ROMANIK 14
14
Kanyol kemuite eng’ bikab Kristo che terjin atebosiekwak eng’ bik alak
1Ago otaach inendet ne nyalulat eng’ kayanet, ago ma si oruokyi kabwatutikyik. 2Tinyei chito age kayanet koam tuguk tugul: ago inendet ne nyalulat koamei ngwek. 3Amat kosas ne amei ne maamei; ak amat koruokyi inendet ne maamei, inendet ne amei: amu kagotaach Jehovah inendet. 4I ng’o inye ne iruokyini otwogindetab chito age? Tononi anan kobuti eng’ kiptaiyandennyi. Ee, kinamei kotonon; amu imuchi Kiptaiyat konam inendet kotonon.
5Iiti chito age betut age kosiir betut age: iiti chito age betut age tugul kogergeit. Ingonai komie chi age tugul eng’ ng’omnatennyi. 6Inendet ne ribei betut, koripchin Kiptaiyat: ak inendet ne amisiei, koamisiei eng’ Kiptaiyat, amu mwachin Jehovah kongoi; ak inendet ne maamisiei, ko maamisiei eng’ Kiptaiyat, ak mwachin Jehovah kongoi. 7Amu mami age eng’ achek ne sobei agobo ge, ama mi ne meei agobo ge. 8Amu ngesoptosi, kesoptosi eng’ Kiptaiyat, ak ngebegu, kebegu eng’ Kiptaiyat: noto anyun, ngesoptosi anan ngebegu, kebo Kiptaiyat. 9Amu kime Kristo agobo nito, ak kisob, si koek Kiptaiyat ne bo che kigobek ak che soptos. 10Ago inye, ko amu nee si kiruokyi ne otupche? Anan kogeny, ko amu nee si iit ne otupche koek buch? Amu tun kitonondosi achek tugul eng’ taitab ng’echeretab kiruoget ne bo Jehovah. 11Amu kigisir kele,
Mwaei Kiptaiyat kole, Ko u ye asobe, Tun kutung’jina kutundo age tugul,
Ak kolos ng’elyepta age tugul Jehovah.
12Noto anyun, tun tetyin chi age tugul Jehovah atebennyi.
13Noto anyun, amat ko ta kiruyokyige kogeny: ago kaigai oruoch ko u ni kele amat konde chi kanagut oretab ne tupcho, anan kiy ne igochin kobut. 14Angen, ak koanai komie eng’ Kiptaiyat Jesu, ale mamitei kiy ne ng’wanitu inegei: kobate eng’ inendet ne iiti kiy kole ng’wan, kong’wanitu eng’ inendet. 15Amu ngo arogen ne otupche amu amitwogik, koma iwendoti eng’ chamnyet. Amebar inendet eng’ amitwogiguk ne kimechi Kristo. 16Amat kemwaitae mieindang’wong’ yaitio: 17amu bounatetab Jehovah ko ma amisiet ak eeiset, ago imanda ak kalyet ak boiboiyet eng’ Tamirmiriet ne Tilil. 18Amu inendet ne otei Kristo eng’ tuguchuto koboiboi Jehovah, ak koyanjin bik.
19Noto anyun, ongisub tuguk che yaei kalyet, ak tuguk che kiteegege achege eng’ achege. 20Amowechawech boisietab Jehovah eng’ amitwogik. Tililen tuguk tugul iman; ago ya eng’ chichoto amei eng’ kanagut. 21Mie ngot ko magiam banyek, anan kee maiyek, anan keyai kiy age tugul ne inachi ne otupche. 22Kayanet ne itinye, itepte inyege eng’ taitab Jehovah. Baibai inendet ne matinyei ne iruokyinegei eng’ kioto kagoyanjigei inegei. 23Ago inendet ne tinyei saget, kigikyin ngot koam, amu maamei eng’ kayanet; ak kit age tugul ne ma bo kayanet ko tengek.
Currently Selected:
ROMANIK 14: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
