TAUNET 29
29
Komi Jakobo ak Laban: kotunegei Jakobo ak Lea ak Rael
1King’eet anyun Jakobo kwo bandanyi, agoi koit emetab bikab kong’asis. 2Ak kigeer, ogeero, keringetab beek eng’ kewet, ak ogeero, kimi akwotisiek somogu che bo kechirek koruitos eng’ ole negite keringonoto bo beek; amu kiigoigochi akwotisiekwak eng’ keringonoto be beek: ak ki o koita ne kigigere keringet. 3Ak kigituiyechin yoto akwotisiek tugul che bo kechirek: ak kimilda koita ne kigigere keringet, si konaga beek kechirek, ak yeityo koweech koita kwo ole kami kogere keringet. 4Kiteebe anyun Jakobo kolenji, Obunu ano, tupchosiekyuk? Ak kilenji, Ki bo Haran. 5Ak kiteebe ichek kolenji, Tos ongen Laban weritab Nahor? Ak kile, Kingen inendet. 6Ak kiteebe kolenji, Chamegei? Ak kile ichek, Chamegei: keero, nyonei cheptanyi Rael, kogetu kechirek. 7Ak kile, Ogeero, ta ko bet, ak tom koyam sait ne kirote tuga: onage beek kechirek, yeityo okweri koba koaget. 8Ak kile, Magimuchi agoi kotuiyo akwotisiek tugul, si komilda koita eng’ keringet; yeityo kinage beek kechirek. 9Ak ye kingota kong’alaljindos, koit Rael kogetu kechirekab kwandanyi: amu inendet ne kiiyagi. 10Ak ye kingogeer Jakobo Rael cheptab Laban tupchetab kamet, koboto kechirek che bo Laban, tupchetab kamet, korikta Jakobo komilda koita eng’ keringet, ak kogoigoch akwetab kechirekab Laban tupchetab kamet. 11Ak king’utut Jakobo Rael, yeityo kowaach korir. 12Ak kilenji Jakobo Rael, Kitupche ak kwandang’ung’, a weritab Rebeka: kilabat anyun Rael komwachi kwandanyi.
13Ak kingogas Laban ng’alekab Jakobo weritab chepkamet, kolabat kotorokta inendet, ak konam koue eunekyik, kong’utut ak komut kwo gonnyi. Ak kimwachi Laban ng’alechu tugul. 14Ak kimwachi Laban kolenji, Angen komie ale, i kowekyuk ak banyekyuk. Ak kitebi ak inendet arawet agenge. 15Kimwachi anyun Laban Jakobo kolenji, Tos iota buch amu i tupchennyu? Mwawa, nee melektang’ung’? 16Kitinyei Laban tibik aeng’: kigiguure ne o Lea, ak kigiguure ne ming’in Rael. 17Ki kubusen konyek Lea, ak kitinyei borto ne kararan ak toget ne kararan Rael. 18Ak kicham Jakobo Rael: ak kolenji Laban, Mie aotin kenyisiek tisab, si atun Rael cheptang’ung’ ne ming’in. 19Ak kile Laban, Mie agonin kosiir ye kata agochini chi age: tebi kobota. 20Ak kiot Jakobo inendet kenyisiek tisab agobo Rael; ak kigeer ko u betusiek che ng’ering’ choto, amu chamnyet ne kiting’e inendet.
21Ak kilenji Jakobo Laban, Kona anyun osotiondennyu, amu kagogesgei betusiek, si kobiit kituiyegei. 22Ak kiiyum Laban bik tugul che bo yoto, ak koyai igorta. 23Ak ye kingo kagoimen, komutyi Laban Jakobo cheptanyi Lea; ak kiituiyogei. 24Ak kiigoito Laban Silba otwogindennyi kogochi Lea koek otwogindet. 25Ak kingo kagoeech, kogeer kole, Kaga Lea: kolenji Laban, Nee ni koiyaiywa? Kima aotin agobo Rael? Amu nee si igena? 26Ak kile Laban, Ma biteetab olinyo kitun ne ming’in kotom kitun ne o. 27Iwong’u betusiek tisab che bo Lea, si kobiit kegonin Rael agine, amu otwognatet ne tun iota kenyisiek alak tisab. 28Ak kiyai ko u noto Jakobo, kowong’ betusiechoto tisab, ak kiigochi Laban Jakobo cheptanyi Rael koek osotiondennyi. 29Ak kiigoito Laban otwogindennyi Bila kogochi Rael koek otwogindennyi. 30Ak kiituiyogei ak Rael agine, ak kichamei Rael kosiir Lea, ak kiot Jakobo Laban kenyisiek alak tisab.
31Ak kigeer Jehovah kole, kiwechei Lea, ak kiigochi anyun inendet iyotet: ago kisonen Rael. 32Ak kimanach anyun Lea, kosich werit, ak kiguure kainennyi Reuben: amu kile, Kageer Jehovah nyalildanyu; noto anyun imuchi kochama manong’otiondennyu nguno. 33Ak kimanach kogeny, ak kosich werit, ak kole, Amu kagas Jehovah weget ne kiwecha, kagona werit nito agine amu noto: ak kiguure kainennyi Simeon. 34Ak kimanach kogeny, ak kisich werit; ak kile, Ni ne igochin manong’otiondennyu kenamge, amu kaasikyi werik somok: ak kigiguure kainennyi Lawi amu noto. 35Ak kimanach kogeny, ak kisich werit: ak kile, Alosu Jehovah eng’ sigoni: kiguure kainennyi Juda amu noto; ak kitebi, mata kosich lagok.
Currently Selected:
TAUNET 29: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
