LUKA 12
12
Koborjin Jesu alamalyennyi kole ya chombilisiet
1Eng’ saisiechoto, ye kingoyumgei bik ng’isiat che bo tuiyet, kot kotiech ge ichegei, kosib kotoi kolenji alamalyennyi, Oribege mermerekab Parisaik, noto chombilisiet. 2Ago mami kiy ne tugot, ne matun king’anyei, anan ne ung’at, ne matun naaksei. 3Amu kiy age tugul ne omwae eng’ mesundeito kotun kegasei eng’ ole lapkei; ak che kiochaamji itit eng’ got orit kotun kemwaitoi eng’ got barak.
Kotoreti Jesu alamalyennyi konyiganitu
4Ak amwawok choronokyuk ale, Amoiywei che barei borto, yeityo ko mata komuch koyai kiy age. 5Ago ateeiywok si onai inendet ne kanyol oiywei: Oiywei inendet, ne ngo kagobar komuchi kowirji Gehenna; ee, amwawok ale, Oiywei inendet. 6Tos magialdae taritik mut che mengechen kebebertab mut ne bo denarit? Ama utie Jehovah agot agenge. 7Ago iitotin sumeek tugul che bo metowekwok. Amoiywei anyun: osiire okwek taritik che chang’ che mengechen.
8Ak amwawok ale, Age tugul ne ibortaa eng’ taitab bik, kotun ibortoi agine Weritab chi chichoto eng’ taitab malaikaisiek che bo Jehovah. 9Ago inendet ne esioa eng’ taitab bik kotun keesioi agine eng’ taitab malaikaisiek che bo Jehovah.
10Ak age tugul ne mwaei ng’olyo ne ya agobo Weritab chi, kenyochin kaat: ago inendet ne chubei Tamirmiriet ne Tilil ko maginyochin kaat inendet.
11Ak ye kimutak oldab sunagogisiek, ak taitab kiruogik, ak bounik, ko mat ogerer met agobo kit ne owolu anan omwae: 12amu inetok Tamirmiriet ne Tilil eng’ sainato kit ne nyolu omwa.
Kasetab miat; kalewenet agobo magoriot ne berber
13Kilenji anyun chito age eng’ tuiyet, Konetindoni, mwachi werit ne kitupche kopcheiywa tugukyok. 14Ago kilenji inendet, Chichi, ng’o ne kindea aek kiruogindet anan pcheindet eng’ okwek?
15Ak kilenji ichek, Ogeer, ak oripge eng’ kasetab miat tugul: amu matebyei sobondab chi eng’ chang’indab tuguk che tinyei. 16Ak kimwachi kalewenet kolenji, Kimi magoriot age ne kiga rur mbarennyi mising’: 17ak kiibwat eng’ muguleldanyi kole, Ayae nee, amu matinye ole agonore bekyuk? 18Ak kile, Ayae ko u ni: abute chogenikyuk, si ateech che eechen kosiir chu: si agonore bekyuk ak tugukyuk tugul che miach. 19Si alenji sobondanyu, Sobondanyu, itinye tuguk che chang’ che miachen che konorotin che yamei kenyisiek che chang’; imuuny, amisie, eeise, ak ibaibaitu. 20Ago kilenji Jehovah, I berber inye, kimachei sobondang’ung’ kemouni bo ra; ara, si kobunji ng’o anyun, tuguchoto koichob? 21U noto anyun chito ne konorjingei magornatet inegei, ne ma magorio eng’ Jehovah.
Kiboruech kele ma mie kegerermet agobo kiy tugul
22Kilenji anyun alamalyennyi, Noto anyun amwawok ale, Amogerer met agobo sobeng’wong’, eng’ tuguk che oame; anan agobo borwekwok, eng’ tuguk che olaachi. 23Amu siirei sobet amitwogik, ak siirei borto ngoroik. 24Obwat chepkuginik, amu magolei, ama kesei; ama tinyei ole konore anan choget; ago Jehovah ne baei: osiire taritik konyil ata! 25Ak ng’o eng’ okwek ne imuchi kogerer met si kotes koindanyi eng’ kakwautiet agenge ne bo eut? 26Ngo momuchi anyun oyai agot kiy kitigin, ko amu nee anyun si ogerer met agobo tuguk alak? 27Obwat taptok, ole bititoi: maboisiei, anan koletis; ago amwawok ale, Agot Solomon, eng’ talbistanyi tugul, ko kima kolumegei ko u age eng’ chuto. 28Ago ngolaaksechin Jehovah ko u noto suswek che bo kewet che mi ra, ak mutai kewirji ma, kotos siirei ne tia anyun kolaaksewok okwek, che otinye kayanet ne ming’in!
