TAUNET 27
27
Koberberi Jakobo Isak si konyor kaberuret
1Ak kingo kagoosit Isak, ak kiga kogorio konyekyik kot ko ma kogeerei kiy, koguur Esau werinnyi ne o, nyo kolenji, Werinnyu: ak kile, Ami yu. 2Ak kilenji, Keero, kaaositu, amangen betut ne amee. 3Kaigai, inam anyun kariguk, motieng’ung’ ak kwangeng’ung’, ak iwe kewanin, iibwa banyekab loget; 4ak inyo igerekwa koanyinyitu ko u ye achame, ak iibwa nyo aam; si koberurin muguleldanyu kotom amei.
5Ak kigasei Rebeka ye king’alaljin Isak werinnyi Esau. Kiwa Esau anyun loget kewanin si koipchi. 6Ak king’alalsechi Rebeka werinnyi Jakobo, kolenji, Keero, kaagas kong’alaldos kwandang’ung’ ak ng’etab komet Esau, kolenjin, 7Ibwan banyekab loget, ak inyo igerekwa koanyinyitu, si aam, ak aberurin eng’ taitab Jehovah kotom amei. 8Noto anyun werinnyu, kas kutinnyu, ko u ye ang’atin. 9Ui nguno ole mi akwet, igetwa arek aeng’ che miachen che bo ng’oror; si agerekyi kwandang’ung’ koanyinyitu, ko u che chamei: 10si iipchi kwandang’ung, koam, si koberurin kotom kome. 11Ak kilenji Jakobo kamennyi Rebeka, Keero, sabul Esau tupchennyu; ago tilil bortanyu. 12Abere imuchi kosapsaba baba, ak aegu kaberberindet eng’ inendet; si aek ne kisasei, ama anyoru berurto. 13Kilenji kamet, Ingobunja sasisieng’ung’, werinnyu: kas kutinnyu kityo, ak iwe igetwa. 14Kiwa anyun kogetyi kamet: ak kigerech kamet koanyinyitu, ko u che chamei kwandanyi. 15Ak kinam Rebeka ngoroik che kororon che bo Esau werinnyi ne o, che kitinyei eng’ go, ak kolaakyi Jakobo werinnyi ne ming’in. 16Ak kiratyi eunekyik ak kaatinnyi ole tilil, magatok che bo arekab ng’oror. 17Ak kiigochi Jakobo werinnyi banyechato anyiny ak makatiat, kondechi eunnyi, choto kiga kochob.
18Ak kiwa oldab kwandanyi, ak kole, Baba: ak kole, Ami yu; i ng’o, weri? 19Ak kilenji Jakobo kwandanyi, A Esau wering’ung’ ne bo tai; kaayai ko u ye kagemwawa: kaigai, ing’eet, itebi ng’ony, si iam tugukyuk che bo loget, si koberuran muguleldang’ung’. 20Ak kiteebe Isak werinnyi kolenji, Nee ni kesib iibu-o, werinnyu? Ak kole, Noto ne kaonwa Jehovah Kamuktaindeng’ung’. 21Ak kilenji Isak Jakobo, Kaigai, nyo rigu, si asapsabin, werinnyu, anai ngo i werinnyu Esau anan ngo ma i inendet. 22Kirikyi anyun Jakobo kwandanyi Isak; ak kosapsab, ak kole, Kutit ko bo Jakobo ago eunek ko bo Esau. 23Ak kima inyit inendet, amu ki sabulen eunekyik, ko u eunekab ng’etab kamet Esau: koberur anyun. 24Ak kiteebe kolenji, I werinnyu Esau iman? Kole, A inendet. 25Ak kilenji, Ibwa korik anyun, si aam banyek che kaibwa werinnyu, si koberurin muguleldanyu. Kiipchi anyun korik, ak kiam: ak kiipchi divaik, koee. 26Ak kilenji kwandanyi Isak, Nyo yu negit anyun, werinnyu, si ing’ututa. 27Ak kiwa korikta, ak kong’utut: ak king’uchi siptab ngoroikyik, ak kiiberur inendet, kile,
Keero, kergei siptab werinnyu
Ak ng’uunetab emet ne kiiberur Jehovah:
28Ingogonin Kamuktaindet rewotab kipsengwet,
Ak akwaiyetab ng’ony,
Ak chang’indab bek ak divaik:
29Ingootin bororiosiek,
Ak ingong’urukyin bororiosiek;
Egu kiptaiyat eng’ tupchosieguk,
Ak ingong’urukyin werikab komet;
Chubot inendet ne chubin,
Ak iberurot inendet ne iberurin.
