BOISIONIKAB CHE KIYOKTOI 20
20
Paulo eng’ Makedonia, eng’ emetab Yunanik, ak eng’ Troa
1Ak kingobata bolatet, ko kagoyokto Paulo alamalyet kobwa ak kogimit ichek, koyomisgei, si kwo Makedonia. 2Ak kingo kagobun komoswechoto, ko kagogimit ichek eng’ ng’alek che chang’, koit emetab Yunanik. 3Ak kingo kagotebe oloto arawek somok, kochob Yahudik ng’alek eng’ ung’ot agobo inendet, ye kimachei kobun melit kwo Suria, komachei kole koweegegei oretab Makedonia. 4Ak kiba koboto inendet agoi Asia Sopatro ne bo Berea, ne bo gab Puro; ak che bo Tesalonikek Aristarko ak Sekundo; ak Gaio ne bo Derbe, ak Timoteo; ak Tukiko ak Tropimo che bo Asia. 5Ago kiga kondo chuto, ak kiigenech eng’ Troa. 6Ak kigibun melit eng’ Pilipi ko kagobata betusiekab makatiat ne ma kinde mermerek, ak keit ole mi ichek eng’ Troa eng’ betusiek mut; ole kigitebe eng’ betusiek tisab.
Eutuko
7Ak eng’ betutab tai ne bo wigit ye kiga kiyumge si kebutul makatiat, koamji Paulo ichek, ye kimachei kwo eng’ betut ne bo aeng’; kong’alal koek keny agoi kemoi kwen. 8Ak kimi taisiek che chang’ eng’ got ne bo barak, ole kiga kiyumjige. 9Ak kitebe tirisiet neranet age ne kigiguure Eutuko ak kibirto met; ak kita koamji Paulo koek keny, ak kingobirto met, kotururtogei kong’eete got ne bo somok, ak kigisut ko kagome. 10Ak kichortagei Paulo, ak koitaegei inendet, ak kosuube eunekyik, komwa kole, Moiimge; amu ta kosobei. 11Ak kingotogosta, ak kobutul makatiat, ak koam, ak kong’alal keny koboto ichek, agoi koeech, kwo anyun. 12Ak kiimut nerananato ko kagosob, ak kinyor kagaigaet ne o.
Banda ne wendi Mileto
13Ago kigindoi achek kebe melit, kebe Asos, amu kigimache kimut Paulo eng’ oloto: amu kiga kong’at inendet ko u noto, komach inendet kole kobun keldo. 14Ak ye kingetuiye ak inendet eng’ Asos, kimut inendet konyo melit, ak keit Mitulene. 15Ak kigibe eng’ oloto kebun melit, keit Kio eng’ betut ne bo tai; ak betut ne bo aeng’ keit Samo; ak betut ne bo somok keit Mileto. 16Amu kiga kobegechi Paulo kwo kosiirtoe Epeso eng’ melit, si ma igagei eng’ Asia; amu kiigirgiri, kole tamangab koit Jerusalem eng’ betutab Pentekost.
Ng’alekab Paulo che kimwachine saisere boisiekab Epeso eng’ Mileto
17Ak kiiyokto eng’ Mileto keguur boisiekab kaniset eng’ Epeso. 18Ak ye kingobwa ole mi inendet, kolenji, Ongen okweget koboch betut ne bo tai ye kingatau atiech Asia, ole kiateptoi kobotok tugul, 19aboisiechini Kiptaiyat eng’ kaming’inetab ge tugul, ak eng’ beekab kong’, ak eng’ tiemisiosiek che kibwanja eng’ chobutik che bo ung’ot che bo Yahudik; 20ko u ye kima ariny amwawok kiy age tugul ne imuchi kotoretok, ak anetak eng’ taitab bik, ak ang’eete got age agoi got age, 21abaorianjini Yahudik koboto Yunanik sigunet eng’ taitab Jehovah ak kayanet eng’ Kiptaiyandennyo Jesu Kristo. 22Ak ogeer anyun, nguno, awendi Jerusalem korata tamirmiriet, amangen tuguk che bwanjina eng’ oloto: 23kobate kityo baorianjina Tamirmiriet ne Tilil eng’ nganaset age tugul, kolen, igena ratisiosiek ak nyalilwogik. 24Ago maiiti sobondanyu ale kiy ne achame kot, si kobiit ages bandanyu, ak boisiet ne kiataach eng’ Kiptaiyat Jesu, abaorianji logoiywek che miach che bo mieindab Jehovah.
25Ak nguno anyun, ogeero, angen ale okwek tugul che kiaamdaate bounatetab Jehovah kwenung’wong’, koma ogeere togennyu kogeny. 26Abaoriani anyun eng’ taing’wong’ betuni, ale, a tilil eng’ korotikab bik tugul. 27Amu ma ariny amwawok magutik tugul che bo Jehovah. 28Oripge anyun okweget, koboto akwet tugul, ne kigonok Tamirmiriet ne Tilil oegu ribik, obai kanisetab Jehovah, ne kiale korotikyik. 29Angen ale ye kaawe komong’jok suik che koromen, ama rire akwet: 30ak tun ng’eetos alage eng’ kwenung’wong’ komwaei ng’alek che imaasi bich, si kochuut alamalyet kosub ichek. 31Oripse anyun, ak obwat ole ma abagakte atigon chi age tugul eng’ beekab kong’ eng’ kenyisiek somok kemoi ak bet.
32Ara anyun, kabagakyok nguno eutab Jehovah, ak ng’olyotab mieindanyi, ne imuchi koteechak, ak kogonok borotet koboto ichek tugul che kitilili. 33Ma agase miat feda che bo chi age tugul, anan tahabu, anan ngoroik. 34Ongen okwek ole kibois eunechu agobo tuguk che kianyalili, ak agobo ichek che kimi kobota. 35Kiagonok kaborunet eng’ tuguk tugul, ale ye oboisiei ko nyolu otoret che matinyei kimnatet, ak obwati ng’alekab Kiptaiyat Jesu, ko u ye kimwa inendet kole, Tinyei boiboiyet kagoitoet kosiir taaget.
36Ak kingo kagomwa ko u noto, kogutuny, kosa koboto ichek tugul. 37Ak kiririo ichek tugul mising’, ak kosuub kaatitab Paulo, ak kong’utut inendet, 38koarogendos kosiir agobo ng’olyot ne kiga komwa, kole matun kogeerei togennyi kogeny. Ak kiiyomis inendet kowendi kolanyei melit.
Currently Selected:
BOISIONIKAB CHE KIYOKTOI 20: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