29Amocheng’ che oame, anan che oee, amosage. 30Amu cheng’ei tuguchuto tugul bororiosiekab ng’ony: ago ingen Kwandang’wong’ kole omakyinige tuguchuto. 31Ago ocheng’ okwek bounatetab Jehovah, si keteswok tuguchuto tugul.
32Amoiywei, okwek akwet ne ming’in; amu baibai Kwandang’wong’ kogonok bounatet. 33Oalde che otinye, si ogoite kagochinoik; onapchige suberok che maosegitu, konoruet eng’ kipsengwetisiek ne mabegu, ole marikyin chorik, ama ng’emei kiptorotinik. 34Amu ole mi konorueng’ung’, ko oloto ole mi muguleldang’ung’ agine.
Kanyol keripge; kalewenet agobo ribindet ne kiyani
35Ongogermenogis suenutikwok, ak ongolalyo taisiekwok; 36ak ogergeitu ak bik che igeni kiptaiyandenywa, kobunu igortab katunisiet: si ye nyo ak kogongony, koyatyi ngunoto. 37Boiboen otwogichoto, che nyoru kiptaiyandanato koripsei ye nyo: amwawok iman ale, kermenigei inendet, ak chobei bichoto koteb ng’ony eng’ ole amisie, ak kwo kobai ichek. 38Ak ngo nyo eng’ ripset ne bo aeng’, anan ne bo somok, ak konyorta ko u noto, ko boiboen anyun otwogichoto. 39Ago onai ni ole, nda kiingen kiptaiyatab got sait ne nyonei chorindet, ta kiripsei, ta kima kobagaktoi gonnyi kobut chorindet. 40Ochopge ak okwek: amu nyonei Weritab chi eng’ sait ne mobwati.
41Kilenji anyun Petero, Kiptaiyandani, imwawech achek kalewenoni, anan imwachini bik tugul? 42Kole anyun Kiptaiyat, Ng’o anyun ribindet ne kiyani ak ko ng’om, ne indoi kiptaiyandennyi kotononji gonnyi, ak kogochi amitwogikwak che yamei eng’ betut ne makyin? 43Baibai otwogindonoto, ne nyoru kiptaiyandennyi koyaei ko u noto. 44Amwawok iman ale, indoi chichoto kotononji tugukyik tugul. 45Ago ngo mwa otwogindonoto eng’ muguleldanyi, kole, Igaegei kiptaiyandennyu masib koitu; ak kotoi kobir otwogik che murenik ak che tibik, ak koamis ak koeeiso, ak kobogit; 46weeksei anyun kiptaiyat ne bo otwogindonoto eng’ betut ne kama kogeni, ak eng’ sait ne manaei, ak kobir mising’, ak kopchechi kebebertanyi koboto che matinyei kayanet. 47Ak otwogindonoto, ne kiingen magetab kiptaiyandennyi, ama kochopgei, anan koyai ko u magennyi, kebire birutik che chang’; 48ago inendet ne kima kongen, ak koyai tuguk che nyoljin biret, kebirei birutik che ng’ering’en. Ak age tugul ne kigigochi che chang’, kotun kimage che chang’: ak inendet ne kigigochi korib tuguk che chang’, kotun kimage inendet che siirei.
Kaborunoik che iboru ole teptoi betusiek
49Kianyo awirji mat ng’ony; nee anyun ne ta amache, ngo kagolal nguno! 50Ago atinye kabatisanet ne tatun kibatisanena; kamarigitya ne tia agoi kosulda! 51Tos olen kianyo agonu kalyet konyo ng’ony? Amwawok ale, Achicha; ago besiet: 52amu koboch nguno kopchegei bik mutu che mi got agenge, surie somogu aeng’, ak kosurie aeng’ somok. 53Pchegei, kwanda ak werit, ak werit ak kwanda; kamet ak cheptanyi, ak chepto ak kamet; kametab werit ak osotiondennyi, ak osotiotab werit, ak kametab werit.
54Kimwachi anyun tuiyet kolenji, Ye ogeer kotogosune boldet cherongo, ole, Machei korobon; ak koyaak ko u noto anyun. 55Ak ye ogeer usonet ne usune murot ne bo tai, ole, Machei koit kemeut ne ng’wan; ak koyaak ko u noto. 56Chombilichu, ongen obesie ole teptoi ng’ony ak kipsengwet; kalya anyun si monai ole teptoi betusiechu?
57Kalya si moruoch okwege agobo tuguk che bo imanda? 58Amu ye ta obendi ak bunyondeng’ung’ taitab kiruogindet, igiilge obendi eng’ oret si kounden; si mata komutin taitab kiruogindet, ak komutyin kiruogindet askarindet, ak kotoorjin askarindet korgoret. 59Amwaun ale, Magoi imong’une oloto, agoi iyaakte sendeiyot ne bo let.
Currently Selected:
LUKA 12: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
