BOISIONIKAB CHE KIYOKTOI 1
1
Ng’alek che kindoune
1Ee Teopilo, kiatet eng’ baruet ne bo tai, tugul che kitoi Jesu koyai ak konet, 2agoi betut ne kigimuti kwo barak, ye kingo kagogochi ng’atutiet eng’ Tamirmiriet ne Tilil che kiyoktoi che kiga kolewen, 3icheget che kiiborjigei kosobei ye kingobata nyalildanyi, eng’ kaborunoik che chang’, kong’ang’jingei ichek eng’ betusiek artam, ak kong’alaljin ichek agobo tuguk che bo bounatetab Jehovah: 4ak, kingo kagoyumgei koboto icheget, kong’at kolenji, amat obe eng’ Jerusalem, ago ogen kayomiset ne bo Kwanda, noto kiogasena: 5amu kiibatisanis Johana iman eng’ beek; ago kibatisanok eng’ Tamirmiriet ne Tilil kotom kogesgei betusiek che chang’.
Kotogostoi Jesu
6Noto anyun, ye kingo kagoyumgei, koteebe inendet, kolenji, Kiptaiyandani, iweekyini Israel bounatet eng’ betusiechuto? 7Kolenji ichek, Mabotok onai betusiek anan kenyisiek, che kigonde Kwanda eng’ bounatennyi inegei. 8Ago otaache kamuktaet, ye tun kanyonjok Tamirmiriet ne Tilil: ak oegu baorinikyuk eng’ Jerusalem, ak eng’ Judea komugul ak Samaria, ak agoi tabandab ng’ony. 9Ak ye kingo kagomwa tuguchuto, ye kita kogeerei kimut inendet kwo barak; ak kitaach boldet inendet ak kobetito eng’ tainywa.
10Ak ye kingota konyali kipsengwet kochiiljin kong’ kota kowendi, ogeero, kitononso bik aeng’u eng’ ye negite icheget kolaachi ngoroik che leelachen: 11che kimwa agichek, kole, Okwek bikab Galili, kalya si otononse ak onyali kipsengwet? Tun nyonei Jesu nito, ne kagimut kwo kipsengwet kobunei oling’wong’, ko u yu kogeere kowendi kipsengwet.
Keleweni ne kiyoktoi ne bo taman ak aeng’
12Koweek anyun koba Jerusalem kobunu tulwet ne kiguure tulwetab Emitik, ne negite Jerusalem, ne yamegei ak bandab betutab sabato. 13Ye kingo kagoba go, kolany got ne bo barak, ole kitebe; agot Petero, Johana, Jakobo, Andrea, Pilipu, Tomas, Bartolomayo, Matayo, Jakobo ne bo gab Alpayo, Simon Selote, ak Judas ne bo gab Jakobo. 14Kitebi chu tugul eng’ kabwatet agenge eng’ kagiiletab ge ne bo saet, koboto kobogorisiek, ak Maria kametab Jesu, ak tupchosiekab Jesu.
15Ak kitonon Petero eng’ kwenutab che tupcho eng’ betusiechoto (ki chang’ bik che kiga tuiyo, ki olo bo bogol agenge ak tiptem), ak kile, 16Che kitupche, ko nyolu kosulda sirutik, che kiga mwa Tamirmiriet ne Tilil eng’ tai eng’ kutitab Daudi agobo Judas, ne ki kandoindet ne kiindochin ichek che kinamei Jesu. 17Amu kigiititech, ak kinyor kebebertanyi eng’ boisioni.
( 18Ak kinyor chichi mbaret eng’ melektab tengektanyi; ak kingobut kosieb mo, kobetak moet, komong’ agutanikyik tugul. 19Ak kinaak ng’olyondonoto eng’ tugul che menyei Jerusalem; kot keguure mbaranato Akeldama eng’ kutinywa, noto ko, Mbaret ne bo korotik.) 20Amu sirat eng’ bukuit ne bo Tienwogikab Kalosunet, kole,
Ingoguber ole menyei,
Ak amat komeny chi oloto: ak
Ingonam chito age boisiennyi.
21Ingobiit age eng’ bik che kicham kebendoti tugul eng’ betusiek tugul ye kicham komong’u Kiptaiyat Jesu ak komandoi eng’ kwenunnyo, 22kotaune kabatisanetab Johana, agoi betut ne kigimuti kwo barak kobunei olinyo, kanyol koek age eng’ bichuto baoriat kobotech agobo ng’eetyennyi.
23Ak kilewen bik aeng’, Josep ne kigiguure Barsaba, ne kigiguure kainennyi ne bo aeng’ Justo, ak Matia. 24Ak kisa, kole, Inye, Kiptaiyat, ne ingen mugulelwekab bik tugul, iboruech eng’ bichu aeng’, ne kailewen, 25si kobiit konam kebeberta eng’ boisioni ak kayoktaoni, ne kiibute Judas, si kobiit kwo oldanyi. 26Ak kiser barbarek agobo ichek; ak kiibutyi barbariat Matia; ak kigiitito che kiyoktoi taman ak agenge.
Currently Selected:
BOISIONIKAB CHE KIYOKTOI 1: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
