LIRAANGA 8
8
Matsi Kakhaama
1Nyasaye yitsushitsa Nuhu ni tsinyama tsia yali natsio mu liaro. Nyasaye yachila vushindu nu vuhuutsa, matsi nikaraanga khukhaama. 2Nyasaye yikala virula via matsi khulilova nende malesi, viachilanga imbula nikhuva khandi nikatukha; 3ma matsi nikatsililila khukhaama kalaha khumatukhu imia indala na makhomi karanu. 4Khulitukhu li likhomi na saba liu mweli wa saba, liaro liasinjila nilihulushila khu Shikulu shia Ararati. 5Matsi katsililila khukhaama kalaha; khulitukhu liu khuraanga liu mweli kwi likhomi, ha vutoonje hi vikulu haranga khulolekha.
6Matukhu makhomi kane nikakhavira, Nuhu yikula litirisha lia yali niyalomba khu liaro, 7naruma linyonyi lialaangwangwa lidutu. Liapulukha nilitsia mu tsimbeka tsiosi, khutukha lwa matsi kakhaama khulilova. 8Khulwa yako, Nuhu yaruma shituti khutsia khulola, niiva matsi kakhaami khulilova. 9Navutswa shituti shiavula ha shiseena vilenje, shichila matsi kali nikashiremeele shia havundu hosi khulilova. Shiakalukha khu Nuhu wali nali mu liaro. Nuhu yanyiila mukhono kwekwe nakumila shituti tsana, niyinjila nashio mu liaro. 10Nuhu yalilindilila khumatukhu kandi saba, naruma shituti ilwanyi khurula mu liaro. 11Shituti tsana shiakalukha khuye halukolovo, nishili ni lisambu lishili liviisi mu munwa kwashio. Nalwo lwa Nuhu yamanya ni kilikali ndi matsi kamali khukhaama khulilova. 12Nuhu yalinda khumatukhu kandi saba, naruma shituti, navutswa shituti shienesho shi shiakalukha khuye tawe.
13Lwa Nuhu yali nali ni mihika tsimia sita nu muhika mulala, khulitukhu liu khuraanga liu mweli ku khuraanga, matsi kakhaama khulilova. Nuhu yasambula shindu shia khunikhanga ikulu khu liaro, naheenza iyi neyo, nalola khuli shivala shiumi. 14Khulitukhu lia makhomi kavili na saba liu mweli wa khavili, shivala shiali shiumi shia havundu hosi.
15Nyasaye yavoolela Nuhu, 16“Rula mu liaro halala nu mukhali wowo, vaana vovo vi shiyayi, nende vakhali vavo. 17Rulitsa ilwanyi manyonyi nende tsinyama tsiosi, khu vivulane nu khulanda shia havundu hosi khulilova.” 18Khulwa yako, Nuhu yarula mu liaro, nende vaana veve vi shiyayi, mukhali wewe nende vakhali va vaana veve vi shiyayi. 19Tsinyama tsiosi nende manyonyi koosi viaroonjela khurula mu liaro, mu vituma khulondokhana khu tsikavila tsiatsio.
Nuhu Yakholela Mwami Nyasaye Musango
20Nuhu yumbakha vwaali vu Mwami Nyasaye; yavukula shia inyama indahi khulondokhana khu mulukha nende linyonyi, nasamba viosi, khuli shihanwa shiu khusambwa khu vwaali. 21Mwayu kwahuunyanga nu kutuuma khurula khu musango kwayaanzitsa Mwami Nyasaye. Mwami Nyasaye navoola mu mwoyo kwekwe, “Litukhu lindi livulakhuho, lia niitsa khulaama lilova, khulondokhana khu makhuva ku mundu akholanga; shichila vindu vitamanu, navio via mundu akanakananga nashili muvukha. Shiniitsa khumululakhu vilombe vili mwoyo khuli kholi tawe. 22Lwa shivala shishitsilililanga khuvaho, khuliitsa khuvetsanga ni tsinyinga tsiu khuraaka nu khuchesa, matukhu ku vushindu nende luya, matukhu ki shimiyu nende imbula, mbasu nu vutukhu.”
Currently Selected:
LIRAANGA 8: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
