Mat 18
18
Ûrîa mûnene nkûrûki ya bangî Ûneneene bwa Îgûrû
(Mar 9.33-37; Luk 9.46-48)
1 #
Luk 22.24
Îgiiteene o rîu aritwa nî beetîre kîrî Jesû na baramûûria atîrî, “Nûû mûnene nkûrûki ya bangî bonthe Ûneneene bwa îgûrû?” 2Rîu Jesû areeta kaana kaniini na karî au mbere yaao, 3#Mar 10.15; Luk 18.17 arabeera, “Ndîbwîra na mma atî bûkarega kûgarûka bûkara ta twaana tûniini, bûtîkorokûrûka Ûneneene bwa îgûrû. 4Ûrîa ûkainyiiyia akare ta kaana gaka, nîwe mûnene nkûrûki ya bangî bonthe Ûneneene bwa îgûrû. 5Ûrîa ûgwataga kaana ta gaka ûgeni, nîûntû bwaakwa, nî ni agwataga ûgeni.”
Gûtûma bangî bagerua kûthithia meeyia
(Mar 9.42-48; Luk 17.1-2)
6“Îndî ûrîa ûgatûma ûmwe wa baba baanini barîa bambîtîkîtie beeyia, bûrîngîagîra muntû ta ûu akaogeerwa iiga rîrînene nkingo na akagerwa îrieene ndeene buru. 7Wûi kîrî nthîgûrû nîûntû bwa magerio jarîa jatûmaga antû beeyia! Magerio ta jau no mwanka jeeje, îndî wûi kîrî muntû ûrîa ûtûmaga jeeja! 8#Mat 5.30 Njara yaaku kana kûgûrû gwaaku gûkëeja gûtûma ûthithia meeyia, kûgiite na ûgûte. Nî kaaba gûkûrûka ûtûûroone bwa kenya na kenya ûtî na njara îmwe kana kûgûrû kûmwe nkûrûki ya kûgerwa mwankiine jwa kenya na kenya ûrî na njara cio-ijîîrî kana magûrû jo-jaîrî. 9#Mat 5.29 Riitho rîaaku rîgatûma ûthithia meeyia, rîkûûre na ûrîte. Nî kaaba gûkûrûka ûtûûroone bwa kenya na kenya ûtî na riitho rîmwe, nkûrûki ya ûgerwa mwankiine jwa kenya na kenya ûrî na meetho jo-jaîrî.”
Ngerekano ya ng'ondu îrîa yaûrîte
(Luk 15.3-7)
10“Menyeereeni bûtîkeeje gûtengûra ûmwe wa baba baniini. Ndîbwîra na mma atî kûu îgûrû araîka baabo beethagîrwa barî mbere ya Baaba magiita jonthe. [ 11#Luk 19.10 Nîkwîthîrwa Mûtaana wa Muntû eejîre gûcwaa na kwonokia barîa baûrîte.]#18.11 Maandîko jamwe jatî na gîchunchî gîkî. 12Û mbîreeni! Muntû akëethîrwa arî na ng'ondu îgana rîmwe, na îmwe yaacio îkaûra rî, athithagia atîa? Tîka atigaga ng'ondu iu ingî mîrongo kenda na kenda kûû irîmeene na ageeta gûcwaa îrîa yûûrîte? 13Ndîbwîra na mma akëeja kûmîona nî agwîragua mono nkûrûki ya ûrîa agwîragîrua iu ingî mîrongo kenda na kenda irîa itîkûûrîte. 14O ûu nîu Abaagu weenu ûrîa ûrî îgûrû atîendaga kinya ûmwe wa barîa baniini baûra.”
Gûcokanîîra kaîrî na ûrîa ûkwîîrîtie
15 #
Luk 17.3
“Muntû akëeja gûkwîîria, îta kîrî we ûmwîre ûrîa akwîîrîtie bûrî bu-baîrî. Akëeja gûkûthikîîra, ûkûmûteethia. 16#Kûr 19.15 Îndî akarega gûkûthikîra, îta wîte muntû ûmwe kana baîrî wîte nabo bwarie na muntû ûu nîkenda nteto cionthe imenyewa bwega. 17Arega kûbûthikîîra, menyithieni kanisa. Ningî arega kûthikîîra kanisa, mûriteeni ngwatanîroone yeenu akare ta muntû ûrîa ûtiijî Mûrungu kana ta mûritithia ûgoti.
