MARIKO 10
10
Ng’olyot ne kigitee b agobo siret ne bo besiet
1King’eet anyun eng’ oloto, konyo tabanwekab Judea ak bitetab Jordan: ak kiiyumjigei inendet tuiyosiek kogeny; ak kiinet ichek kogeny, ko u ye kicham koyaei.
2Ak kibwanji inendet Parisaik, koteebe inendet koyomei, kole, Tos chamdaat eng’ ng’atutik koon chi osotiondennyi? 3Ak kiwolji Jesu kolenji, Nee ne king’atak Musa? 4Ak kile ichek, Kicham Musa kesir siret ne bo besiet, si koon kwo.
5Ago kilenji Jesu ichek, Kisirwak ng’atutionoto Musa amu uuindab mugulelwekwok. 6Ago koboch taunetab yaetab ng’ony, ko kiyai Jehovah ichek muren ak tie. 7Amu ng’olyondoni kobagaktoi chi kwanda ak kamet, ak konamgei ak osotiondennyi; 8ak koek choto aeng’ borto agenge: si ma ko aeng’, ago egu borto agenge. 9Choto anyun che kagotuiyo Jehovah, ko mat kobesio chi.
10Ak kiteebe alamalyennyi inendet kogeny eng’ go, agobo ng’olyondonoto. 11Ak kilenji ichek, Chi age tugul ne onei osotiondennyi, ak kotun age, ko kabaigei. 12Agot kobogoriot agine ngo bagakta manong’otiondennyi, ak kotun chito age, ko kabaigei.
Koberuri Jesu lagok che mengechen
13Ak kigimutyi inendet lagok che mengechen, si kobiit kotwa ichek: ago kiger kong’ alamalyennyi ichek. 14Ago ye kingogeer Jesu, konyit, ak kolenji ichek, Ochamji lagok che mengech kobwanja; amoete ichek: amu bo bounatetab Jehovah che u chu. 15Amwawok iman ale, Chi age tugul ne mataachei bounatetab Jehovah ko u lakwet ne ming’in, ko maitei oloto matiny. 16Ak kiganab icheget eng’ eunekyik, ak koberur, kogonoor eunekyik ichek.
Kocheng’ei chito ne kitinyei tuguk che chang’, sobondab koigeny
17Ak ye kiwendi eng’ oret, kolabatyi chito age inendet, ak kogutung’ji, ak koteebe kole, Konetindoni mie, ayai nee si anyor sobondo ne bo koigeny? 18Ak kilenji Jesu inendet, Kalya si iguurena ne mie? Mami chi ne mie, kobate agenge, inendet Jehovah. 19Ingen inye ng’atutik, Amerumisie, Amoipge, Amechorse, Amebaorianji lembech, Ameng’alse, Teech kwandang’ung’ ak komet. 20Ago kilenji, Konetindoni, kiarib tuguchuto tugul koboch ko a ming’in.
21Kigeer anyun Jesu inendet, ak kocham, ak kolenji, Ta ko rartaat kit agenge eng’ inye: ui, ialde tuguk tugul che itinye, ak igochi kibananok, si inyoru magornatet eng’ kipsengwet: ak inyo isubwa. 22Ago kigerer met agobo ng’olyondonoto, ak kwo eng’ arogenet: amu kitinyei inendet tuguk che chang’.
Tuguk che uuen agobo magornatosiek
23Ak kigeer Jesu komoswek tugul, ak kolenji alamalyennyi, Bichii ne tia koit bounatetab Jehovah che tinyei magornatosiek! 24Ak kikwong’io alamalyennyi eng’ ng’alekyik. Ago kiwol Jesu kogeny, kolenji, Lagochu, bichii ne tia eng’ ichek che tiiegei magornatosiek koit bounatetab Jehovah! 25Nyamnyum eng’ tambesiet kochut kondab katet, kosiir komong’ji magoriot bounatetab Jehovah. 26Ak kikwong’io ichek mising’, ak kolenji, Ara ng’o anyun ne imuchi konyor sorunet? 27Ak kingogeer Jesu ichek, kole, Maimugaksei eng’ bik, ago ma u noto eng’ Jehovah: amu imugaksei tuguk tugul eng’ Jehovah.
