LUKA 16
16
Ribindet ne kima ko bo imanda
1Ak kilenji inendet alamalyennyi kogeny, Kimi chi anum ne ki magorio, ne kitinyei ribindet ne kitononjin gonnyi; ak kigimwaita chichoto eng’ tainnyi kele, iserseri tugukab magoriondonoto. 2Ak kiguur inendet kolenji, Nee ni agase agobo inye? Konu koitetab ripseng’ung’; amu ma iegu ribindet kogeny. 3Ak kile ribindonoto eng’ muguleldanyi, Ayae nee anyun, amu kagoistaa kiptaiyandennyu eng’ boisiet? Amatinye kimnatet ne abatisie; ak ngale, Asomso, alilani. 4Kaanai kit ne ayae, si ye kageona eng’ boisiet, kotaacha eng’ gorikwak. 5Ak kingoguur age tugul eng’ besenikab kiptaiyandennyi, kolenji ne bo tai, Kiibesen ata tugukab kiptaiyandennyu? 6Kole, Terenik bogol che bo mwanik. Ak kilenji, Nam kartasing’ung’, ak iteb ng’ony si isir konom, ichokyi. 7Yeityo kolenji age, Kiibesen ata inye? Kole, Terenik bogol che bo nganok. Kolenji, Nam kartasing’ung’, si isir tamanwogik sisiit.
8Ak kiichoi kiptaiyandennyi otwogindonoto kima ko bo imanda amu kayai eng’ ng’omnatet: amu ng’omen werikab ng’onyuni eng’ ibindanywa kosiir werikab lapkeiyet.
Ole kiboisietoi komie magornatet
9Ak amwawok ale, Oyachige choronok eng’ oretab magornatosiek che ma bo imanda; si ye tun igesgei, ko tun kotaachak eng’ gorik che bo koigeny. 10Inendet ne kiyani eng’ che ng’ering’, kiyani agine eng’ che chang’: ak inendet ne magiyani eng’ che ng’ering’ ko magiyani agot eng’ che chang’. 11U noto anyun, ngo kima oegu che kiyani eng’ magornatosiek che ma bo imanda, ko ng’o ne tos iyanak eng’ magornatosiek che bo imanda? 12Ak ngo kimata oegu che kiyani eng’ tugukab chito age, ko tos ng’o anyun ne konok tuguk che chekwok?
13Ma mi otwogindet ne imuchi koot kiptainik aeng’: amu tos wech age, ak kocham age; anan konamgei ak age, kosas age. Momuchi oot Jehovah ak magornatet.
Kigerei kong’ Parisaik
14Ak kigas Parisaik tuguchuto tugul. Kichamei siling’isiek icheget, ak kororechi inendet. 15Ak kilenji, Okweget che omieitige eng’ taitab bik; ago ingen Jehovah mugulelwekwok: amu kit ne itorori bik ko wegot mising’ eng’ taitab Jehovah.
16Kitebi Ng’atutik ak maotik agoi koit Johana: koboch betunoto keamdoi logoiywek che miach che bo bounatetab Jehovah, ak komong’jin chi tugul eng’ kimnatet. 17Ago nyamnyum kosiirto kipsengwet ak ng’ony, kosiir kobut sirutiet agenge ne bo Ng’atutik.
18Age tugul ne onei osotiondennyi, ak kotun age, ko kabaigei: ak chito ne ituni inendet ne kigoon manong’otiot ko kabaigei.
Magoriot ak Lasaro kibananiat
19Ak kimi chi anum ne ki magorio ne kiilaachi ngoroik che arusen ne birir, ak che bo katanit ne kararan, ak kibaibai betut age tugul, ak kotalbisi: 20ak kimi kibanania ne kigiguure Lasaro ne kigimogoni eng’ kurgennyi, ak ki nyiitat mook bortanyi, 21ak kimachei kebae tuguk che ibutos eng’ mesetab magoriondonoto; ee, kibwa agot sesenik ak komel mookyik.
22Ak kime kibananiandanato betut age, komut inendet malaikaisiek konde tegetab Abraham: ak kime agine magoriondonoto, ak kigitub. 23Ak ye kimi oldab che kigobek konyal barak, komi nyalilda ne o, kogeer Abraham komi ole loo, komi Lasaro tegennyi. 24Ak kiite kole, Baba Abraham, rirena, ak iyogu Lasaro, koting’e beek walitab mornennyi, si kotiswa ng’elyeptanyu, amu ami ng’wanindo mising’ eng’ mai lalei. 25Ago kile Abraham, Weri, ibwat ile kingota isobe ko kiinyoru tuguguk che miach, ki u noto Lasaro, kinyoru tuguk che yaach: ago nguno kigoigoi inendet eng’ yu, ago inye, imi ng’wanindo ne o. 26Ak ne siirei chu tugul, ko kiginde chemng’eisut ne o ne ioitosech achek ak okwek, si che machei kolong’ olo omi ko maimuchi, ak che machei kolong’ ole kimi ko maimuchi. 27Ak kile, Asain anyun, baba, ale, iyokte inendet kwo oldab baba; 28amu atinye che kitupche mut; kwo koteechi ichek, si mabwa ole mi nyalilda ne o. 29Ak kilenji Abraham, Tinyei ichek Musa ak maotik; ingogas ichek. 30Ago kile, Achicha, baba Abraham: ago ngot kwo chi ole mi ichek ne bunei oldab che kigobek, kosigu. 31Ak kilenji, Ngot ko magas Musa ak maotik, koesioi koyan agot chito ne ng’eetei eng’ che kigobek.
Currently Selected:
LUKA 16: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
