TAUNET 45
45
Koborjingei Josep tupchosiekyik
1Kima imuch Josep anyun komuita eng’ taitab bik tugul che kitonondos eng’ ole negite inendet; ak kibol kole, Omaande chi tugul kwo eng’ ole ami. Ak ma ng’et chi ne kimi tuwai ak Josep, ye king’ang’jigei inendet tupchosiekyik. 2Ak kirir kowaach: ak kigas Misrik, ak kigas gab Parao agichek. 3Ak kilenji Josep tupchosiekyik, A Josep; tos ta kosobei baba? Ak kima imuch kowolji tupchosiekyik; amu kiiyweis eng’ tainnyi. 4Ak kilenji Josep tupchosiekyik, Kaigai origu yu ami: Ak kirikta anyun. Ak kilenji, A tupcheng’wong’ Josep, ne kioalde kwo Misri. 5Noto anyun, amata oarogense, anan onerekyige okwege eng’ okwege, amu kioalda anyo oli: amu Kamuktaindet ne kiiyokwa andounenok si kobiit asor bik. 6Amu kigobiit rubet eng’ emet eng’ kenyisiechu aeng’: ak ta komi kenyisiek mutu alage, che mabiitu kabatisiet anan kesisiet. 7Ak kiiyokwa Kamuktaindet andounenok, si kobiit aribwok che ng’etu eng’ ng’ony, ak asoruok osopche eng’ sorunet ne o. 8Ara anyun, ki ma ko okwek che kiomutwa anyo oli, ago Kamuktaindet: ak kigoyaa aek kwanda eng’ Parao, ak aegu kiptaiyatab gonnyi tugul, ak bounindetab emet komugul ne bo Misri. 9Ara anyun, ochakte otogoste ole mi baba, ak olenji, Kamwa ko u ni wering’ung’ Josep, Kiyaa Kamuktaindet aek kiptaiyatab Misri komugul: choruge nyo ole ami, amegage: 10ak inyo imeny emetab Gosen, si inegitena, inye ak lagoguk, ak mochogoroniguk, ak kechireguk ak tuga cheguk, ak tuguk tugul che itinye: 11ak abain eng’ oloto si mebanan, inye ak gong’ung’, ak tugul che itinye; amu ta komi kenyisiek mutu che bwanei che bo rubet. 12Ak ogeero, keerei konyekwok, ak kogeerei Benjamin tupchennyu agine, ole, kutinnyu ne ng’alalwok. 13Ak omwachi baba teegistanyu tugul eng’ Misri, ak tuguk tugul che kaogeer; ak ochakte omutu baba konyo oli. 14Ak kisuub kaatitab ng’etab kamet Benjamin, ak kirir; ak kirir Benjamin agine komi kaatitab Josep. 15Ak king’utut tupchosiekyik tugul, ak korir: ak ye ibata noto kong’alalji tupchosiekyik inendet.
Koguurei Parao Jakobo ak bikab gonnyi kobwa komeng’is eng’ Misri
16Kigigas ng’alechato eng’ gotab Parao, kele, kagoit tupchosiekab Josep: ak kiibaibai Parao noto, koboto otwogikyik. 17Ak kilenji Parao Josep, Ilenji tupchosieguk, Oyai ni; oratyi sigirokwok tugukwok, ak obe, agoi emetab Kanan; 18ak omutu kwandang’wong’ ak bikab gorikwok, ak obwa ole ami: si agonok tuguk che miach che bo emetab Misri, ak oam akwaiyetab emet. 19Ara anyun, kaging’atak, oyai ko u ni; oib karisiek che bo emetab Misri amu lagokwok, ak osotikwok, ak obwa, omutu kwandang’wong’. 20Ago amobwat tugukwok; amu chekwok tuguk tugul che miachen che bo emetab Misri.
21Ak kiyai ko u noto werikab Israel: ak kiigochi Josep ichek karisiek, ko u ng’atutietab Parao, ak kiigochi amitwogik che amoti eng’ oret. 22Ak kiigochi chi age tugul ngoroik che kiwalawale alak; ago kiigochi Benjamin fedaisiek bogol somok, ak ngoroik mut che walawali. 23Ak kiiyokyi kwandanyi tuguk ko u ni; sigirok taman che kilae tuguk che miach che bo Misri, ak sigirok che iyuogik taman che kilae bek ak makatinik ak amitwogik alak che tun amonu eng’ oret. 24Kimonorisiechi anyun Josep tupchosiekyik, ak kiba: ak kilenji, Amonerekyinotege eng’ oret. 25Kiba anyun kotogosta eng’ Misri agoi koit emetab Kanan oldab Jakobo kwandanywa. 26Ak kimwachi kolenji, Ta kosobei Josep, ak inendet ko bounindetab emet komugul ne bo Misri. Ak kitanui muguleldab Jakobo, amu ma iyan icheget. 27Ak kimwachi ng’alek tugul che bo Josep, che kiga komwachi Josep werjoto: ak ye kingogeer Jakobo karisiek che kiiyok Josep kimutune inendet, kosob tamirmirietab Jakobo kwandanywa: 28ak kile Israel, Yamei ko u noto; ta kosobei werinnyu Josep; awendi anyun ageere inendet kotom amei.
Currently Selected:
TAUNET 45: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
