KORINTOEK 2 2
2
1Ago kiatil ni ale ma anyonjinok kogeny eng’ arogenet. 2Amu ngot agonok oarogense, ko ng’o anyun ne iboiboa, kobate inendet ne kaagochi koarogen? 3Ak kiasirwak ng’olyondonito, si ma ye anyo, ko matinye arogenet eng’ ichek che kanyolja agasege; atinye kamang’unet eng’ okwek tugul, ale boiboiyennyu ko neng’wong’ okwek tugul. 4Amu kiasirwak eng’ bichiindo ne o ak ng’wanindab muguleldo koboto beekab kong’ che chang’; ma si oarogense, ago si kobiit onai chamnyet ne ating’enok mising’ kosiir.
Mie kenyochi kaat ne sigu
5Ago ngot ko koing’eet chi arogenet, ko koing’eet arogenet, ma eng’ ane, ago eng’ kebeber, (si magonok ane nyigisindo ne siirei) eng’ achek tugul. 6Yamei chito ne u nito kagikyinoni kitilji bik che chang’; 7ago kaigai onyochi kaat inendet ak ogaigai, si malugui, eng’ oret age tugul, chito ne u noto arogenennyi ne siirtoot. 8Noto anyun asomok ale ogimit chamnyeng’wong’ eng’ inendet. 9Amu kiasir agobo ng’olyondonito, ale anaak komie ngogase it eng’ tuguk tugul. 10Ago inendet ne onyochini kaat kiy age tugul, anyochini kaat agane: amu noto ne kianyochi kaat agane, ngo kianyochi kaat eng’ kiy age tugul, ko kianyochi kaat agobo okwek eng’ taitab Kristo; 11si manyor Setani kit ne iterterenech: amu ma ki berberen, ago kingen chobutikyik.
Tiemisiosiek ak keterterosiek agobo Logoiywek che Miach
12Ak ye kinganyo Troa amu logoiywek che miach che bo Kristo, ak ye kingeyatwa kurget eng’ Kiptaiyat, 13kimanyoru kamuung’et eng’ tamirmiriennyu, amu kima anyoru Tito ne kitupche: ago kiabagakte, ak awe Makedonia.
14Ago kongoi eng’ Jehovah, ne imutatech kotugul kibelisie eng’ Kristo, ak kobortoi nyamdutietab naennyi eng’ achek eng’ komosta age tugul. 15Amu ki nyamdutiet ne anyiny ne bo Kristo eng’ Jehovah, eng’ ichek che kisoru, ak eng’ ichek che lustos; 16eng’ alak ko ki nyamdutiet ne bo meet agoi meet; eng’ alak ko ki nyamdutiet ne bo sobondo agoi sobondo. Ak tos ng’o ne yamegei ak tuguchu? 17Amu achek ko ma ki u che chang’, che boisie ng’olyotab Jehovah eng’ ng’alset: ago ki che boisiei eng’ oret ne matinyei ng’alset, ago ki bo Jehovah, ak eng’ taitab Jehovah, keng’alali eng’ Kristo.
Currently Selected:
KORINTOEK 2 2: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
