MARIKO 9
9
1Ak kilenji ichek, Amwawok iman ale, Mi yu alak eng’ chu tonondos, che magoi chamjam meet, agoi kogeer bounatetab Jehovah konyonei eng’ kamuktaet.
Waletab ge ne bo Jesu
2Ak kingobata betusiek lo komut Jesu Petero, ak Jakobo, ak Johana, kotogosta tulwet ne koi koba uwak ichegei: ak kiwalak eng’ tainywa: 3ak kilil bich ngoroikyik mising’, ko u teluchi; mami mwetindet ng’ony ne imuchi komwet koleelagitu ko u choto. 4Ak kitook eng’ tainywa Elija ak Musa: ak king’alaljindos koboto Jesu. 5Ak kiwol Petero kolenji Jesu Konetindoni, mie ketebi eng’ yu: mie keteech keriosiek somok; neng’ung’ age, ko bo Musa age, ko bo Elija age. 6Amu kima kongen kit ne wolu; amu kiiyweis mising’. 7Ak kinyo boldet kotuch ichek: ak kimong’ kutit eng’ boldet, kole, Ni ko Werinnyu, chamanennyu: ogas okwek inendet. 8Ak kigusgong’ ngunoto kogeer komoswek tugul, ko mata kogeer chi, kobate Jesu inegei ak icheget.
9Ak kingota kochorugei eng’ tulwet, koete ichek, kolenji, amat komwachi chi tuguk che kagogeer agoi kong’eet Weritab chi eng’ che kibek. 10Ak kirib ng’olyondonoto koteebegei ichegei agobo kaguiyetab ng’eetyet. 11Ak kiteebe inendet kole, Mwaei sirik kole, kanyol konyo Elija korok. 12Ak kilenji ichek, Iman, nyonei Elija korok, ak koweech tuguk tugul ko u ye kinye: ak kiteptoi ano si kesir agobo Weritab chi kele nyalili eng’ tuguk che chang’ ak kiit koek buch? 13Ago amwawok ale, kigonyo Elija, ak kiyachi agine kit age tugul ne kimachei ichek ko u ye kigisir agobo inendet.
Kisoobi werit ne tinyei tamirmiriet ne namat kut
14Ak ye kigabwa ole mi alamalyet, kogeer tuiyet ne o ko kayiem ichek, ak sirik che kiteepse ichek. 15Ak yeityo anyun, ye kingogeer tuiyet komugul inendet, kokwong’io mising’, ak koruai ole mi, kogat. 16Ak kiteebe ichek kole, Oteebege nee ak icheget? 17Kowolji chito age eng’ tuiyet, kolenji, Konetindoni, kaamutun werinnyu, ne tinyei tamirmiriet ne namat kut; 18ak oldo tugul ole namjin eng’ kimnatet, kowirjinoti ng’ony: ak kotabugoni, ak konyeei kelek, ak kochuchui: ak kaamwachi alamalyeng’ung’ koon komanda; ago ma imuch.
19Ak kiwolji anyun ichek kolenji, Ee, ibinda ne matinyei kayanet, atebye kobotok kot kotianit? Amuitoiywok kot kotianit? Omutwa inendet. 20Ak kiimutyi ichek inendet Jesu: ak ye kingogeer inendet, kobirabirto ngunoto tamirmiriet mising’; ak kobutyi ng’ony, komelmelgei ak kotabugan. 21Ak kiteebe kwandanyi, kolenji, Kinamei koboch au kiito? Ak kile, Koboch ko lakwa. 22Ak kigowirji konyil che chang’ ma ak ole mi beek, komachei kobar inendet: ak ngimuchi iyai kiy age tugul, irirenech ge, ak itoretech. 23Ak kilenji Jesu, Ngimuchi! Imugaksei tuguk tugul eng’ inendet ne iyani. 24Yeityo anyun kowaach kwandab lakwanato, ak kole, Ayani; toreta eng’ bistoennyu.