28Kitoi anyun Petero kolenji, Keero, kigebagakte tuguk tugul ak kigisubun. 29Kile Jesu, Amwawok iman ale, mami chi ne kibagach got, anan ng’etab kametwagik, anan chepkametwagik, anan kamet, anan kwanda, anan lagok, anan mbarenik, agobo ane, ak logoiywek che miach, 30ne manyoru konyil bogol nguno eng’ betusiechu, gorik, ak ng’etab kametwagik, ak chepkametwagik, ak kametwagik, ak lagok, ak mbarenik, koboto usisiosiek; ak eng’ betusiek che tun bwanei, sobondab koigeny. 31Ago tun egu che chang’ che bo tai che bo let; ak koek che bo let che bo tai.
Sib kemwaei ne bo somok meetab Jesu
32Ak kimi ichek eng’ oret kotogostoi Jerusalem; ak kiindoi Jesu: ak kikwong’io, ak koiyweis che kiisubi. Ak kiitaban kogeny choto taman ak aeng’, kotoi komwachi ichek tuguk che tun ityin inendet, 33kole, Ogeero, kitogostoi Jerusalem; ak kindoi Weritab chi eunekab tisiik che eechen ak sirik; ak koruokyi kiruoget ne bo meet, ak konde inendet eunekab bororiosiek: 34ak kochurochur inendet, ak kong’utyi, ak kobire kipcharitit, ak kobar; ak ye ibata betusiek somogu kong’eet kogeny.
Sometab Jakobo ak Johana
35Ak kirikyi inendet Jakobo ak Johana, werikab Sebedi, ak kolenji, Konetindoni, kimache iyaiywech kiy age tugul ne kisomin. 36Ak kilenji ichek, Omache ayaiywok nee? 37Ak kilenji, Konech ketebe, age eung’ung’ ne bo tai, ak age eung’ung’ ne bo katam, eng’ telunateng’ung’. 38Ago kilenji Jesu ichek, Mongen kit ne osome. Tos omuchi oee kikombet ne aee? Anan kibatisanenak kabatisanet ne kibatisanena? 39Ak kilenji, Kimuchi. Kolenji anyun Jesu ichek, Kikombet ne aee ko tun oee ak okwek; ak kabatisanet ne kibatisanena ko tun kibatisanenok ak okwek noto: 40ago ma ane ne igoitoi kotebe chi eunnyu ne bo tai anan eunnyu ne bo katam: ago bo icheget che kigechopchi.
Etunatet ne bo iman
41Ak ye kingogas chun tamanu, kotoi bichoto konerekyi mising’ Jakobo ak Johana. 42Ak kiguur Jesu icheget kobwa ole mi, ak kolenji ichek, Ongen ole icheget che kiiti kele bou Bororiosiek, koyaegei koek kiptainik eng’ ichek; ak chechuak che eechen kobou ichek. 43Ago ma u noto eng’ okwek: ago chi age tugul ne machei koek ne o eng’ okwek, koek ne boisiewok: 44ak chi age tugul ne machei koek ne bo tai eng’ okwek, koek otwogindetab tugul. 45Amu kima nyo agot Weritab chi si keboisiechi, ago si kobois inendet, ak kogoito sobondanyi koek kit ne kitiage che chang’.
Kisoobi Bartamayo kipkoratiat
46Ak kiit anyun Jeriko: ak kingomandae Jeriko, koboto alamalyennyi ak tuiyet ne o, ko kitebyei eng’ oret taban, Bartimayo, weritab Timayo, inendet kipkoratiat ne somsei. 47Ak ye kingogas kole, nito ko Jesu ne bo Nasaret, kotoi kowaach ak kole, Jesu, Weritab Daudi, rirena. 48Ak kiger kong’ che chang’ kole, kosis: ago kites kowaach mising’ kole, Weritab Daudi, rirena.
49Ak kitonon Jesu, ak kole, Oguur inendet. Ak keguur kipkoratiandanato, kelenji, Baibaitu: ng’eet, kuurin inendet. 50Ak kiwirta ngoriennyi, ak koriakta, kwo ole mi Jesu.
51Ak kiwolji Jesu inendet kolenji, Imache ayaun nee? Ak kole chito ne korat, Rabboni, amache ageerto.
52Ak kilenji Jesu inendet, Ui bandang’ung’; kagosoobin kayaneng’ung’. Ak kigeerto ngunoto anyun, ak kosub inendet eng’ oret.
Currently Selected:
MARIKO 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
