ROMANIK 11
11
Ma kiesio Israel konyi
1Amwae anyun ale, Kitoorta Jehovah bikyik? Achicha, ma u noto. Amu a Israelindet agane, ne bo keswekab Abraham, ne bo oretab Benjamin. 2Kima toorta Jehovah bikyik che kisib konai. Anan ma onai ne mwaei siret agobo Elija? Ko u ye king’andoi inendet Israelik eng’ taitab Jehovah, kole, 3Kiptaiyandani, kigobar maotiguk, ak kigoluul ole kitisisie: ak kaang’etu anege, ak kocheng’ei sobondanyu. 4Ago lenjin nee wolunetab Jehovah? Kaatukyige murenik elfusiek tisab, che ma kutung’ji Baal. 5Agot ko u noto anyun agine eng’ betusiechu, mitei che ng’etunotin ko u lewenet ne bo mieindo. 6Ago ngot ko bo mieindo, ko ma ko bo boisionik: ngo ma u noto, ko mata koek mieindo mieindo.
7Nee anyun? Kimanyor Israel noto kicheng’ei; ago kinyor lewenik, ak kigiuuiit chun alak: 8ko u ye sirat kole,
Kigogochi Jehovah ichek tamirmirietab ruondo ne nyigis, ak konyek che mageerei kiy, ak itik che magasei kiy, agoi betunito.
9Am mwaei Daudi kole,
Ingoek mesenywa meset ak rigeito,
Ak kanagutiet, ak yaaktaet eng’ ichek:
10Ingoimenitu konyekwak, si mageer kiy,
Ak iyai batoikwak kogumbu kotugul.
11Amwae anyun ale, Tos, kiterteriot kot kobutyo? Achicha, ma u noto: ago kinyonji yetunet Bororiosiek eng’ kabutenywa, si kobiit kogochi ichek ng’etkonda. 12Ngot koegu kabutenywa magornatosiekab ng’ony, ak koek lusenywa magornatosiekab Bororiosiek; kosiirei ne tia anyun nyiienywa?
Kisoru che bo Bororiosiek: kaborunetab ketik che kinamdos
13Ago ang’alalwok okwek che o bo Bororiosiek. Ko u ye a ne kiyoktoi ne bo Bororiosiek, atorori boisiennyu: 14si agochi ng’etkonda eng’ or age tugul icheget che ki borto agenge, ak asoru alak eng’ ichek. 15Amu ngo toortaenywa ko katuiyetab ng’ony, ko tos nee anyun taagetab ichek, kobate sobondo ne mong’une che kibek?
16Ak ngo tilil tongoaniat, ko tilil kit komugul agine: ak ngo tilil tigitiot, ko tililen agichek temenik. 17Ago ngot ko kigiiri temenik alak, ak inye ne i emditab timin, ko kiginamnyenen ichek eng’ kwenunywa, ak kioyamde koboto icheget ne bo tigitiot ak akwaiyetab emdit; 18mechauge ile isiire temenik: ago, ngot ichauge, ko ma inye ne igeseni tigitiot, ago tigitiot ne kesenin.
19Imwae anyun ile, Kigiiri temenik, si kinamnyena. 20Mie; kigiiri ichek amu bistoenywa, ak itononi eng’ kayaneng’ung’. Amelasge, ago iyweisie: 21amu ngo kima rire Jehovah temenik che ki bo ketoto ye kinye, ko marirenen ak inye. 22Keer anyun-o mieindo ak koromnatetab Jehovah: eng’ ichek che kibutyo, ko koromnatet; ago eng’ inye, ko mieindab Jehovah, ngitebi eng’ mieindanyi: ngo ma u noto ketilin aginye. 23Ak ngo matebi ichek eng’ bistoenywa, kinamdos: amu imuchi Jehovah konamnyo ichek kogeny. 24Amu ngo kigetilin eng’ emdit ne bo timin eng’ biteennyi, ak kiginamnyenen emdit ne mie ne kima ko bo timin eng’ biteennyi: ko siirei anyun ne tia kinamnye temenik che ki bo ye kinye emdinywa!
Machei Jehovah korire bik tugul
25Amu mamache oegu che mongen ung’otioni, che kitupche, si moiityige ole o ng’omen eng’ loseng’wong’ bo ge, ale kanyonji Israel uuindo eng’ kebeber, agoi konyo nyiiet ne bo Bororiosiek; 26ak u noto tun kisoru Israel tugul: ko u ye sirat kole,
Tun mong’une Sion Katiagindet;
Ak koistoe Jakobo bistoet:
27Ak ni arorutiennyu eng’ ichek,
Ye tun aiste tengekwogikwak.
28Ago bunik ichek eng’ okwek, amu logoiywek che miach: ago eng’ ng’olyotab lewenet, ko chamanik ichek amu kwanisiek. 29Amu matinyei ndara konunoikab Jehovah ak kuursennyi. 30Amu ko u ye kiongelelji Jehovah eng’ betusiek che kigosiirto, ago nguno ko kaonyoru rirenetab ge eng’ bistoenywa, 31ko u noto agichek chu, kigobistoe, si konyor agichek rirenetab ge eng’ rirenetab ge ne kigiboruok. 32Amu kigoratyi Jehovah tugul eng’ bistoet, si kobiit korire tugul.
33Ee tianitu anyun oindo ne bo magornatosiekab ng’omnatet ak naetab Jehovah! Ak kiruogutikyik che maisiagaksei, ak ortinwekyik che ma cheng’oksei! 34Amu ng’o ne kigonai kabwatutikab Kiptaiyat? Anan ng’o ne kigoek konetindennyi? 35Anan ng’o ne kisib kogochi kiy, si kobiit koyaakyi inendet kogeny? 36Amu bou inendet, ak kobunu inendet, ak koweekyingei inendet, tuguk tugul. Bunjin inendet torornatget koigeny. Amen.
Currently Selected:
ROMANIK 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
