KORINTOEK 2 11
11
Kamugennyi ne kiigochi koek ne kiyoktoi
1Ee, kata kaigai ndomuchi omuitawa eng’ berberindo kitigin: ee omuitawa iman. 2Amu ama ng’etkong’ agobo okwek, eng’ ng’etkonda ne bo Jehovah: amu kiachamwok obunji manong’otiot agenge, si kobiit amutyok Kristo ko u bergeiyat ne tilil. 3Ago aiywei ale, si mang’emogis eng’ or age tugul kabwatutikwok eng’ lititindo ak tililindo ne tokyingei Kristo ko u ye kiiberber erenet Awa eng’ ng’alsennyi. 4Amu inendet ne nyonei, ngo amda Jesu age, ne kima kiamde achek, anan ngo taach tamirmiriet age, ne kima otaach okwek, anan logoiywek che miach che ter, che kima oyan, ko kaga anyun omuitochini inendet komie.
5Amu aiitige ale mami let eng’ kiy age tugul eng’ che eechen mising’ eng’ che kiyoktoi. 6Agot ngo u ng’alalennyu ne bo chi ne ma inetgei, ko ma u noto eng’ naet; achicha, kigibartech achek eng’ okwek eng’ kiy age tugul eng’ kwenutab bik tugul.
7Anan kiayai tengek ye kingaming’inge si kobiit kitororok okwek, amu kiaamwok logoiywek che miach che bo Jehovah ama melekto? 8Kiarebe kanisosiek alak, aibe melekto eng’ ichek si kobiit aboisieunenok; 9ak ye kingami kobotok ak abanani, ko kima agochi chi age tugul nyigisin; amu kingoit tupchosiek kobunu Makedonia, kogona che te che kiabanani; ak kiaripge eng’ kiy age tugul ale si maegu nyigisin eng’ okwek, ak ta aribege. 10Ko u ye mi imanitab Kristo eng’ ane, mami chi ne kirindoa eng’ kalosunoni eng’ korotinwekab Akaya. 11Amu nee anyun? Amu machamok? Ingen Jehovah.
12Ago kit ne ayae, ayae noto, si kobiit atile boroindo icheget che machei boroindo; si kobiit kogergeit ak ichek eng’ kioto ilosunegei. 13Amu bik che u choto ko che kiyoktoi che bo lembech, kiboitinikab kenisiet, che walegei koek che kiyoktoi che bo Kristo. 14Ama mi kwong’et; amu agot Setani kowalegei koek malaikaiyatab lapkeiyet. 15Ma kiy ne o anyun ngo walegei otwogikyik koigei kiboitinikab imanda; ne kagesunenywa konamegei ak boisionikwak.
Terjinetab Paulo ak bik che ibeligei ak inendet eng’ amdaet
16Amwae kogeny ale, Amat kobwat chi kole a berber; ago ngo u noto, otaacha okwek ngo a berber, si kobiit alosge agane kitigin. 17Noto amwae, ko mamwae eng’ Kiptaiyat, ago ko u eng’ berberindo, eng’ nyiganatanito bo kalosunetab ge. 18Amu ngolosugei che chang’ eng’ borto, alosuge agane. 19Amu omuitochini che berberen eng’ boiboiyet, amu o ng’omen. 20Amu omuitochini chito, ngo yaak oegu otwogik, ngo amok, ngo namak, ngo tororgei, ngorabachok.
Ng’oiyondit ak nyalilwogik che kinyor Paulo
21Ang’alali eng’ sasetab ge, ko u ye ki nyalulyotin. Ago ngot ko nyigan chi eng’ kiy age tugul (ang’alali eng’ berberindo), a nyigan agane. 22Tos Hebranik ichek? A u noto agane. Tos Israelik ichek? A u noto agane. Tos keswekab Abraham ichek? A u noto agane. 23Tos kiboitinikab Kristo ichek? (Ang’alali ko u chi ne amei iywek) a siirtoot; eng’ birtaosiekab ge che siirtoot, eng’ korgorosiek mising’, eng’ birutik che magirarei, eng’ meosiek konyil che chang’. 24Kianyoru eng’ Yahudik konyil mut birutik artam, kibet agenge. 25Kigibirena kirokwek konyil somok, kigilagena koik konyil agenge, king’emak melit ne kiami konyil somok, kiatebe nyanjet betut agenge ak kemout agenge. 26Eng’ banwek konyil che chang’, ng’oiyonditab ainosiek, ng’oiyondit ne bunu rebik, ng’oiyondit ne bunu bikab bororiennyu, ng’oiyondit ne bunu Bororiosiek, ng’oiyondit eng’ nganaset, ng’oiyondit eng’ ong’atet, ng’oiyondit eng’ nyanjet, ng’oiyondit eng’ kwenutab tupchosiek che bo lembech; 27eng’ birtoetab ge ak nyalilda, eng’ ripsosiek konyil che chang’, eng’ rubet ak melelda, eng’ rugutosiek konyil che chang’, eng’ kaititindo ak ach ngorit. 28Koboto tuguchoto bo sang’, komi agine noto ne igiicha betut age tugul, tononjinetab kanisosiek tugul. 29Ng’o ne nyalulat, ama a nyalulat ane? Ng’o ne koginach, ama agas agane ng’wanindo?
30Ngot ko nyolu alosge, alosuge agobo tuguk che bo nyalulennyu. 31Ingen Jehovah Kwandab Kiptaiyat Jesu, ne iberurot koigeny, kole magenu. 32Kirib eng’ Damasko bounindetab laitoriat Areta, nganasetab Damaskik, kole konama: 33ak kigichoortaena mesendet eng’ tirisiet ne bo irimet, ak kiachilil eng’ eunnyi.
Currently Selected:
KORINTOEK 2 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
