ROMANIK 10
10
1Che kitupche, magetab muguleldanyu ak somennyu eng’ Jehovah agobo ichek ko ale kesor ichek. 2Amu abaoriani agobo ichek ale tinyei kagiiletab ge agobo Jehovah, ago ma eng’ naet. 3Amu ye kima nai ichek imandab Jehovah, ak ye kicheng’ kogimit nenywa, ko ma kogas it imandab Jehovah. 4Amu Kristo kagesunetab Ng’atutiet agoi imanda eng’ age tugul ne iyani.
Bo bk tugul aret ne leel ne bo imanda
5Amu sirei Musa kole chi ne yaei imanda, ne bunu Ng’atutiet, kosobei eng’ noto. 6Ago mwaei imanda noto bo kayanet ko u ni, Amemwa eng’ muguleldang’ung’ ile, Ng’o ne togostoi kipsengwet? (Noto ko komut Kristo kochorgei.) 7Anan, Ng’o ne togostoi kipsengwet? (Noto ko komut Kristo kotogos eng’ che kibek.) 8Ago mwaei nee? Negitenen ng’olyot, mi kuting’ung’, ak mi muguleldang’ung’: noto ko ng’olyotab kayanet, ne kiamdoi: 9amu nging’any eng’ kuting’ung’ ile Jesu ko Kiptaiyat, ak iyani eng’ muguleldang’ung’ ile kiing’eet Jehovah inendet komong’une che kibek, kesorun: 10amu iyani chi eng’ muguleldo agoi imanda; ak ng’anyei eng’ kutit agoi yetunet. 11Amu mwaei siret kole, Age tugul ne iyani inendet ko magigochin kolilan. 12Amu mami kabesiet eng’ Yahudiot ak Yunanindet: amu Kiptaiyandanato ko Kiptaiyatab tugul, ak magoriot eng’ ichek tugul che kuurei inendet: 13amu, Age tugul ne kuurei kainetab Kiptaiyat, kesoru.
14Kuurtoi ano anyun inendet ichek che tom koyan? Ak iyandoi ano inendet ichek che tom kogas agobo inendet? Ak kastoi ano ama amdoindet? 15Ak amdoitoi ano, ngo ma kiyokto? Agot ko u ye sirat kole, Kororon ne tia kelyekab icheget che ibu logoiywek che bo boiboiyet, che bo tuguk che miach! 16Ago kima kas it tugul logoiywek che miach. Amu mwaei Isaia kole, Kiptaiyandani, kigoyan ng’o ng’alekyok? 17Nyonei anyun kayanet eng’ kaset, ak nyonei kaset eng’ ng’olyotab Kristo.
18Ago amwae ale, Tos kima kas? Ee, iman,
Kiwa twegunenywa koyom emet komugul,
Ak kiba ng’alekwak agoi tabanwekab ng’ony.
19Ago amwae ale, Tos kima nai Israel? Kisib komwa Musa kole,
Andeok ng’etkonda eng’ noto ne ma bororiet,
Atachok eng’ bororiet ne matinyei naet.
20Ak nyigan mising’ Isaia, ak mwaei kole,
Kinyorua ichek che kima cheng’a;
Kiatoogu eng’ ichek che ma teeba.
21Ago mwaei agobo Israel kole, Kiaitochi eunekyuk eng’ betut komugul bik che magase it ak che ngelelik.
Currently Selected:
ROMANIK 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
