LUKA 17
17
Mwaosiek alak che bo Jesu
1Kilenji alamalyennyi anyun, Bwanei kanagutik matiny: ago bwa eng’ chichoto bunu! 2Kita kaigai eng’ inendet kirooch kaatinnyi koitab bai ne o ak kewirji nyanjet, kosiir ye inachi age eng’ chu mengech. 3Oripge: ngochiliilun ne otupche, iger kong’; ak ngo sik, inyochi kaat. 4Ak ngo chalwogenjin konyil tisab eng’ betut agenge, ak ngo week ole imi konyil tisab kolen, Kaasigu; inyochi kaat.
5Ak kilenji che kiyoktoi Kiptaiyat, Teswech kayanennyo. 6Ak kile Kiptaiyat, Ndotinye kayanet ne u keswotab karadali, ko ye omwachi mogoiywoni, olenji, Kitutin, ak keminin eng’ nyanjet; kogasok it.
7Ago mi ng’o eng’ okwek ne tinyei otwogindet ne ibatisiei anan ne iyagi kechirek, ne lenjin, ye kait kobunu mbar, Nyo ngunoto ak itebi ng’ony iamisie? 8Tos ma kaigai kolenji inendet, Chobwa tuguk che aame, kermenge, ak iboisiewa, agoi aamisie ak aeeise; si yeityo iamisie ak ieeise aginye? 9Tos weekyin otwogindonoto kongoi amu kayai tuguk che kaga king’at? 10U noto tun ak okwek, ye kaoyai tuguk tugul che kaging’atak, omwa ole, Ki otwogik che matilei kiy; kageyai che kanyoljinech keyai.
Kisoobi Jesu bik taman che amei mogondosik
11Ak ye kimi oret kowendi Jerusalem, kobun kwenutab Samaria ak Galili. 12Ak kingomong’ji nganaset age, kotuiyo ak murenik taman che kiamei mogondosik, che kitonondos eng’ ole loo: 13ak kiwaach kole, Jesu Kiptaiyat, rirenech. 14Ak kingogeer ichek, kolenji, Oba oborjige tisiik. Ak ye kingab kaba, kotililitu. 15Ak kingogeer age eng’ ichek kole kagosob, koweek, kolosunonu Jehovah eng’ kutit ne o; 16ak kiibutyi kelyekyik kogochi kongoi; ak ki Samarindet chichoto. 17Ak kiwol Jesu kole, Kama kitilil taman? Ago mi ano chugai sogolu? 18Tos ma biit agot agenge ne kaweek kogochi kalosunet Jehovah, kobate toondoni? 19Ak kolenji inendet, Ng’eet, si iwe: kagosoobin kayaneng’ung’.
Nyonunetab bounatetab Jehovah
20Ak kingoteebe Parisaik kole nyonei au bounatetab Jehovah, kowolji ichek kolenji, Manyonei bounatetab Jehovah kegeeronu: 21ama kimwaei kele, Ogeero, mi oli! Anan mi olin! Amu, ogeero, mi bounatetab Jehovah kwenung’wong’.
22Ak kilenji alamalyennyi, Tun bwanei betusiek, che tun omache ogeer betut agenge ne bo Weritab chi, ak mogeere. 23Ak tun lenjinok, Ogeero, mi olin! Ogeero, mi oli! Amat obe, anan osub ichek: 24amu u kalyelet, ne ilyelune komosta age eng’ kipsengwet, ak koluu agoi komosta age ne bo kipsengwet; tun u noto Weritab chi agine eng’ betunnyi. 25Ago kanyol konyalil eng’ tuguk che chang’ ak koesio inendet ibini. 26Ak ko u ole kibiitunda eng’ betusiekab Noa, ko tun u noto eng’ betusiekab Weritab chi. 27Kiamisiei, kieeisei, kiitunisiei, ak kiigoitoi kitun, agoi betut ne kiwa Noa melit orit, ak kinyo maranet, ak kobar tugul. 28U noto agine, ole kibiitunda betusiekab Lot; kiamisiei, kieeisei, kialisiei, kialdoisiei, kigolsei, ak kiteeksei; 29ago eng’ betut ne kimanda Lot eng’ Sodom korobon mat ak koik che laldos che kibunu kipsengwet, ak kobar tugul: 30u noto eng’ betut ne kiboru Weritab chi.
31Eng’ betunoto, ko mat kochorgei inendet ne mi got barak, koib tugukyik che mi go; amat koweek agine inendet ne mi mbar. 32Obwat osotiotab Lot. 33Age tugul ne cheng’ei kosor sobondanyi kobeeti: ak age tugul ne ibeeti sobondanyi koribei. 34Amwawok ale, Tun ruitos bik aeng’u eng’ itogut agenge eng’ kemounoto; kimuti age, kebagakta age. 35Tun ng’oisei kobogorisiek aeng’u kibagenge; kimuti age, kebagakta age. 36Tun mi bik aeng’u mbar: kimuti age, kebagakta age.
37Ak kiwolji inendet kolenji, Ano, Kiptaiyandani? Ak kilenji, Ole mi musto, koyumjingei oloto motong’wek agichek.
Currently Selected:
LUKA 17: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