30Ak kingo kagoges Isak kaberuret ne kiiberuri Jakobo, ak eng’ yoto ko kata kwo Jakobo eng’ ye mi kwandanyi, koit ng’etab kamet Esau kobunu loget. 31Kigerech agine banyek koanyinyitu, ak koipchi kwandanyi: ak kilenji kwandanyi, Ingong’eet anyun baba, si koam banyek che kaipchin werinnyi, si koberura muguleldang’ung’. 32Koteebe anyun kwandanyi Isak kolenji, I ng’o inye? Ak kile, A wering’ung’, ne o, Esau. 33Ak kibotan Isak mising’ kot, ak kole, Ng’o anyun ne kacheng’ tugukab loget ak koibwa, ak kaamisie kotom iitu, ak kaaberur inendet? Ee, ak koberurot inendet. 34Ak kingogas Esau ng’alekab kwandanyi, kote eng’ kateet ne o eng’ ng’wanindo, ak kolenji kwandanyi, Iberura agane, ee, baba. 35Ak kile, Kanyo ng’etab komet eng’ ng’alset, nyo koreb berurtang’ung’. 36Ak kole, Tos kima kitochi kainennyi Jakobo komie? Amu kagotila let konyil aeng’: kirebena etunatetab sigennyu; ak keero, kagorebena nguno berurtanyu. Ak kole, Tos ma itukwa berurto? 37Kiwolji Isak Esau kolenji, Kayai inendet koek kiptaiyandeng’ung’, ak kaagochi tupchosiekyik tugul koek otwogikyik; ak kaagimit inendet eng’ bek ak kivaik: ara, ta ayaun nee anyun, werinnyu? 38Ak kilenji Esau kwandanyi, Tos itinye berurto agenge kityo, baba? Iberura agenge, ee, baba. Kiwaach anyun Esau, korir. 39Ak kiwolji Isak kwandanyi kolenji,
Keero, looitu meng’oteng’ung’ eng’ oldab akwaiyetab ng’ony,
Ak eng’ rewotab kipsengwetisiek ne bunu barak;
40Ak isobe rotweng’ung’ bo chok,
ak iote ng’etab komet;
Ak ye itiagage,
Ilelekte bounatennyi koistoegei kaating’ung’.
41Ak kiwech Esau Jakobo amu berurto ne kiiberur kwandanyi: ak kile Esau eng’ muguleldanyi, kagorik betusiek che kerirjin baba; si abar tupchennyu Jakobo. 42Ak kigimwachi Rebeka ng’alekab Esau werinnyi ne o; ak kiiyokto keguur Jakobo werinnyi ne ming’in, ak kinyo kolenji inendet, Keero, igoigoegei Esau ng’etab komet, kobwatin, kole, tun kobarin. 43Eng’ noto anyun werinnyu, kas ng’olyondennyu; ng’eet, mwechi oldab Laban werit ne kitupche ne menyei Haran; 44ak iwe otebi ak inendet eng’ oloto, betusiek che ng’ering’ agoi kogesgei neregek che ng’wonen che bo ng’etab komet; 45agoi kogesgei neregekab ng’etab komet eng’ inye, ak koutie kit ne kiiyachi inendet: si ayok chi nyo koguurin eng’ oloto: amu nee si obegunena okwek tuwai eng’ betut agenge?
46Kolenji anyun Rebeka Isak, Ageere kaiimetab ge betusiechu amu tibikab Het: ngot kotun Jakobo chepto eng’ tibikab Het che u tipchu bo emoni, kotilei nee sobondanyu?
Currently Selected:
TAUNET 27: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
