ROMANIK 15
15
1Noto anyun kanyoljech achek che ki kimen kegesen nyalulnatetab che ma kimen, ama kibaibaigei achege. 2Ingobaibai age tugul eng’ achek chitab kokwennyi eng’ noto mie, si koteegak. 3Amu kima ibaibaigei Kristo inegei; ago, ko u ye kigisir kele, kogoitya agane churisietab icheget che kichurin. 4Amu tuguk alak tugul che kigisir keny ko kigisir si kinetge, si kenyoru kamang’unet eng’ muitaet ak eng’ kagaigaet ne bo sirutik. 5Ingogonok anyun Jehovah ne bo muitaet ak kagaigaet oegu che otinye kabwatet agenge okwege eng’ okwege ko u ye machei Kristo Jesu: 6si kobiit otoror Jehovah inendet Kwandab Kiptaiyandennyo Jesu Kristo eng’ maget agenge ak kutit agenge.
7Noto anyun otaachge, ko u ye kitaachak Kristo agine, eng’ torornatetab Jehovah. 8Amu amwae anyun ale kigeyai Kristo koek kiboitiotab kamuratanet agobo imanitab Jehovah, si kobiit kogimit arorutik che kigigochi Kwanisiek, 9ak si kotoror Bororiosiek Jehovah amu rirenennyi; ko u ye kigisir kele,
Noto anyun alosun eng’ kwenutab Bororiosiek,
Ak atienji kaineng’ung’.
10Ak kimwa kogeny kole,
Oboiboitu okwek Bororiosiek, koboto bikyik.
11Ak kogeny,
Olosu Kiptaiyat, okwek Bororiosiek tugul;
Ak ingolos bik tugul inendet.
12Ak kogeny mwaei Isaia kole,
Tun biitu tigitiotab Jesii,
Ak inendet ne tun ng’eetei koboi Bororiosiek;
Kotun imang’u inendet Bororiosiek.
13Noto anyun, ingonyiitak Jehovah ne bo kamang’unet boiboiyet tugul ak kalyet eng’ kayanet, si kobiit otesage eng’ kamang’unet, eng’ kamuktaetab Tamirmiriet ne Tilil.
Koboru Paulo komie kit ne kiigoch kosir baruani
14Ak kaanai anendet agane agobo okwek, che kitupche, ale o nyiitotin eng’ mieindo, o nyiitotin eng’ naet tugul, ak kogeny, omuchi otigonge. 15Ago, asirwok agobo ng’alek alak eng’ nyiganatet ne siirei, ko u ye abwatwok kogeny, amu mieindo ne kigona Jehovah, 16ale aek kiboitiotab Kristo Jesu eng’ Bororiosiek, aboisiei eng’ logoiywek che miach che bo Jehovah, si kobiit koek kagoitoetab Bororiosiek ne taagaksei, ko kagitaban eng’ Tamirmiriet ne Tilil. 17Noto anyun atinye kalosunennyu bo ge eng’ Kristo Jesu eng’ tuguk che tokyingei Jehovah. 18Amu maganye ang’alal agobo tugun alak tugul kobate choto che kigoyai Kristo eng’ ane, agobo kasetab it ne bo Bororiosiek, eng’ ng’olyot ak yaet, 19eng’ kamuget ne bo kaborunoik ak kwong’utik, eng’ kamuktaetab Tamirmiriet ne Tilil; noto anyun, kong’eete Jerusalem, ak komoswekyik agoi Iluriko, ko kiaamdaate komie logoiywek che miach che bo Kristo; 20ee, ayae noto koek kit ne atoorjinige ale aamda logoiywek che miach, ma eng’ ole kigemwae kainetab Kristo, si mateech eng’ lumeiywotab chito age; 21ago, ko u ye kigisir kele,
Keerei ichek, che kima bwanji logoiywekyik,
Ak tun naei ichek che tom kogas.
Chobutik che chobei Pauo inegei
22Kigeranya anyun konyil che chang’ si manyonjok: 23ago ko u ye ma atinye oldo age eng’ komoswechu, ak ko u ye atinye eng’ kenyisiechu chang’ emosto ale anyonjok, 24eng’ ui tugul ye tun awendi Spania (amu amang’u ageerok eng’ bandanyu, si oyomisa eng’ bandanyu, si ye tun ngo kagoyama atebet ne kagitebi tugul ak okwek)- 25ago nguno, awendi Jerusalem, awa aboisiechi bik che tililen. 26Amu kicham mising’ Makedonia ak Akaia kobasyi tugun bik che bonondos eng’ kwenutab che tililen che mi Jerusalem. 27Ee, kigocham ichek mising’ ng’olyondonito; ak ichek ko besenikwak. Amu ngo kigeyai Bororiosiek koek yamdoik che bo tuguk che bo tamirmiriet, ko kanyol agichek koyaakta eng’ boisiet ne boisiechin eng’ tuguk che bo borto. 28Ye kaagesu anyun nito, ak ang’okyi ichek logoechu, anyo abun oldang’wong’ awendi Spania. 29Ak angen ale, ye anyonjok, anyone eng’ nyiietab kaberuretab Kristo.
30Asomok mising’ anyun che kitupche, eng’ Kiptaiyandennyo Jesu Kristo, ak eng’ chamnyetab Tamirmiriet, ale ogiilge kobota eng’ sautikwok che osae Jehovah agobo ane; 31si kobiit kitiacha eng’ ichek che magase it eng’ Judea, si koek boisiennyu ne atinye agobo Jerusalem ne taagaksei eng’ che tililen; 32si amuch anyonjok eng’ boiboiyet eng’ magetab Jehovah, ak anyoru kamuung’et kobotok. 33Ingoteb Jehovah ne bo kalyet kobotok okwek tugul. Amen.
Currently Selected:
ROMANIK 15: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
