ROMANIK 16
16
Kagatosiekab Paulo inegei
1Kande eunekwok Poibe ne kitupche ne cheboitiotab kaniset ne mi Kenkrea: 2ale otaach inendet eng’ Kiptaiyat, ko u ye nyoljin che tililen, ak otoret inendet eng’ kit age tugul ne magenok; amu inendet agine ko ki toretindet ne bo che chang’, ak kitoreta agane.
3Ogat Priska ak Akula che ki kiboitinik tugul eng’ Kristo Jesu, 4che ki chobotin kogoito sobonwekwak agobo sobondanyu; che mamwachini kongoi anege, ago koboto kanisosiek tugul che bo Bororiosiek agichek: 5ak ogat kaniset ne mi gonywa. Ogat Epeneto ne achame mising’, ne tongoaniat ne bo Kristo eng’ emetab Asia. 6Ogat Maria, ne kiboisiewok eng’ boisiet ne o. 7Ogat Androniko ak Junia, che bo ornyo, ak che kimonjororinik kobota, che toogunotin eng’ che kiyoktoi, che kimi eng’ Kristo kotom ayan.
8Ogat Ampliato ne achame mising’ eng’ Kiptaiyat. 9Ogat Urbano kiboitiondennyu ne kiboisiei tugul eng’ Kristo, ak Stako ne achame. 10Ogat Apele ne chamat eng’ Kristo. Ogat ichek che bo gotab Aristobulo. 11Ogat Herodion ne bo ornyo. Ogat ichek che bo gotab Narkiso, che mi eng’ Kiptaiyat.
12Ogat Trupena ak Truposa, che boisiei eng’ Kiptaiyat. Ogat Persis chamanet, ne kibois mising’ eng’ Kiptaiyat. 13Ogat Rupo ne lewenot eng’ Kiptaiyat, ak kamet ne kamennyu agane. 14Ogat Asunkrito, ak Plegon, ak Herme ak Patroba, ak Herma, ak tupchosiek che mi koboto ichek. 15Ogat Pilologo ak Julia, ak Nereo ak chepkamet, ak Olumpa, ak che tililen tugul che mi koboto ichek.
16Ogatge eng’ ng’ututet ne tilil. Igatok kanisosiek tugul che bo Kristo.
17Kasomok anyun che kitupche, ale ogeer ichek che ing’eeti kabesiosiek ak kanagutik, che manamegei ak konetisiet ne kionetge: ak koistoege ichek. 18Amu icheget che u choto, ko maotei Kiptaiyandennyo Kristo, ago otei mootinwekwak; ak kong’alei mugulelwekab che libwoben eng’ ng’alekwak che tangusen ak che bo chemwaikutnatet. 19Amu kigogasak eng’ bik tugul kaseng’wong’ bo it. Noto anyun abaibai eng’ okwek: ago amache ong’omegitu eng’ noto mie, ak oegu che berber eng’ noto bo yaitiet. 20Ak tun tuei Jehovah ne bo kalyet Setani eng’ kelyekwok ko negit.
Ingoteb kobotok mieindab Kiptaiyandennyo Jesu Kristo.
21Igatok Timoteo ne kiboitiot kobota; ak Lukio ak Jason ak Sosipatro, che bo ornyo.
22Ane Tertio ne kasirei baruani, agatok eng’ Kiptaiyat.
23Igatok Gaio ne ami gonnyi, ak kaniset komugul. Igatok Erasto ribindetab tugukab nganaset, ak Kuarto ne tupcho. 24Ingoteb kobotok tugul mieindab Kiptaiyandennyo Jesu Kristo. Amen.
Kalosunet
25Nguno eng’ inendet ne imuchi kogimitok ko u logoiywekyuk che miach ak amdaetab Jesu Kristo, ko u ng’ang’utiet ne bo ung’ot ne kiga kiuny kosis koboch betusiek che bo koigeny, 26ago kagong’ang’ak nguno, ak eng’ sirutik che bo maotik, ko u ng’atutietab Jehovah ne bo koigeny, ko kagiborji bororiosiek tugul agoi kasetab it ne bo kayanet;
27bo Jehovah ne ng’om inegei, torornatet koigeny, eng’ Jesu Kristo. Amen.
Currently Selected:
ROMANIK 16: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