Kûrega kana gwîtîkîîria ûntû
18 #
Mat 16.19; Joh 20.23 “Ndîbwîra na mma atî kîrîa bûkaregana nakîo aja nthîgûrû gîtîtîkîîrua îgûrû, na kîrîa bûgetîkîîria aja nthîgûrû gîgetîkîîrua îgûrû. 19Ningî ndîbwîra atî antû baîrî bakëeja gwîtîkanîîria barombere ûntû kinya bûrîkû aja nthîgûrû, Baaba ûrîa ûrî îgûrû akabathithîria ûntû bûu. 20Nîkwîthîrwa arîa antû baîrî kana bathatû boothûranaga nîûntû bwa riîtwa rîaakwa nî mbîthagîrwa ndî amwe nabo.”
Ngerekano ya kûritana ûrîa muntû abuîri kûrekera ûngî
21 #
Luk 17.3-4
Rîu Peterû areeta kîrî Jesû aramûûria, “Muntû abuîrîte kûmbîîria magiita jang'ana nkîmûrekagîra? Nî maita mûgwanja?” 22Jesû aracokia arauga, “Ntîkwîra ûmûrekere marekera mûgwanja akî, îndî ndîkwîra ûmûrekagîre marekera mîrongo mûgwanja mainda mûgwanja.
23“Tontû bûû, Ûnene bwa îgûrû bwoomba kung'uananua na mûnene ûrîa waugîre ka oone ûrîa nthûûmba ciaawe ciaritîthîtie mbeecha ciaawe ngûgî. 24Rîrîa ambîrîrie kûthithia ûû muntû ûmwe waarî na îrandû rîa milioni inyingî buru nî aikîrue kîrî we. 25Nawe muntû ûu ataarî na mbeecha cia kûrîaa îrandû rîu. Tontû bûû, mwathi waawe ararita Waatho atî nthûûmba îîu amwe na mwekûrû na twaana na into biaawe bionthe biendue nîkenda îrandû rîrîîka. 26Rîu nthûûmba îîu îratûria maru mbere ya mwathi waayo na irauga, ‘Itû mbigîîrua kîaao na ûmpe kaanya, naani ngakûrîaa îrandû rîonthe.’ 27Mûnene ûu aramwigîîrua kîaao na aramûrekera îrandû rîu na aramûrekeeria araciîtîra. 28Îndî nthûûmba îîu yauma au, îratirimana na nthûûmba îngî, îrîa yaarî na îrandû rîaayo rîa mbeecha inkai. Nthûûmba îîu îragwata îîu îngî nkingo na arambîrîria kûmiita akîmîîraga, ‘Ga ûkandîaa îrandû rîaakwa!’ 29Nthûûmba îîu yaagwati îraturia maru îramwerenca îkiugaga, ‘Itû mbigîîrua kîaao na ûmpe kaanya, naani ngakûrîaa îrandû rîonthe.’ 30Îndî ararega kûmiigîîrua kîaao na aramîîka ncheera mwanka rîrîa îkarîa îrandû rîonthe. 31Rîrîa nthûûmba ingî cionere ûntû bûu nî ciaigîrue bûbûûî mono na ireeta iramenyithia mwathi waacio ûrîa gwakarîkîte. 32Rîu mûnene areeta nthûûmba îîu, na aramîîra, ‘Gwe ûrî muntû ûmûûî mono! Nî waamberencere, naani ndîrakûrekera îrandû rîaaku rîonthe. 33Ga ûtîkûbuîrîte kwigîrua nthûûmba îngî kîaao ta ûrîa ndakwigîîrue?’ 34Tontû bûû, mûnene ûu arathûûra mono, na ararita Waatho atî nthûûmba îîu îgerwe ncheera mwanka rîrîa îkathiria kûrîaa îrandû rîonthe. 35Ûu nîu Baaba ûrîa ûrî îgûrû akathithîria o muntû wonthe ûrîa ûtîrekera muntû ûngî na nkoro yaawe yonthe.”
Currently Selected:
Mat 18: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
