TAUNET 38
38
Ng’alek agobo Juda
1Kichortagei anyun Juda eng’ betusiechoto, kwo eng’ ole mi tupchosiekyik, agoi ye mi Adulamindet age ne keguure kainennyi Hira. 2Ak kigeer Juda eng’ oloto cheptab Kananindet age ne kiguure kainennyi Sua; ak kiitun, ak kiituiyogei ak inendet. 3Ak kimanach, ak kisich werit; ak kiguure kainennyi Er. 4Ak kimanach kogeny, kosich werit ak kiguure kainennyi Onan. 5Ak kisich werit kogeny, ak kiguure kainennyi Sela: ak kimi Juda Chesib ye kingesichei noto.
6Ak kiitunji Juda, Er werinnyi ne bo tai, osotiot, ne kigiguure kainennyi Tamar. 7Ak ki chi ne sogoran Er eng’ taitab Jehovah, inendet taita ne bo Juda; ak kibar Jehovah inendet. 8Ak kilenji Juda Onan, Mie otuiyegei ak osotiotab ng’etab komet, iichi, ilal matab ng’etab komet. 9Ak kinai Onan kole, Magimuchi kiityi inendet lagochoto kele kobunji; ak ye kingotuiyogei ak osotiotab ng’etab kamet, kotumji ng’ony, si mailaalji mat ng’etab kamet. 10Ak kiyait kioto kiyai eng’ taitab Jehovah: ak kibar inendet agine. 11Kolenji anyun Juda Tamar osotiotab werinnyi, Tebe gotab kwandang’ung’, ko i mosok, kot koeet Sela werinnyu: amu kile, Si mame agine ko u werichun tupcho. Kiwa Tamar anyun kotebe gotab kwandanyi.
12Ak kingosiirto betusiek alage kome cheptab Sua, kwondab Juda; ak kigigaigai Juda, ak kiwa ole mitei bik che tilei kororikab kechirekyik eng’ Timna, inendet koboto choruennyi Hira Adulamindet. 13Ak kigimwachi Tamar, kelenji, Keero, wendi Timna kwandab manong’otiot king’ung’, wendi kotilei kororikab kechirekyik. 14Kiireek anyun ngoroikyik che bo mosognatet, ak kiilaach ngoriet ne koi, kotugegei, ak kotaegei ngorionoto, ak kitebe ormarichetab nganaset ne kiguure Enaim, ne mi oret ne wendi Timna: amu kigeer kole kigoeet Sela, ak ma kigochi inendet kotun. 15Kingogeer Juda inendet, kolen abere chepkugonio, amu kiga tuch togennyi. 16Ak kiwa ole mi eng’ oret taban, ak kolenji, Kaigai icham kituiyegei; amu kima nai kole inendet ko osotiot ki bo werinnyi. Ak kilenji, Igona nee, si kobiit inyonja? 17Ak kile, Ayogun aruetab ng’oror ne bunu akwet. Ak kile, Igona nee koek kayosieng’ung’ agoi iyogu kegetwa? 18Ak kile, Nee kayosiet ne agonin? Ak kilenji, Ng’okseng’ung’ ak rogoet ak siaring’ung’ no iting’e eung’ung’. Ak kiigochi inendet tukchoto, kotuiyogei anyun ak inendet, ak kimanage inendet. 19Ak king’eet kwo, ak koreek ngoriennyi ne koi, ak kolaach ngoroikyik che bo mosognatet.
20Ak kiiyokto Juda aruetab ng’oror koyoktae eutab choruennyi Adulamindet, si kobiit koweekyi mosoganato tugukab kayosiennyi, ago kimanyor chichoto inendet. 21Kiteebe anyun Adulamindonoto murenikab oloto, kolenji, Mi ano chepkugoniot ne kimi oret taban eng’ Enaim? Kowolji ichek kolenji, Kima komi chepkugonio oli koboch keny. 22Ak kiweektagei kwo ole mi Juda ak kolenji, Ma anyoru inendet; ak kile murenikab oloto agichek, Kima komi chepkugonio olito koboch keny. 23Ak kile Juda, Ingobunji inendet, si ma kitewerech: keero, kaayoktaenen aruani, ago ma inyoru.
24Ak kingobata betusiek che negit arawek somok, kemwachi Juda kelenji, Kigoek chepkugonio Tamar osotiotab werit king’ung’; kot ko nguno, kotinyei moet ne bo ibetab ge. Ak kile Juda, Omutu kebeel. 25Ak ye kingo kagimut koyokto kemwachi kwandab manong’otiondennyi kelenji, kole, Kiamanage chitab kobo tuguchu atinye: ak kile, Inyit tuguchu kaigai si inai chitab kobo, ng’okset ak rogoet ak siarit. 26Kiinyit anyun, ak kole, Bo iman kwonyi kosiira; amu ma agochi inendet Sela werinnyu. Ak kimata kotuiyogei ak inendet kogeny.
27Ye kingoit betutab sigisiet, ogeero, kimi saramek moennyi. 28Ak ye kisigisiei, komoong’ lakwet age eut: ak kiratyi korgetab sigisio eunoto borowet ne birir, ak kole, Kagondoi nito. 29Ak ye kingogetita eunnyi, kesich ng’etab kamet: ak kile korgetab sigisio, Amu nee si imong’u eng’ kimnatet inyegei? Kigiguure anyun kainennyi Peres amu noto. 30Ak ye kingobata kesich ng’etab kamet ne tinyei borowet ne birir eng’ eut: ak kigiguure kainennyi Sera.
Currently Selected:
TAUNET 38: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
