BOISIONIKAB CHE KIYOKTOI 28
28
Komi Paulo Melita
1Ak ye kingo kagesopche, kenai anyun kele kigiguure emonoto kiikwen beek Melita. 2Ak kiyaiywech ne mie mising’ bikab emonoto: amu kiilaal mat, ak kotaachech achek tugul, amu kimi ropta ak kaititiet. 3Ago ye kingo kagoyum Paulo ratutiet ne bo kwenik, ak konde ma, komong’ anyun erenet amu mat, ak kotaachigei eunnyi. 4Ak kingogeer bikab emonoto erenet kosonginini eng’ eut, kolenjigei, Rumin chichi iman, agot nga kagosorgei eng’ nyanjet, ko machamjin inendet Imanda kosob. 5Ago kilelekta tionyoto kwo ma, ama am kiy Paulo. 6Ago kilen ichek abere tos ibwa, anan kobut ak kome ngunoto: ak ye kiga kogenis keny, ama kogeer kiy ne ya konyonji inendet, kowal kabwatutikwak, ak komwa kole, Inendet ko cheptalelit.
7Kimi anyun eng’ ole negite yoto, korotinwekab chito ne o ne bo emonoto kiikwen beek, ne kigiguure Publio; ne kitaachech eng’ chamnyet, ak koyaech keegu toekyik eng’ betusiek somok. 8Ak kimiani kwandab Publio koamei eset ak miandab moet ne bendi korotik: ak kiwa Paulo gotab chichoto, ak kosa, ak kogonoor eunekyik inendet ak kosoob. 9Ak kingo kagoyaak nito kobwa agichek che kimiandos eng’ kakwembeiyondonoto, ak kigisoob: 10ak kigonyitech eng’ teegisto ne o; ak ye kingebe eng’ melit, kondewech melit tuguk che te che kigimakyinige.
11Ak kingobata arawek somogu ketau banda eng’ melit ne bo Aleksandria, ne kiga tebe kakwembeiyondonoto eng’ betusiekab kaititiet, ne kaborunennyi ko ki Saramek che Muren. 12Ak kingeit Surakusa, ketebe yoto betusiek somok. 13Ak keng’eetye eng’ oloto kebe keyiematege, kot keit Regio: ak kingobata betut agenge kous usonetab murot ne bo tai, ak eng’ betut ne bo aeng’ keit Puteoli: 14ole kiginyorji tupchosiek, ak kiigaigaech ketebi ak icheget betusiek tisab: keit anyun Rom. 15Ak kingogas tupchosiek agobo achek eng’ oloto, kobwa kotorokwech kot koit Siret ne bo Apio, ak Gorik Somok che bo Toek: che kingogeer Paulo, komwachi Jehovah kongoi, ak konyiganit.
16Ak kingeit Rom, kechamji Paulo kotebi inegei koboto askarindet ne kiribei inendet.
Koguurei Paulo Yohudik kobwa ole mi eng’ Rom
17Ak kingo kagosiirto betusiek somogu koguur bik che eechen che bo Yahudik kotuiyo: ak kingo kagoyumgei, kolenji ichek, Che kitupche, agot ngo mayai ane kiy ne ya eng’ bik, anan eng’ bitonwekab kwanisiekyok, ko kigindea eunekab Romanik eng’ Jerusalem, ko a kimonjororio: 18ak kimachei kotiacha ichek, ko kagogin ng’alekyuk, amu kima komi kiy eng’ ane ne nyoljin meet. 19Ago ye kingogirinda Yahudik ng’olyondonoto, ageer ale kanyol arirji Kaisari; ma kele kiatinye kiy ne ang’andoe bororiennyu. 20Amu nito anyun kasomok obwa kegeerge ak keng’alal tugul: amu a ratat eng’ sirimi agobo kamang’unetab Israel.
21Ak kilenji inendet, Tomo kenyoru baronok che bunu Judea agobo inye, anan konyo oli age eng’ tupchosiek ak koboruech anan komwa kiy ne ya agobo inye. 22Ago kimache kegasenen kiy ne ibwati: amu kigonaak eng’ achek kele kimwaoti ne ya agobo bitonito eng’ komosta age tugul.
23Ak ye kingo kagochob betut, kobwanji inendet che chang’ eng’ got ne kimenyei; ak kiiborsechi komie, kobaoriani agobo bounatetab Jehovah, ak kogiiljingei koneti ichek agobo Jesu, eng’ Ng’atutiet ne bo Musa, ak eng’ maotik, koboch karon agoi koimen. 24Ak kiiyan alak tuguk che kigimwaei, ko ma iyan alak. 25Ak ye kimata kogasyin ichegei, koba, ko kagomwa Paulo ng’olyot agenge, kole, Kimwachi komie Tamirmiriet ne Tilil kwanisiekwok eng’ maotiot Isaia, kole,
26Ui oldab bichu, ak imwa ile,
Eng’ kaset ogase, ago moguitosi agot kitigin;
Ak eng’ keeret ogeere, ago mobestosi agot kitigin:
27Amu kwolilenotin mugulelwekab bichu,
Ak magastoi komie itikwak,
Ak kiger icheget konyekwak;
Si mageer eng’ konyekwak,
Anan kogas eng’ itikwak,
Anan koguiyo eng’ mugulelwekwak,
Si koweek kogeny,
Ak asoob ichek.
28Ingonaak anyun eng’ okwek, ole, kiyokyin yetunoni bo Jehovah Bororiosiek: kasei agichek. 29Ak ye kingo kagomwa ng’alechu, koba Yahudik, koteebategei ichegei mising’.
Ng’alek che bo ley
30Ak kimeny eng’ kenyisiek aeng’ gonnyi ne kialei meng’et, ak kitaach tugul che kibwanjin inendet, 31koamdoi agobo bounatetab Jehovah, ak koneti tuguk agobo Kiptaiyat Jesu Kristo eng’ nyiganatet tugul, ama ete chi.
END OF BOOK
Currently Selected:
BOISIONIKAB CHE KIYOKTOI 28: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
