TAUNET 39
39
Komi Josep gotab Potipar
1Kigimut Josep anyun kochortagei kwo Misri; ak kial inendet Potipar kiboitiotab Parao, kiptaiyatab ribik, Misrindet, eng’ eunekab Ismaelik, che kiimuti inendet kwo oloto. 2Ak kimi Jehovah koboto Josep, ak ki chito ne iberurot; ak kimi gotab kiptaiyandennyi Misrindet. 3Ak kigeer kiptaiyandennyi kole, mi Jehovah koboto inendet, ak kiiberur Jehovah tuguk tugul che kiyaei. 4Ak kichamak Josep eng’ inendet, ak kiboisiechin inendet: ak kiinde Potipar inendet koek ribindetab boisiennyi, ak kiinde tugukyik tugul eunekyik. 5Ak kiiberur Jehovah gotab Misrindet amu Josep koboch ye kingoboi gonnyi ak tuguk tugul che bo Misrindonoto; ak kitebe berurtab Jehovah tuguk tugul che kitinyei eng’ gonnyi ak eng’ mbarenikyik. 6Ak kibagakyi tuguk tugul che kitinyei eunekab Josep; ak kima kota kongen tugukyik, kobate amitwogik che kiamei. Ak ki chito ne kararan kot Josep eng’ bortanyi.
7Ak kingobata tuguchoto, kogeer osotiotab kiptaiyandennyi Josep, ak kolenji, Ngeruiye tuwai. 8Ago kiesio, ak kolenji osotiotab kiptaiyandennyi, Keero, manaei kiptaiyandennyu agot tugukyik che aribe eng’ gonnyi, ak kigonde eunekyuk tugul che tinyei; 9mami age agoi ne o ne siira; ama mi kiy ne etena kobatenen inye, amu i osotiondennyi. Amuktoi ano anyun ayai tengegi te ni, ak achalwogenji Kamuktaindet? 10Ak kicham kong’alaljin osotiondonoto Josep betut age tugul, ago kima cham kogasyi koruiyo tuwai, anan kotebi ichegei. 11Kiwa anyun Josep eng’ betusiechoto koyai boisiennyi eng’ go; ak kima komi mureno age ne bo goyoto koboto inendet eng’ go. 12Kinam anyun ngoriennyi, ak kolenji, Ngeruiye tuwai: ak kimetochi Josep ngoriennyi eutab osotiondonoto, ak komwei komanda sang’. 13Ak ye kingogeer osotiondonoto kole, kagometochi ngoriet eunnyi ak komwei, 14koguur anyun murenik che bo gonnyi, ak kong’alalji kolenji, Ogeero, kigomutwech inendet Hebranindet kochotech; kanyo ole ami kole keruiye tuwai, ak kaawach: 15ak ye kangogas inendet awaach eng’ kutit ne o, kometoiywa ngoriennyi, ak komwei, komanda sang’.
16Ak kigonor ngorionoto kwonyoto agoi koit ga kiptaiyatab Josep. 17Ak kimwachi ng’alechato, kolenji, Konyonja kochota otwogindet Hebranindet ne kiimutwech: 18ak ye kingawaach eng’ kutit ne o, kometoiywa ngoriennyi, ak komwei, kwo sang’.
19Ak ye kingogas kiptaiyandennyi ng’alekab osotiondennyi, che kimwachi kolenji, Kiyaiywa ko u ni otwogindeng’ung’, konerech anyun ne ng’wan. 20Ak kinam Josep kiptaiyandennyi ak kotoorji korgoret, ole kigiratyin kimonjororinikab laitoriat: ak kitebe korgoronato. 21Ago kimi Jehovah koboto Josep, ak kiriregei inendet, ak kiigochi konyor chamet eng’ bounindetab korgoret. 22Ak kiigochi bounindetab korgoret Josep koboi kimonjororinik tugul che kimi korgoret; ak tuguk tugul che kigiyaei eng’ oloto, ko inendet ne kiyaei. 23Kima kota koribei bounindetab korgoret kiy age tugul ne kinamu Josep, amu kimi Jehovah koboto inendet; ak kiiberur Jehovah kiy age tugul ne kiyaei Josep.
Currently Selected:
TAUNET 39: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