25Ak kingogeer Jesu tuiyet koruou tugul, koger kong’ tamirmiriet ne muruon, kolenji, Inye, tamirmiriet ne namat kut ak ko i ming’at, kang’atin ale, mong’u eng’ inendet, ak amatata ichut inendet kogeny. 26Ak kingo kagowaach ak kobirto inendet mising’, komanda: ak koigei lakwet ne kagome; kot komwa che chang’ kole, Kagome. 27Ago kinam Jesu eut, ak kong’eet; kotonon anyun.
28Ak ye kingo kakwo go, koteebe alamalyennyi inendet komi ichegei, kole, Amu nee si ma kimuch achek keon? 29Ak kilenji ichek, Maimuchi komanda ne u ni eng’ kiy tugul, kobate saet.
Sib kemwaei ne bo aeng’ meetab Jesu
30Kiba anyun eng’ oloto, ak kobun kwenutab Galili; ak kima mach konai chi age tugul. 31Amu kiineti alamalyennyi kolenjin, kindoi Weritab chi eunekab bik, ak kobar inendet; ak ye kagebar, kong’eet kogeny, ko kagobata betusiek somogu. 32Ago kima nai ichek ng’olyondonoto, ak kiiywei koteebe inendet.
Kanetisiet agobo kaming’inetab ge
33Ak kibwa Kapernaum: ak ye kimi go koteebe ichek kole, Ka nee ng’alek che komwaonu eng’ oret? 34Ago kisisyo: amu kitiitos ichegei eng’ ichegei eng’ oret kolen ng’o ne o.
35Kiteb ng’ony anyun, ak koguur choto taman ak aeng’; ak kolenji, Ngo machei chi koek ne bo tai, koegu ne bo let eng’ tugul, ak koek otwogindetab tugul. 36Ak kinam lakwet ne ming’in ak konde kwenunywa: ak koganab eng’ eunekyik, ak kolenji, 37Age tugul ne taachei age eng’ lagochu mengech eng’ kainennyu, ko kataacha: ak age tugul ne taacha, ko mataacha ane, ago inendet ne kiiyokwa.
Agobo muitaet
38Kilenji Johana inendet, Konetindoni, kogigeer chi koonei oik eng’ kaineng’ung’: ak kogiete, amu koma kosubwech. 39Ago kile Jesu, Amoete: amu mami chi ne yaei boisiet ne bo kimnatet eng’ kainennyu, ak komuch kochepchebit komwaitaena yaitio. 40Amu inendet ne magirindoech ko nenyo. 41Amu age tugul ne inagok beekab kikombet oee, amu o bo Kristo, amwawok iman, ale, mabetyin melektanyi.
Mamie kinach bik alk
42Ak age tugul ne inachi age eng’ chu mengech che iyana, ko kaigai eng’ inendet kirooch kaatinnyi koitab bai ne o, ak kewirji nyanjet. 43Ak ngonachin eung’ung’, itil: kaigai eng’ inye imong’ji sobondo i bo mugung’, kosiir itinye eunek aeng’ ak iwe Gehenna, mat ne ma misoksei. 44Ole mabegu kutikwak, ama misoksei mat. 45Ak ngonachin keldang’ung’, itil: kaigai eng’ inye imong’ji sobondo i bo kelok, kosiir kewirjin Gehenna i bo kelyek aeng’. 46Ole mabegu kutikwak, ama misoksei mat. 47Ak ngonachin kondang’ung’, ibalu: kaigai eng’ inye iit bounatetab Jehovah i bo kong’ak, kosiir kewirjin Gehenna itinye konyek aeng’; 48ole mabegu kutikwak, ama misoksei mat.
49Amu kindoi chi age tugul munyuk eng’ mat. 50Miachen munyuk: ago ngo bet anyinyindab munyuk, ko ta ondoi nee si kochom? Ingotebe munyuk mugulelwekwok, ak otebi eng’ kalyet okwege eng’ okwege.
Currently Selected:
MARIKO 9: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
