TAUNET 28
28
Kowendi Jakobo kocheng’ei kwondo
1Kiguur anyun Isak Jakobo konyo koberur inendet, ak kotigon kolenji, Ametun cheptab Kanan. 2Ng’eet ak iwe Padan-aram, gotab Betuel kwandab komet; iwe itun chepto eng’ tibikab Laban ne tupcho ak komet. 3Ingoberurin Kamuktaindet ne bo Kamuktaet, ak koyabin eng’ iyotet ak kobarain, si kobiit iegu tuiyetab bik che chang’; 4ingogonin berurto ne bo Abraham, inye, ak lagoguk; si kobunjin emoni iwendote ko i toondet, ne kiigochi Kamuktaindet Abraham. 5Ak kiiyokto Isak Jakobo kwo: ak kiwa anyun agoi Padan-aram oldab Laban, weritab Betuel Siriaindet, ng’etab kametab Rebeka, kametab Jakobo ak Esau.
6Kigeer anyun Esau kole, kigoberur Isak Jakobo ak koyokto kwo Padan-aram, kwo kotunis eng’ olindo; ak kingoberuri kotigoni kolenjin, Ametun cheptab Kanan; 7ak kigeer kole kogas it Jakobo kwandanyi ak kamet, ak kakwa Padan-aram; 8ak ye kingogeer Esau kole, maiboiboi kwandanyi Isak tibikab Kanan; 9kwo anyun Esau oldab Ismael, kwo kotun osotiot age kosione chun, Maalat cheptab Ismael weritab Abraham, cheptab kametab Nebaiot.
Karuotitoetab Jakobo eng’ Bet-el
10Kiwa Jakobo anyun eng’ Beer-seba, kotokyigei Haran. 11Ak kiit komosta age, ak kiru yoto kemounoto, amu kiga kororokta asista; ak kinam koitab oloto kotiie met, ak koru konuuch. 12Ak kigeer eng’ karuotitoet long’eiywot ne kagitonon eng’ ng’ony, ne itei kipsengwet: ogeero, malaikaisiek che bo Kamuktaindet che kitogostae ak kochorunegei. 13Ak kitononi Jehovah eng’ ye negite inendet, ak kile, A Jehovah, Kamuktaindet ne bo kwandang’ung’ Abraham, A Kamuktaindet ne bo Isak: agonin emoni irue, koboto lagoguk; 14ak tun tenitu lagoguk temburiekab ng’ony, ak iyomu cherongo ak kong’asis, ak murot ne bo katam, ak murot ne bo tai: ak kiberuri ortinwek tugul che bo ng’ony eng’ inye ak eng’ lagoguk. 15Ak keero, ami koboten, ak aribotin eng’ oldo tugul ole iwendi, ak tun amutun inyo emoni kogeny; amu mametoin agoi tun ayai tugul che kaamwaun. 16Kigos anyun Jakobo eng’ ruondo, ak kole, Mi Jehovah olito iman; ago koma anai. 17Ak kiiywei, ak kole, Tia kaiyweisiet ne mi yu! Ni ko gotab Kamuktaindet iman, ak ko kurgetab kipsengwet.
18Ak king’eet Jakobo karon mising’, ak konam koita ne koga tiie metit, ak kolumda koek toloita, ak kirong’ji mwaita baragunnyi. 19Ak kitochi yoto kainet koguure Betel: ago kigiguure nganasanato eng’ tai Lus. 20Ak kiiyosio Jakobo, kole, Ngot koteb Kamuktaindet kobota, ak koribota eng’ orani awendi, ak kobaata, ak kogona ngoroik che alaachi, 21agoi tun aweekyige gotab baba eng’ kalyet, koek anyun Jehovah Kamuktaindennyu, 22ak koek gotab Kamuktaindet koita ni kalumde koek toloita: ak agonin iman kebeberta ne bo taman eng’ tuguk tugul che igona.
Currently Selected:
TAUNET 28: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
