakûrûkia Jesû gîkaroone kîa mûtongeeria, na njûûrî ya asikarî îroothûûrana akuî nawe. 28Baramûrita nguû na baramwîkîra rwambambio rûrûtuune. 29Ningî baratuma thirû ya miigua na baramwîkîra mûtwe, baramûgwatithia rûturo njareene yaawe ya ûrîo. Rîu baraturia maru mbere yaawe na baramûkurunga bakiugaga, “Ûrotûûra matukû jamaingî Mûnene wa Ayahudi!” 30Baramûtuîra mata na barajûkia rûturo baramûringa kîongo naru. 31Rîrîa baathirîrie kûmûkurunga nî baamûritîre rwambambio rûrîa baamwîkîrîte, na baramwîkîra nguû ciaawe. Rîu bareeta kûmwamba.

Jesû kwambwa mûtharabeene

(Mar 15.21-32; Luk 23.26-43; Joh 19.17-27)

32Rîrîa beetîte, nî baatirimanîre na muntû ûmwe weetagwa Simioni, wa kuuma Kurene na baramûkinyîîria gûkamata mûtharaba jwa Jesû. 33Bagûkinya antû arîa eetagwa Goligotha, kûrîa gweetagwa kaîrî “Gûntû kwa mûrûitû jwa kîongo,” 34#Zab 69.22 baramûkundia ndibei yaungenue na nyongo. Îndî Jesû akûmîcema ararega kûmînyua. 35#Zab 22.19 Bakûmwamba bararinga kuura nîkenda boona ûrîa ûgeeta na nguû ciaawe. 36Rîu barakara nthî au, baramûkaria. 37Îgûrû rîa mûtwe jwaawe nî baandîkîte jarîa baamûthitangîrîte, najo jaarî, “Ûjû nî Jesû Mûnene wa Ayahudi.” 38Nî kwaarî atuunyani baîrî barîa baambi akuî na Jesû, ûmwe aarî rûteere rwa ûmotho na ûngî aarî rûteere rwa ûrîo. 39#Zab 22.8; 109.25 Antû barîa baakûrûkagîîra antû au nî bainainagia biongo biaao na kûmûruma bakiugaga, 40#Mat 26.61; Joh 2.19 “Gwe ûrîa ûreendaga kûtharia kîûrû na ûgîaka na ntukû ithatû, cionokie nandî! Këethîra ûrî Mûtaana wa Mûrungu, kinya nthî uume mûtharabeene!” 41Ningî kinya athînjîri-Mûrungu barîa anene na aritani ba Waatho amwe na akûrû barîa atongeeria, nî baamûkurungîre bakiugaga, 42“Nî aroonokagia bangî îndî we wengwa atîkûûmba gûcionokia! Ûjû nîwe Mûnene wa Israeli! Nî aakinye nthî aume mûtharabeene naatuî tûkamwîtîkia! 43#Zab 22.9 Nî areetîkagia Mûrungu na akauga atî we nîwe Mûtaana wa Mûrungu, rîu këethîra Mûrungu ûu nî akwenda nî amwonokie nandî.” 44Atuunyani barîa baambi akuî nawe kinya bo nî baamûrumangaga.

Gûkua kwa Jesû

(Mar 15.33-41; Luk 23.44-49; Joh 19.28-30)

