BOISIONIKAB CHE KIYOKTOI 27
27
Bandab Paulo agoi Romi; agoi krete
1Ak kingo katetil ng’alek kele kebun melit kebe Italia, kigigochi Julio kiptaiyatab bogol, ne bo lugetab Augusto, Paulo ak kimonjororinik alak. 2Kelany anyun melit ne bo Adramutio, ne kimachei kwo komoswek alak che mi ngegutab Asia, ak kebe nyanjet ak Aristarko Makedonianindet ne bo Tesalonike. 3Ak eng’ betut ne bo aeng’ keit Sidon: ak kirire Julio Paulo, ak kochamji kwo ole mi choronokyik si konyor toretet. 4Ak kigibun melit eng’ oloto ak kigitektaege Kupro, amu kigirindaech usonet. 5Ak ye kiga kebun melit kelande eng’ nyanjet ne bo Kilikia ak Pampulia, keit Mura, nganaset ne bo Lukia. 6Ak kinyorji oloto kiptaiyatab bogol melit ne bo Aleksandria, ne wendi Italia; kondeech melit anyun.
7Ak ye kiga kebe mutyo eng’ melit eng’ betusiek che chang’, agoi keit Kanido eng’ bichiindo, koranyech usonet, kebe ketektaege Krete, ne itorjingei Salmone; 8ak kigibun ngegut eng’ bichiindo agoi keit komosta age ne kiguure Luukwek che Miach; ole negite nganasetab Lasea.
Bandab Paulo agoi Melita: usonet ne o ak ng’emetab melit
9Ak kingo kagosiirto betusiek che chang’, ak kobichiit bandab nyanjet, amu kiga kosiirto betusiekab Karugutetab ge, koteechi Paulo ichek, 10kolenji, Murenju, kaageer ale mitei ng’oiyondit ak luset eng’ banito bo nyanjet, ma ne bo melit kityo ak tuguk che mi orit, ago ne bo sobonwekyok agichek. 11Ago kigas kiptaiyatab bogol ng’alekab bounindet ak chitab kobo melit, kosiir ng’alek che kamwaei Paulo. 12Ak amu kima ko luita ne yamei ketebe eng’ betusiekab kaititiet, komwa che chang’ kole, Mie kota kinaakte eng’ olito, tamangab keit Poinike, si ketebe oloto eng’ betusiekab kaititiet; noto ko ki luitab Krete, ne kitokyingei murot ne bo katam kitigin ak murot ne bo tai kitigin.
13Ak ye kingous mutyo usonet ne bunu komostab tai, kolen ichek kagonyor kit ne kamachei, konem nanget ak kobun tabandab Krete, ye negit ngegut. 14Ak ne matenit kous chebwiwichet, ne kiguure Eurakulo: 15ak ye kingenam melit, ak mata komuch kotab usonet, keistochige, ak koonech. 16Ak kingeruai ketektaatege emet ne kiikwen beek ne kiguure Kauda, kimuch eng’ bichiindo keganab moinget ne ming’in: 17ak kingo kagotogosune moingonoto, koboisie tuguk che kitorete, koratune melit orit; ak kingoiywei ichek kole si magiwirji Surti, kochoor angok, ak kion usonet koba. 18Ak ye kita keboisiei mising’ eng’ kagiiletab ge, ketabe usonoto o, ketau eng’ betut ne bo aeng’ kewirte tuguk che mi melit, 19ak eng’ betutab somok kowirta icheget eng’ eunekwak tuguk che kiboisie eng’ melit. 20Ak ye kimata koluuchech asista anan kecheik eng’ betusiek che chang’, ak kogiichech usonet ne o, kogesgei anyun kamang’unet ne kigilen, tos kisoruech.
