Mat 24
24
Jesû kwaria mantû jegiî kûmomorwa gwa kîûrû
(Mar 13.1-2; Luk 21.5-6)
1Rîrîa Jesû aaumagarîre kîûrûûne akîendaga gwîta, aritwa baawe nî baamwonerie nyomba irîa ciaagwateene na kîûrû. 2Jesû arabeera atîrî, “Îî, nî nkwona. Buî nî bûgûcîona? Ndîbwîra na mma atî, gûtî iiga kinya rîmwe rîaacio rîgatîgwa rîrî îgûrû rîa rîngî.”
Thîîna na mîthangîko
(Mar 13.3-13; Luk 21.7-19)
3Rîrîa Jesû aakarîre nthî kîrîmeene kîa Mîzeituni, aritwa baawe nî beetîre kîrî we barî bonka na baramwîra, “Twîre rîrîa mantû jaja jakathithîka, na ûtwîre nî rwano rûrîkû rûkoonania rîrîa ûkeeja kaîrî na rîrîa mûthia jwa nthîgûrû jûgakinya.” 4Jesû arabacokeria, “Imenyagîîreni bûtîkeeje kwaîrua nî muntû kinya ûrîkû. 5Antû babaingî bakeeja bakîgwetaga riîtwa rîaakwa bakiugaga atî nîbo Mesia. Nabo bakaaîria antû babaingî. 6Bûkaigua nî gûkûrûûwa ndwaa akuî na kinya kûraaja, îndî bûkámaka. Mantû ta jau no mwanka jakarîke, îndî mûthiro jûtîrakinya. 7Nthîgûrû îkarwaa na îngî, na ûnene bûrwee na bûngî. Gûkeethîrwa kûrî na mpara na kwinaina kwa nthîgûrû gûntû gûkwingî. 8Mantû jaja jonthe jakeethîrwa jakari ta mûrîmo jûrîa mûka aigagua mbere ya agîa na mwana.
9 #
Mat 10.22
“Îgiita rîu bakabûnenkanîîria bûthangîkue na bûûragwe. Bûkathûûrwa nî antû bonthe nîûntû bwa riîtwa rîaakwa. 10Ningî nî babaingî bagatîga gwîtîkia Mûrungu, na baambîîrie gûkunyananîra na kûthûûrana bongwa. 11Iroria bibingî bia ûrongo bikeeja nabio bikaaîria antû babaingî. 12Ûthûûku bûkaingîa na bûtûme wendo bwa babaingî bûnyiie. 13#Mat 10.22 Îndî ûrîa ûkomîîria mwanka mûthia nîwe ûkoonokua. 14Ningî Nteto Injega cia Ûnene bwa Mûrungu igatûmîîrua nthîgûrûûne yonthe irî ûkûûjî kîrî mîgongo yonthe. Rîu mûthiro jwa nthîgûrû jûgakinya.
Mîthangîko îmingî na îmîthûûku mono
(Mar 13.14-23; Luk 21.20-24)
15 #
Dan 9.27; 11.31; 12.11 “Rîrîa bûkoona gîntû kîrîa Mûrungu athwîre, taju mûrungu jwa mûng'uanano, jweekwa kîûrûûne o ta ûrîa kîroria Danieli augîre, (ûrîa ûkûthoma nî aciûre). 16Îgiita rîu barîa barî Judea nî bamatuke irîmeene. 17#Luk 17.31 Ûrîa ûrî îgûrûgûrû rîa nyomba akéenama kûjûkia gîntû nyomba yaawe. 18Ûrîa ûrî muundeene agácoka nyomba kûjûkia nguû yaawe. 19Wûûi kîrî aka barîa bakeethîrwa barî baarito na kîrî barîa bakeethîrwa bagîonkagia îgiiteene rîu. 20Rombeeni Mûrungu nîkenda îgiita rîrîa bûkamatûka rîtîkeethîrwe rîrî rîa mpio kana rîîthîrwa rîrî ntukû ya sabatû. 21#Dan 12.1; Kûg 7.14 Nîkwîthîrwa îgiita rîu gûkeethîrwa kûrî na mîthangîko îmingî na îmîthûûku mono, ûntû îtoonekana kaîrî kuuma rîrîa nthîgûrû yoombîrwe mwanka nandî, na îtîkoronekana kaîrî. 22Këethîra Mûrungu atîthîrwa akuîîtie îgiita rîu, gûtî muntû ûkonoka. Îndî Mûrungu agakuîîa îgiita rîu nîûntû bwa antû barîa athuurîte. 23Îgiiteene rîu muntû akëeja kûbwîra: ‘Mesia arî aja’ kana akabwîra, ‘Mesia arî aarîa,’ bûkámwîtîkia. 24Nîkwîthîrwa Mesia ba ûrongo na iroria bia ûrongo bikeeja. Bikariinga biama bibinene na bathithie mantû ja kûrigaria nîkenda këethîra kwombîka batûma antû barîa Mûrungu athuurîte bangaratana wîtîkioone bwaao. 25Thikîîreeni, ndabwîra mantû jaja mbere ya jakarîka. 26#Luk 17.23-24 Tontû bûû, bakëeja kûbwîra, ‘Mesia, arî rwanda,’ bûgeteni nao; ningî bakëeja kûbwîra ‘Arî nyomba cia ndeene,’ bûgéetîkia ûntû bûu. 27Nîkwîthîrwa Mûtaana wa Muntû akeeja oonewe kunthe o ntûti, o ta ûrîa rweni rwenagîria bwa gaiti, na o ntûti rûkoonerwa bwa rûgûrû. 28#Luk 17.37 Arîa kiimba kîrî, nîo nderi ciûthûranaga.
