LIRAANGA 9
9
Nyasaye Yakhola Lilakano na Nuhu
1Nyasaye yakasitsa Nuhu nende vaana veve, navavoolela, “Mwivulane mu vunyishi, khandi mu limenya shia havundu hosi khulilova. 2Tsinyama tsiosi, manyonyi koosi ku mwikulu, vilombe viosi vimolanga hasi khulilova, nende tsisutsi tsiu mu inyanza viliitsa khumuria munyi. Mali khumuha vunyali vu khuviamiha. 3Shia shilombe shiosi shili mwoyo, khandi shichendanga viliitsa khuva shiukhulia shienyu; khuli namuha viraakwa khuva shiukhulia shienyu. 4Navutswa muvuli khulia inyama ilimu nu musahi, shichila vulamu vuli mu musahi. 5Niiva mundu aliitsa khwiira weshie, naye aliitsa khwiirwa. Niiva shia inyama yosi iliitsa khwiira, mundu khutukha aliitsa khwiirwa.
6Mundu uliitsa khusuundula shisahi shiu mundu,
khali ye aliitsa khusuundulwa shisahi shieshie;
shichila Nyasaye yalomba mundu likoondo lielie mwene.
7Mwivulane mu vanyishi,
mwivulane mu vunyishi mwitsule shia havundu hosi khulilova.”
8Nalwo lwa Nyasaye yavoolela Nuhu nende vaana veve, 9“Kholanga lilakano lianje na munyi nende vitsukhulu venyu, 10ni vilombe viosi vili mwoyo, manyonyi koosi nende tsinyama tsiosi, nende shia shindu shiosi shia mwarula nashio mu liaro. 11Kholanga lilakano lianje na munyi, ndi niitsa khulekha khutivitsakhu khandi vandu mu shivala ni michelelo chia matsi.” 12Nyasaye yavoola, “Yishi nashio shimanyilu shi lilakano lianje, lia kholanga hakari henyu nende inzi, halala ni vilombe vili mwoyo viosi via muli navio, lilakano lia matukhu koosi kaliitsa khuvaho. 13Mbikhanga luheembo lwanje lwi imbula mu malesi; khandi nalwo uliitsa khuva shimanyilu shi lilakano hakari hanje nende vandu mu shivala. 14Lwa khunikha likulu na malesi, luheembo lwi imbula luliitsa khulolekha, 15niitsa khwitsushitsa lilakano lianje nivi khandi tsinyama tsiosi ndi michelelo chia matsi shichiliitsa khwiira vilombe viosi vili mwoyo tawe. 16Lwa luheembo lwi imbula luliitsa khulolekha mu malesi, niitsa khululola khandi nzitsushitse lilakano li mihika ni mihika hakari hanje nende vilombe viosi vili mwoyo mu shivala.” 17Nyasaye yavoolela Nuhu, “Yishi nashio shimanyilu shi lilakano lia kholi hakari hanje nende vilombe viosi vili mwoyo mu shivala.”
Nuhu nende Vaana Veve
18Vaana va Nuhu vali nivaruli mu liaro vali Shemu, Hamu nende Yafetsa. Hamu neye wivula Kanaani. 19Vaana vavaka va Nuhu yava, navo vakuuka va vandu voosi mu shivala.
20Nuhu yali mundu mulimi, khandi nava mundu wu khuraanga khuraaka misabibu. 21Lwa yali niyakhang'wa idivai, yatanda, nakona shekenye mu liheemo lielie. 22Lwa Hamu, wivula Kanaani, yalola tata wewe nali shekenye, yasimukha natsia ilwanyi khuvoolela vamwavo veve vavili. 23Navutswa Shemu nende Yafetsa vavukula inguvu, nivachivikha vushiama khu maveeka kavo; vinjila mu liheemo shiu mukongo nivavimba shekenye shia tata wavo. Vali vaheenzi iluveka wundi, khwenya khuvula khulola shekenye shia tata wavo. 24Lwa Nuhu yali niyakhalava tsimoni, khandi naloli ka mwana wewe mutititi yali nakholi, 25yavoola,
“Shilaamo shikwili Kanaani!
Aliitsa khuva murukwa wa vamwavo veve.
26Nuhu yavoola khandi,
‘Mwami Nyasaye, uli Nyasaye wanje akasitse Shemu!
Kanaani ave murukwa wewe.’
27Nyasaye avambalitsi lusomo lwa Yafetsa,
Yafetsa amenye mu maheemo ka Shemu,
Kanaani ave murukwa wewe.”
28Lwa matukhu ka michelelo chia matsi kali nikakhavira, Nuhu yamenya mihika tsimia tsivaka na makhomi karanu; 29khandi nakhutsa nali ni mihika tsimia tisa na makhomi karanu.
Currently Selected:
LIRAANGA 9: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