21Ak ye kiga kotar betusiek che chang’ ama amis, kotonon Paulo eng’ kwenunywa, ak kole, Murenju, kita mie nda kigogasa, ak kita mie nda kima obwa eng’ Krete, ak onyoru nyalili ak lusoni. 22Amwawok nguno ale onyiganitu: amu mami chi ne meei eng’ okwek, kobate melit. 23Amu kotonon malaikaiyatab Jehovah eng’ ye negitena kemouni, ne a nenyi, ak ne aote, 24kole, Ameiyweisie, Paulo; kanyol itonon eng’ taitab Kaisari: ak keero, kagogonin Jehovah tugul che obendi tugul eng’ melit. 25Ara anyun, murenju, onyiganitu: amu ayani Jehovah, ale yaaksei ko u ye kogomwawa. 26Ago kanyol kewirjech emet ne kiikwen beek.
27Ago ye kingoit kemoutab taman ak ang’wan, ye kita kowirjinech usonet komosi ak komosi eng’ nyanjet ne kiguure Adria, ko kiibwati bikab melit olo bo kemoi kwen kolen kagorikta emet age; 28ak kiirooch beek kit ne kikwaise, ak konyor kakwautik artam; ak kita koba kitigin korooch beek kogeny kioto, konyor kakwautik sosom. 29Ak kingoiywei ichek kole abere togot kewirjech bitet ne mi ruandosiek, kounda nangaisiek ang’wan eng’ melit olo bo let, kosom kole nda kaech. 30Ak ye kimachei bikab melit komwaei kobagakta melit, ko kagochoorta moinget kwo nyanjet, kolen si kobwat bik kole wirtoi ichek nangaisiek eng’ olo bo melit tai, 31kolenji Paulo kiptaiyatab bogol ak askarik, Ngot ko matebi bichu eng’ melit, ko momuchi osopche. 32Kotil anyun askarik rogoosiek che bo moinget, ak kobagakta kobut. 33Ak ye kimachei koeech, kogaigai Paulo ichek tugul koamis, kolenjin, Rani ko betutab taman ak ang’wan ogeni ak ko ta orugutige, ak tom oam kiy. 34Noto anyun asomok ale oamisie: amu nito sobeng’wong’; amu mabetei sumeiyot agot agenge eng’ metitab chi age tugul eng’ okwek. 35Ak ye kingo kagomwa ko u noto, ak konam makatiat, kogochi Jehovah kongoi eng’ taitab tugul: ak kiton, ak kotoi koamis. 36Konyiganitu anyun ichek tugul, ak koamis. 37Ak achek tugul ko kigiite bik bogol aeng’ ak tamanwogik tisab ak lo eng’ melit. 38Ak kingo kagobiyong’so, kowirji nyanjet nganok si kowisisit melit.
39Ak kingo kagoeech, ko ma konai emonoto: kigeer luita age ne tinyei ng’aniek, ne kiibwati kole, ngomugak kokweri melit kwo oloto. 40Kotiach anyun nangaisiek, ak kobagakta eng’ nyanjet, ak kotiach rogoosiek che kigirate baoinik che kindochine melit; ak ye kingo kagonamji barak anget ne mi olin bo tai kotokyi usonet, koba ngegut. 41Ago kingoit ye tuiyechin nyanjosiek aeng’u, kochunda ichek melit korieb ng’aniek; ak kinamak melit ole bo tai kot ko ma kotwau, ago kitoi melit kong’asur eng’ ole bo let eng’ kimnatetab mildaetab ge ne bo beek.
42Ak ng’olyot ne kitinyei askarik ko kobar kimonjororinik, kole si mabir beek alage eng’ ichek, kochililyo. 43Ago amu kimachei kiptaiyatab bogol kosor Paulo, koeete ichek si mayai kit ne kamachei; ak kong’at ichek che kiimuchi kobirot beek kole, kowirjigei nyanjet, si kosib koit ngegut: 44ak kibun alage baoinik, kobun alage tuguk alak che bo melit. Kolong’ji anyun tugul emet kochamegei.
Currently Selected:
BOISIONIKAB CHE KIYOKTOI 27: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
