ROMANIK 3
3
Kewoljin bik che teepsei
1Tinyei borot nee anyun Yahudiot? Anan nee toretet ne bo kamuratanet? 2O eng’ oret age tugul: ne bo tai, ko amu kigigochi Yahudik kotononji ng’alekab Jehovah. 3Amu egu nee ngot ko matinyei alage kayanet? Kayanenywa ne mami, ko tos walei imandab Jehovah koek buch? 4Achicha: ma u noto: ingoek ne bo iman Jehovah, ago kiplembechwa chi age tugul; ko u ye sirat kole,
Si kobiit kindein imanda eng’ ng’aleguk,
Ak imuch ibelisie ye kiruogun.
5Ago ngot kogonyiti atebennyo ne ma bo imanda, imandab Jehovah, ko ta kemwae nee anyun? Tos ma bo imanda Jehovah ne nyonei eng’ neregek? (Ang’alali ko u bik.) 6Achicha: ma u noto: amu nda u noto koruokyindoi ano Jehovah ng’ony?
7Ago ngo tesak imanitab Jehovah eng’ lembeitanyu agoi torornatennyi, ko amu nee si ko ta kiruokwa ko u kiptengekyo? 8Ak amu nee si magimwa (ko u ye kimwaitaenech ne ya, ak ko u ye iyani alage kole kimwae achek) kele, Ongeyai che yaach si kobiit kobwa che miach? Bo iman kiruogenywa.
Bo chi age tugul tengek
9Nee anyun? Tos ki miachen kesiir ichek? Achicha, agot kitigin: amu kiga kisib kiityi Yahudik ak Yunanik kele mi ichek tugul eng’ bounatetab tengekto; 10ko u ye sirat, kole,
Mami ne bo imanda, achicha, mami agot agenge:
11Mami ne iguitos,
Mami ne cheng’ei Jehovah;
12Kigomasta tugul, kigoek tugul che matilei kiy;
Mami ne yaei ne mie, achicha, mami agot agenge:
13Mokwekwak ko kererit ne yatat;
Kiboisie kenisiet eng’ ng’elyebwekwak:
Mi ng’wonetab erenok kutuswekwak orit:
14Che nyiitat kutuswekwak chubisiet ak ng’wanindo:
15Chepcheb kelyekwak kotumda korotik;
16Mi ortinwekwak ng’emisiet ak nyalilda;
17Ama nai oretab kalyet:
18Mami kaiyweisiet ne iywei Jehovah taitab konyekwak.
19Ak kingen kele tuguk alak tugul che mwaei Ng’atutiet, komwachin ichek che mitei eng’ bounatetab Ng’atutiet; si kobiit keger kutit age tugul, ak si kimutyi ng’ony komugul kiruogetab Jehovah: 20amu mami chi ne kiityin imanda eng’ tainnyi eng’ boisionikab Ng’atutiet: amu bunu naetab tengekto Ng’atutiet.
Kinyoru imanda eng’ kayanet eng’ Krsto
21Ago nguno ko kagong’ang’ak imandab Jehovah ama eng’ ng’atutik, ne baoriani Ng’atutiet ak maotik; 22agot imandab Jehovah ne mi eng’ kayanet eng’ Jesu Kristo eng’ icheget tugul che iyani; amu mami kabesiet; 23amu kigoyai tugul tengek, ama ityin torornatetab Jehovah; 24che kiityin imanda buch eng’ mieindanyi eng’ katiaget ne mi eng’ Kristo Jesu: 25ne kiinde Jehovah koek kaptisisio eng’ kayanet, eng’ korotikyik, si kobarta imandanyi, amu kachundaetab tengekwogik che kigisib keyai, eng’ muitaetab Jehovah; 26amu kabartaetab imandanyi eng’ betusiechuto, si kobiit koek inendet ne bo imanda, ak koek ne iityin imanda inendet ne tinyei kayanet eng’ Jesu.
27Mi ano anyun kachaunetab ge? Kigegerji sang’. Eng’ ng’atutiet ne u nee? Ne bo boisionik? Achicha: ago eng’ ng’atutietab kayanet. 28Kiiti anyun kele kiityin chi imanda eng’ kayanet ama boisionikab ng’atutik. 29Anan Jehovah ko Jehovah ne bo Yahudik kityo? Ama Jehovah ne bo Bororiosiek agichek? Ee, bo Bororiosiek agichek: 30ko u ye agenge Jehovah, ak koiityin imanda eng’ kayanet che kigimuratan, ak koiityin imanda eng’ kayanet che ma kimuratan. 31Tos kiyai anyun Ng’atutiet koek ne matilei kiy amu kayanet? Achicha, ma u noto: kigimiti Ng’atutiet.
Currently Selected:
ROMANIK 3: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
