ROMANIK 7
7
Kaborunet ne bunu katunisiet
1Anan mongen okwek, che kitupche (amu ang’alaljini bik che ingen Ng’atutiet), ole tinyei ng’atutiet bounatet eng’ chito eng’ betusiek tugul che bo sobennyi? 2Amu kobogoriot ne tinyei manong’otiot koratei ng’atutik eng’ manong’otiot eng’ betusiek tugul che bo sobennyi; ago ngo me manong’otiot, kotiagak anyun eng’ ng’atutietab manong’otiot. 3Noto anyun, ye ta kosobei manong’otiot, ak konamgei ak chito age, keguure inendet chebaigeiyat: ago ngo kagome manong’otiot, kotiagak eng’ ng’atutiet, eng’ noto anyun, ko ma keguure chebaigeiyat, agot ngotun chito age inendet. 4Noto anyun, che kitupche, kigeyaak obegu eng’ Ng’atutiet eng’ bortab Kristo; si kobiit obunji chito age, inendet ne kiging’eet komong’une che kibek, si keiichi Jehovah logoek. 5Amu ye kingota kemi eng’ borto ko kiboisiei magutik che bo tengek eng’ kebeberwekab borwekyok, che kimi amu Ng’atutiet, si koiiyo logoek che ityin meet. 6Ago nguno, ko kigitiachech eng’ Ng’atutiet, ko kagebekyi noto ne kiga ratech; si kobiit keotisie eng’ leelindab Tamirmiriet, ma eng’ osindab ng’atutik che sirotin.
Ng’atutiet ak tengekto
7Kimwae nee anyun? Tos tengek Ng’atutiet? Achicha, ma u noto. Ago kima kota anae tengek nda kima ko eng’ Ng’atutiet: amu kima kota anai kasetab miat nda kima mwa Ng’atutiet kole, Amegase miat: 8ago kinyor tengek boroindo eng’ ng’atutiet koyai eng’ ane kasetab miat age tugul: amu ye mami Ng’atutiet ko meat tengekto. 9Ak kiasobe eng’ tai ye kima komi Ng’atutiet: ago ye kingonyo ng’atutiet, kosob kogeny tengekto, amee anyun; 10ak kiageer ale kibunji meet ng’atutiet ne ki bo sobondo: 11amu kinyor tengek boroindo eng’ ng’atutiet kong’ala, ak kobara eng’ noto.
12Noto anyun tilil Ng’atutiet, ak ko tilil kayomiset, ak ko bo imanda, ak ko mie. 13Tos kiek anyun noto mie meet eng’ ane? Achicha, ma u noto. Ago si koborgei tengekto kele tengekto, ko kiyai meet eng’ ane eng’ noto mie; - si kobiit koek tengekto tengekto inne eng’ ng’atutiet.
Bo kebeberwek aeng’ biteetab chito
14Amu kingen kele bo Ng’atutiet tamirmiriet: ago a chitab borto, ne kigealdochi tengek. 15Amu mangen ne ayae: amu ma ne amache, ne ayae; ago ne aweche, ko noto ne ayae. 16Ago ngayai noto mamache, ayan anyun ale mie Ng’atutiet. 17Nguno anyun ko ma ko ane ne ayae, ago tengekto ne menya. 18Amu angen ale eng’ ane, noto ko eng’ bortanyu, ko mamenyei kiy ne mie: amu mi chamet kobota, ago ale ayai noto mie, ko mayae. 19Amu noto mie ne kata ayae, ko mayae: ago yaitiet ne mamache, ko noto ne cham ayae. 20Ago ngot ayae ne mamache, ko ma ko ane ne yaei, ago tengekto ne menya.
21Ageere anyun ng’atutiet, ale, eng’ ane, ne kata ayae ne mie, komitei yaitiet kobota. 22Amu abaibai eng’ Ng’atutietab Jehovah eng’ chito ne bo orit: 23ago ageere ng’atutiet ne ter eng’ kebeberwekab bortanyu, kobortos ak ng’atutietab ng’omnatennyu, koyaa aek luulenetab ng’atutiet ne bo tengekto ne mitei kebeberwekab bortanyu. 24Ee, ane ne nyalili! Ng’o ne itiacha eng’ bortab meoni? 25Amwachini Jehovah kongoi eng’ Jesu Kristo Kiptaiyandennyo. Noto anyun, aote eng’ ng’omnatennyu Ng’atutietab Jehovah, ago eng’ borto aote ng’atutikab tengekto.
Currently Selected:
ROMANIK 7: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
