TAUNET 30
30
Logokab Jakobo
1Ak kingogeer Rael kole, mata kosikyi Jakobo lagok, koam ng’etkong’ Rael agobo chepkamet; ak kilenji Jakobo, Kona lagok, ak ngo megona, amee. 2Ak kigoromitu neregekab Jakobo eng’ Rael, kolenji, Tos ko ageeregei Kamuktaindet ne kaetenen iyotet? 3Kolenji Rael Jakobo, Keero, mi otwogindennyu Bila, otuiyegei ak inendet: si kobiit kosigis eng’ kutung’oikyuk, si anyor lagok eng’ inendet. 4Ak kiigochi otwogindennyi Bila koek osotiondennyi: ak kiituiyogei Jakobo ak inendet. 5Kimanach anyun Bila, ak kisikyi Jakobo werit. 6Ak kile Rael, Kagoyaiywa ne mie Kamuktaindet, ak kagogas kutinnyu ak kagogona werit: ak kiguure kainennyi Dan amu noto. 7Kimanach kogeny Bila otwogetab Rael, ak kisikyi Jakobo werit ne bo aeng’. 8Ak kile Rael, kagibelge ak chebeiyo eng’ kabeletab ge ne o, ak kaaterter: ak kiguure kainennyi Naptali.
9Kingo kagogeer Lea kole, mata kosich lagok inendet, konam Silba otwogindennyi kogochi Jakobo koek osotiondennyi. 10Ak kisikyi Silba otwogindetab Lea Jakobo werit. 11Ak kile Lea, Kagoek sobon ra! Ak kiguure kainennyi Gad. 12Ak kisikyi Silba otwogindetab Lea Jakobo werit ne bo aeng’. 13Ak kile Lea, Agasige! Amu tun kuurena tibik ne igasegei: ak kiguure kainennyi Aser.
14Ak kiwa Reuben eng’ betusiek che bo kesisietab nganok, ak kinyor tuguk che u labotik eng’ kewet, ak kiipchi kamet Lea. Kilenji Rael Lea eng’ yoto, Kaigai igona tuguchoto u labotik, cho kaibu wering’ung’. 15Ak kilenji, Tos igeere ile ma kiy ngirebena manong’otiondennyu, ak imache irebena labotikab werinnyu agichek? Ak kile Rael, Mie koru gong’ung’ rani amu labotikab wering’ung’. 16Ak ye kibunu Jakobo kewanin koskoleny kwo Lea kotorokta ak kolenji, Kanyol inyo iru gonnyu: amu kaalin eng’ labotikab werinnyu. Kiru anyun gonnyi kemounoto. 17Ak kigas Kamuktaindet Lea, ak kimanach, ak kisikyi Jakobo werit ne bo mut. 18Ak kile Lea, Kagogona Kamuktaindet melektanyu, amu kiagochi manong’otiondennyu otwogindennyu: ak kiguure kainennyi Isakar. 19Ak kimanach Lea kogeny, ak kisikyi Jakobo werit ne bo lo. 20Ak kile Lea, Kagogonwa Kamuktaindet kanyiok che miach; koboch nguno ko kagitebi ak manong’otiondennyu, amu kiasikyi werik lo; ak kiguure kainennyi Sebulun. 21Ak kingobata choto kosich chepto, ak kiguure kainennyi Dina. 22Ak kiibwat Kamuktaindet Rael, ak kigas Kiptaiyat inendet, ak kiitiach moennyi. 23Ak kimanach, ak kisich werit: ak kole, Kagoistawa Kamuktaindet chotisiennyu. 24Ak kiguure kainennyi Josep, ak kile, Ingoteswa Jehovah werit age.
25Ak kingobata chuto, ye kingo kagosich Rael Josep, kolenji Jakobo Laban, Unda awo, si kobiit awo oldanyu, agoi emennyu. 26Chamwa osotikyuk ak lagokyuk amu kiaotin agobo icheget, unda awo: amu ingen inye otwognatennyu ne kiaotin. 27Ak kilenji Laban, Ngo kianyoru mieindo eng’ taing’ung’, kiageer komie ale kigoberura Jehovah agobo inye. 28Ak kilenji, Mwawa melekto ne imache, si agonin. 29Ak kiwolji Jakobo kolenji, Ingen inye ole teptoi otet ne kiaotin, ak ateptab tuguk che kiayagi. 30Amu kiitinye che ng’ering’ ye kitom aitu, ak kigotesogis kochang’ait; ak kigoberurin Jehovah koboch ngab aitu: ak nguno anyun, ko tos anyoru kotia si achopchi tuguk bikab gonnyu?
Ortinwekab Jakobo che kicheng’ jinegei magornatet
31Ak kilenji Laban, Agonin nee? Ak kile Jakobo, Amegona kiy: ngot iyaiywa kii amache, amuchi ayagun akwotisieguk kogeny ak arib. 32Achute akwotisieguk tugul rani alewenoti, ak ateri artet age tugul ne ibisia ak ne busie, ak aruet age tugul ne tuui, ak ne ibisia, ak ne busie, eng’ ng’ororek: ak koek choto melektanyu. 33Ak tun baorianjina imandanyu, ye tun inyo agobo melektanyu ne mi taing’ung’: ak nginyorja ne ma ibisia ak ne ma busie eng’ ng’ororek, ak ne ma tuui eng’ arek, iit ile kigichorei. 34Ak kile Laban, Keero, ingoteb ko u ye kaimwa. 35Ak kiiter Laban betunoto kwesik che keronen ak che busienen, ak iyuogik tugul che ibisionen ak che busienen, ak age tugul ne kitinyei che leelach, ak arek tugul che tuuen, kokweri kogochi werikyik; 36ak kiwa Laban koistoegei Jakobo ne te bandab betusiek somok: ak kiiyaga Jakobo nego che bo Laban che kiituuch.
37Ak kibut Jakobo korokwek che bo ketik che u siliboik che tuonen, ak che u mobonik ak che u kurinik, ak kiibony kolegenitu si kotook ole leelachen eng’ kirokwechoto. 38Ak kilumda kirokwechoto kiibony kotoorji togomwek eng’ ole ee beek nego; ak korisyo ko kabwa nyo koee beek. 39Ak kirisyo nego eng’ taitab kirokwek, ak kiiyo nego che keronen ak che ibisionen ak che busienen. 40Ak kiitaban Jakobo arek, ak kitokyi nego ole mi che keronen ak tugul che tuuen eng’ negab Laban; ak kiinde akwotisiekyik oldanyua ichegei, ma ituiyo ak che bo Laban. 41Ak eng’ ui tugul ye ristos nego che neriotin, konde Jakobo kirokwek eng’ taitab konyekab nego eng’ togomwek, si korisyo eng’ oldab kirokwek: 42ak kima indochi nego che sogitiotin: kibunji anyun Laban choto sogitiotin, ak kobunji Jakobo che neriotin. 43Ak kiek magorio chichoto mising’ ak kitinyei akwotisiek che chang’, ak tibik che otwogik ak murenik che otwogik, ak tambesik, ak sigirok.
Currently Selected:
TAUNET 30: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