45Nthîgûrû yonthe nî yaagîîre muundu kuuma thaa thita cia mûthenya mwanka thaa kenda. 46#Zab 22.2 Gwakinya akuî thaa kenda Jesû nî aakaîre na kajû gakanene akîugaga: “Eloi, Eloi, lama Sabakithani?” Ûû nî kuuga, “Mûrungu waakwa, Mûrungu waakwa, nîkî wambîrûkîra?” 47Antû barîa barûngi au baigua ûu barauga, “Nî agwîta Elija.” 48#Zab 69.22 Ûmwe waao aroogîa arajûkia kînyaguthi, na aragîtombeka kîrî ndibei yaarî na nchechû na arakîogera mûthia jwa karûturo na aramûkundithia. 49Bangî barauga, “Tigana nawe, ga twoone këethîra Elija akeeja kûmwonokia.” 50Rîrîa Jesû aakaîre kaîrî na kajû gakanene, arakua. 51#Kum 26.31-33 O rîu gîtambaa kîrîa gîacuurîîtue kîûrûûne ndeene kîratambûka kuuma îgûrû mwanka nthî, biraa biîrî. Nthîgûrû îrainaina na maiga jaratûkanga, 52na tûbûri tûrakunûka na mîîrî ya antû babaingî barîa baakuîre barî babaagîru îrariûkua. 53Jesû akûriûka, antû bau baariûkîrue barauma tûbûriine, na bareeta ntûûreene întheru, na antû babaingî baraboona.

54Rîrîa mûtongeeria wa asikarî amwe na asikarî barîa baakarîtie Jesû, baigîrue nthîgûrû îkinaina na boona ûrîa gwakarîkîre, nî baigîrue ûguaa mono na barauga, “Gûtî nkaanja atî muntû ûûjû araarî Mûtaana wa Mûrungu.”

55 # Luk 8.2-3 Ningî nî kwaarî na eekûrû babaingî baategerete barî kûraaja. Bau nîbo baarî bakûmûthingata kuuma Galili nîkenda bamûtumîkîra. 56Bamwe ba eekûrû bau baarî Maria Magidalina, na Maria ng'ina wa Jakubu na Josefu amwe na ng'ina wa ataana ba Zebedii.

Kûthikwa kwa Jesû

(Mar 15.42-47; Luk 23.50-56; Joh 19.38-42)

57Gwakinya ûgoro gîtonga kîmwe gîetagwa Josefu, kuuma ntûûreene ya Arimathea, nî gîaakinyîre. Kinya kîo kîaarî mûritwa wa Jesû. 58Josefu ûu nî eetîre kîrî Pilatû na araromba eetîkîîrue ajûkie mwîrî jwa Jesû. Rîu Pilatû ararita waatho atî eetîkîîrue ajûkie mwîrî jûu. 59Josefu arajûjûkia na arajûkûûnja na chuka înjerû ya bamba, 60na arajwîka kabûriine kaawe karîa eenjîte iigeene na gatarî gagûtumîrwa. Rîu araingiritia iiga rîrînene arakûnîka kabûri narîo na araciîtîra. 61Maria Magidalina na Maria ûrîa ûngî nî baakari nthî bategeete kaburi.

Mûkaria wa kaburi

62Athînjîri-Mûrungu barîa anene na Afarisayo nî beetîre gûcemania na Pilatû, rûûnene, kûrî ntukû ya sabatû. Beeta baramwîra, 63#Mat 16.21; 17.23; 20.19; Mar 8.31; 9.31; 10.33-34; Luk 9.22; 18.31-33 “Mwathi weetû, nî tûkûririkana mwaaîrania ûrîa nî aaugîre aarî mwoyo atî, ‘Nyuma ya ntukû ithatû akariûka.’ 64Tontû bûû, rita waatho atî kaburi gakarue bwega mwanka ntukû ya ithatû nîkenda aritwa baawe batîkeeje kwiya mwîrî jwaawe na beera antû atî nî arariûkîre kuuma kîrî akuû. Ûrongo bûu bûkeethîrwa bûrî bûbûthûûku nkûrûki ya bûrîa bwa mbere.” 65Pilatû arabeera, “Nkûbûa asikarî ba gûkaria; karieni kaburi bwega ûrîa bûkoomba.” 66Tontû bûû, bareeta na bareekîra rwaano iigeene rîrîa rîaingîte kaburi. Rwaano rûu rwarî rwa gûteetheeria kûmenya këethîra iiga rîu rîkûritaritwa o. Ningî baratiga asikarî bakaria kaburi kau.

Currently Selected:

Mat 27: KIMERUBIBLE

Highlight

Copy