KORINTOEK 2 3
3
Bik che kiwalogis amu amdaetab Paulo
1Ara anyun, kagitau kogeny kemwauge acheget? Anan kimache, ko u ye machei bik alak, baronok che bo mwaitaetab ge che bwanjinok ak che bunwok? 2O baruennyo ne sirat eng’ mugulelwekyok, ne naat ak kosomani bik tugul; 3obortoige ole o baruet ne bo Kristo, ne kigiyai, ne kigisir ama eng’ wino, ago eng’ Tamirmiriet ne bo Jehovah ne sobei; ma eng’ koik che lebelen, ago eng’ koik che lebelen che mugulelwek che bo borwek.
4Ak ketinye kamang’unet ne u noto eng’ Kristo, ne tokyingei Jehovah: 5ma kele kitinye kiy achege ne yamegei ak kiy, kiit kiy age tugul kele bunwech acheget; ago bunu Jehovah che yamech; 6ne kiyaech keegu che yamei, kiboitinik che bo arorutiet ne leel; ma che bo ng’atutiet, ago bo Tamirmiriet; amu barisiei ng’atutiet, ago Tamirmiriet ne igoitoi sobondo.
O torornatetab Logoiywek che Miach kosiir torornatetab Ng’atutik
7Ago ngo kibwa koboto torornatet boisietab meet, ne kigisir, ak kewachi koik barak, kot ko kimata komuch bikab Israel kogeer toget ne bo Musa komie amu lilindab togennyi; lilindo ne kiigesugei: 8tos ma tesat kosiir boisietab tamirmiriet eng’ torornatet? 9Amu ngo boisietab kiruoget ko torornatet, ko siirtoot mising’ boisietab imanda eng’ torornatet. 10Amu iman, noto ne kigitoror, ko kima kigochyi torornatet agobo nito, amu torornatet ne siirtoot. 11Amu ngo kimi noto siirtoi koboto torornatet, komitei anyun eng’ torornatet ne tia, noto ne ng’etunot.
12Noto anyun, amu kitinye kamang’unet ne u ni, keboisie anyun nyiganatet ne bo keny eng’ ng’alalet, 13ama ki u Musa, ne kituge togennyi anget, si mageer lagokab Israel komie kagesunet ne bo noto kiigesugei: 14ago kiuuegitu kabwatutikwak: amu agoi betuni, eng’ somanetab arorutiet ne bo keny, ko ta komi anganato bo toget, tom keisto; noto ne kigeisto eng’ Kristo. 15Ago agoi betuni, ko eng’ betut age tugul ye kisomani Musa, ko ta komitei anganato mugulelwekwak. 16Ago ye kaweekyinegei Kiptaiyat, keisto anganato. 17Kiptaiyat ko Tamirmiriet anyun: ak ole mi Tamirmirietab Kiptaiyat komi katiaget.
18Ago achek tugul kobortoi torornatetab Kiptaiyat ko u kioit eng’ togochikyok che ma tugotin, kewalech eng’ itonoto kobunu torornatet agoi torornatet, ko u ye bunu Kiptaiyat ne Tamirmiriet.
Currently Selected:
KORINTOEK 2 3: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
