KORINTOEK 2 10
10
Komwaei Paulo kole bunu Jehovah ng’alekyi
1Asomok anyun ane Paulo eng’ talasiet ak mutyonetab Kristo, ane ne ming’in ye ami kobotok eng’ kwenung’wong’, ago ye mami kobotok atinye nyiganatet: 2ee, asomok, ale si manyiganitu ye ami kobotok eng’ kamang’unet ne kona aiit ale a nyigan eng’ alak, che iitech kole kibendoti eng’ atebetab borto. 3Amu agot ngebendoti eng’ borto, ko magiyae luget eng’ atebetab borto 4(amu karikab lugennyo ko ma bo borto, ago tinyei kamuget eng’ taitab Jehovah koluul irimosiek); 5kiluuli kabwatutik, ak kiy age tugul ne toror ne ieetegei kole kogirinda naetab Jehovah, ak koluulei kabwatet age tugul si kobiit kogas it Kristo; 6ko ki chobotin keyaakyi mugetut bistoet tugul, ye tun isulda kaseng’wong’ bo it.
7Ogeere tuguk che mitei taitab konyekwok. Ngot komang’ugei chi age tugul kole bo Kristo, ko ingoruchi nito kogeny inegei, kole, ko u ye bo Kristo inendet, ke u noto agachek. 8Amu agot ngo nyolu alosge mising’ kitigin agobo kimnatennyo (ne kigon Kiptaiyat si kobiit koteechak, ama si koluulok), ko malilani; 9si maegu ne amutenok baronokyuk. 10Amu mwaei ichek kole, Baronokyik ko nyigisen ak ko kimen; ago nyalulat inendet ye mitei tainywa, ama tilei kiy ng’alekyik. 11Ingobwat ne u noto, ni, kole, kit ne ki u eng’ ng’olyot eng’ baronok ye magimi, ke u noto agine eng’ boisiet ye kimitei.
12Amu ma ki nyigonen kiitge anan kirogege alak eng’ ichek che ilosugei: ago ichek ichegei korogege ge ichegei, ak koyaniege ge ichegei, ko matinyei kaguiyet. 13Ago magitororige kosiir ne te ne yamei, ago ko u ole te karogendoet ne kiikwaiywech Jehovah, kot keitu olong’wong’. 14Amu magiyogoitoige kosiir, ko u ne magiitu olong’wong’: amu kigebwa agoi olong’wong’ eng’ logoiywek che miach che bo Kristo: 15ama kilosuge kosiir ne te ne yamei, eng’ boisionikab bik alak; ago kimang’u kele, ko u ye tesoksei kayaneng’wong’, kitororech eng’ okwek ko u ole te kakwaennyo, kot kosiir, 16si kobiit keamde logoiywek che miach agot eng’ komoswek che mi komosin eng’ olong’wong’, ama kilosuge eng’ kakwaetab chi age eng’ tuguk che kigechob.
17Ago inendet ne ilosugei, ingolosgei eng’ Kiptaiyat. 18Amu ma inendet ne ilosugei ne kiyani, ago inendet ne ilosu Kiptaiyat.
Currently Selected:
KORINTOEK 2 10: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
