KORINTOEK 1 16
16
Kayumanik agobo kibananok eng’ Jerusalem
1Nguno anyun agobo kayumanik agobo bik che tililen, ko u ye kiang’at kanisosiek che bo Galatia, oyai ak okwek ko u noto. 2Ingogonor chi age tugul eng’ okwek eng’ betut ne bo tai ne bo wigit, ko u che te che kanyor, si mabiit kayumisiet ye tun anyo. 3Ak ye tun aitu, ayokte alak tugul che kiolewen koboto baronok, koib tuguk che bo aiyebindang’wong’ koba Jerusalem. 4Ak ngot ko nyolu awa agane, kebe tugul.
Ng’alekab Paulo inegei, ak saisere
5Ago anyonjinok, ye kaabunote Makedonia; amu abunoti Makedonia; 6ago abere anyone ketebi ak okwek eng’ betusiek alak anan agot eng’ betusiekab kaititiet, si kobiit omonorseiwa okwek eng’ bandanyu eng’ komosta age tugul ole awendi. 7Amu mamache ageerok nguno asiirtoi eng’ oret; amu amang’u ale atebi kobotok ne matia, ngo cham Kiptaiyat. 8Ago ta atebe Epeso agoi betutab Pentekost; 9amu kogiyatwa kurget ne o ne nyoljin boisionik, ak mi bunik che chang’.
10Ngot anyun konyo Timoteo, ko ingoteb kobotok ama eng’ kaiyweisiet; amu boisiei inendet eng’ boisietab Kiptaiyat, ko u ye ayae agane: 11amat kosas chi inendet anyun. Ago omonorsechi inendet eng’ bandanyi eng’ kalyet si konyo ole ami: amu ageni inendet koboto che kitupche.
12Ago eng’ ng’alekab Apolo ne kitupche, kiasom inendet mising’ ale konyonjok koboto tupchosiek: ak kima ko magennyi agot kitigin konyo nguno; ago ta konyonei ye tun nyor boroindo.
13Oripse, olumdege mising’ eng’ kayanet, otebi ko u murenik, ogimegitu. 14Ingoyaak eng’ chamnyet tugul che oyae.
15Asomok anyun mising’, che kitupche (ongen che bo gotab Stepana, ole icheget tongoanik che bo Akaya, ak kichuljigei koboisiechi che tililen), 16ale ogas it okwek che u chu, ak chi age tugul ne toreti eng’ boisiet ak ne birtoegei boisiet.
17Ak abaibai eng’ nyonunetab Stepana ak Portunato ak Akaiko: amu kiinyiitwa ichek noto ne rarunot eng’ komostang’wong’. 18Amu kiimuung’ji tamirmiriennyu ak neng’wong’: onai anyun komie ichek che u choto.
19Igatok kanisosiekab Asia. Igatok Akula ak Priska mising’ eng’ Kiptaiyat, koboto kaniset ne mi gonywa. 20Igatok tupchosiek tugul. Ogatge eng’ ng’ututet ne tilil.
21Kagatennyu nito ane Paulo eng’ eunnyu. 22Ngot ko machamei chi age tugul Kiptaiyat, ko ingoek ne chubot. Maran-atha.
23Ingotebi kobotok mieindab Kiptaiyat Jesu Kristo. 24Ingoteb chamnyennyi kobotok tugul eng’ Kristo Jesu. Amen.
Currently Selected:
KORINTOEK 1 16: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