Kwîja kwa Mûtaana wa Muntû
(Mar 13.24-27; Luk 21.25-28)
29 #
Isa 13.10; 34.4; Ezek 32.7; Joe 2.10; 3.4; 3.15; Kûg 6.12-13 “Îgiita rîa mîthangîko rîathîra o rîo, riûa rîkaaga weerû kûgîe muundu, na mweri jûtige kûthaara na njota igwe kuuma îgûrû, na bingî birîa bikaraga îgûrû biinainue. 30#Dan 7.13; Zek 12.10-14; Kûg 1.7 Rîu nîrîo rwano rwa Mûtaana wa Muntû rûkoonekana îgûrû, na antû bonthe ba nthîgûrû bakaithikîîra rîrîa bakoona Mûtaana wa Muntû enamîte arî îgûrû rîa matu, arî na inya na mwago jûmûnene. 31Tarumbeta îkaringwa îgambe na kajû gakanene na atûme araîka baawe boothûranie antû bonthe barîa Mûrungu athuurîte kuuma nthîgûrûûne yonthe.
Ûritani kuumania na mûkûû
(Mar 13.28-31; Luk 21.29-33)
32“Rîu iritaneeni kuuma kîrî mûkûû: O rîrîa mpang'i ciaaju ciambagîîria kûtheûka, na mabûûra jakambîrîria kûriiba nî bûmenyaga atî, thano îrî akuî. 33O ûu naabuî rîrîa bûkoona mantû jaja jonthe jakarîka, bûmenye atî Mûtaana wa Muntû arî akuî mono. 34Ndîbwîra na mma atî, nthukî îîjî yonthe îtîthira mantû jaja jonthe jatîrakarîka. 35Îgûrû na nthî bikathira, îndî nteto ciaakwa igatûûra kenya na kenya.
Gûtî muntû wiijî ntukû kana thaa irîa Mûtaana wa Muntû akeeja
(Mar 13.32-37; Luk 17.26-30,34-36)
36“Gûtî muntû wiijî ntukû kana thaa irîa mantû jaja jagakarîka. Araîka na kinya Mûtaana batiijî îndî nî Baaba wenka wiijî. 37#Kîam 6.5-8 Rîrîa Mûtaana wa Muntû akeeja gûkeethîrwa gûkari ta ûrîa gwakari îgiita rîa Noa. 38Mbere ya ngai ya maburiko yuura, antû nî barîîjaga na bakanyua, na bakagûrana na bakagûrwa, mwanka ntukû îrîa Noa aakûrûkîre sabineene. 39#Kîam 7.6-24 Antû batamenyaga jarîa jeetaga na mbere, mwanka rîrîa mûguû jweejîre jûrabakondoria bonthe. O ûu nîu gûgakara rîrîa Mûtaana wa Muntû akeeja. 40Îgiita rîu antû baîrî bakeethîrwa bakîrîmaga muundeene, ûmwe ajûkûe na ûngî atîgwe. 41Aka baîrî bakeethîrwa bakîthiaga, ûmwe ajûkûe na ûngî atîgwe. 42Tontû bûû, kareni bwithuranîrîte, nîûntû bûtiijî ntukû îrîa Mwathani weenu agacoka. 43#Luk 12.39-40 Îndî menyeni atî, këethîra mwene nyomba nî ethagîrwa akîmenyaga thaa irîa mwamba akeeja, atîmama, na atîrekeeria mwamba auna nyomba yaawe. 44Tontû bûû, kinya buî kareni bwithuranîrîte nîkwîthîrwa Mûtaana wa Muntû akeeja thaa irîa bûtîmwîrîgîrîte.”
Nthûûmba îrîa mbîtîkua na îrîa îtî mbîtîkua
(Luk 12.41-48)
45Jesû areeta na mbere kûbeera, “Nthûûmba îrîa mbîtîkua na înjûme nî îrîkû? Nî îrîa mûnene waayo aethetie mûrûngamîîri wa bangî, abaejage biakûrîa îgiita rîrîa rîagîrîte. 46Kûgwîrua nî kîrî nthûûmba îîu, këethîra mwathi waayo rîrîa agacoka, akamîîthîra îkîritaga ngûgî o îîu. 47Ndîbwîra na mma atî akaethia nthûûmba îîu mûrûngamîîri wa into biaawe bionthe. 48Îndî nthûûmba îîu îkëethîrwa îrî îmbîî, îgacîîra yongwa atî, ‘Mwathi waakwa agakara îgiita rîrîraja atîracoka.’ 49Rîu akaambîrîria kûûra nthûûmba irîa arûngamîrîte, na akaambîrîria kûrîa na kûnyua arî amwe na oogiti bangî. 50Mwathi waayo akeeja ntukû na thaa irîa îtîmwîrîgîrîte. 51Mwathi ûu akamîkanûkia bûbûuî, na amîgere kûrîa aciayia bakeethîrwa barî. Kûu bagakaraga bakîrîraga na gûkabakaba maîgo.
Currently Selected:
Mat 24: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
