KORINTOEK 1 11
11
1Oegu kasubikyuk, ko u ye a kasubindetab Kristo.
Kituchei metitab kobogoriot eng’ tuiyosiekab kanisa
2Aloswok anyun nguno amu obwata eng’ tuguk tugul, ak oribe konetisiosiek ko u ye kiaroruok. 3Ago amache onai, ole metitab muren age tugul ko Kristo; ak metitab kobogoriot ko muren; ak metitab Kristo ko Jehovah. 4Muren age tugul ne saei anan koamdoi logoiywek ko kerat metit, ko kagotewer metinnyi. 5Ago kobogoriot age tugul ne saei anan koamdoi logoiywek ko yatat metit, ko kagotewer metinnyi: amu kagergeit ak chi ne inemunot met. 6Amu ngo ma tugot metitab kobogoriot, ko ingetilji agine sumeek: ago ngo kalilano eng’ kobogoriot ketilji sumeek anan kinem, ko ingotuch metinnyi. 7Manyoljin iman muren koger metit, amu inendet ko kergeindo ak torornatetab Jehovah: ago kobogoriot ko torornatetab muren. 8Amu kima bun mureno kobogorio; ago kibunu kobogoriot muren: 9ak kogeny, kima kitoi keyai muren agobo kobogorio; ago kigiyai kobogorio agobo muren: 10amu nito anyun konyoljin kobogorio kotinyei kaborunet ne bo bounatet eng’ metinnyi, amu malaikaisiek. 11Ago mami kobogoriondo ngo mami mureno, ak mami mureno ngo mami kobogoriot, eng’ Kiptaiyat. 12Amu ko u ye kibunu kobogoriot muren, ko u noto agine mureno kisichei kobogoriot; ago bunu tuguk tugul Jehovah. 13Oruoch okwege: tos nyolu eng’ kobogoriot kosa Jehovah ko ma tugot metit? 14Tos mainetok agine biteetab borto, kole, ngo tinyei mureno sumeek che koen, ko kalilanet eng’ inendet? 15Ago ngo tinyei kobogoriot sumeek che koen, ko torornatet eng’ inendet: amu kigigochi sumeekyik kotugegei. 16Ago ngo machei chi tiiyet, ko ma kitinye biteet ne u noto, anan eng’ kanisosiekab Jehovah.
Ma mie koam chi Igortab Kiptaiyat ama nyoljin
17Ago, ye ang’atok eng’ ng’olyondoni, ko maloswok amu oyumige ko ma agobo che miach ago agobo che yaach. 18Amu ne bo tai eng’ tugul, ye oyumige eng’ kaniset, agase kele mitei kabesiosiek eng’ kwenung’wong’; ak ayani kitigin ale u noto. 19Amu mi ne matiny kabesiosiek eng’ kwenung’wong’, si kobiit kotook ichek che bo iman eng’ kwenung’wong’. 20Ye oyumige anyun ko maimugaksei keam igortab Kiptaiyat: 21amu eng’ amisieng’wong’ kosib konemu age amitwogikyik kotomo age; ak amei age rubet, kobogiti age. 22Nee? Motinye gorik che oamisie ak oeeise? Anan osase kanisetab Jehovah, ak ogochini kalilanet icheget che matinyei? Amwawok nee anyun? Tos aloswok eng’ ng’olyondoni? Maloswok.
23Amu kiataach eng’ Kiptaiyat noto kiagonok agane, ko u ye kinam makatiat Kiptaiyat Jesu eng’ kemounoto kiging’wektoe inendet; 24ak kingo kagomwa kongoi, kotonaton, ak kole, Nito ko bortanyu, ne neng’wong’: oyae ni obwatena. 25Ko u noto agine kikombet, kingo kagoamis, kole, Kikombani ko arorutiet ne leel eng’ korotikyuk: oyae nito kotugul ye oee obwatena.
26Amu kotugul ye oame makatiandani, ak oee kikombet, obortoi meetab Kiptaiyat agoi koit. 27Noto anyun chi age tugul ne amei makatiat, anan ne eei kikombet ne bo Kiptaiyat ama nyoljin, koipchingei kiruoget ne bo borto ak korotikab Kiptaiyat. 28Ago ingosiagei chi, si koamei makatiat, ak koeei kikombet. 29Amu inendet ne amei ak koeei, koamei ak koeei kiruoget ngo ma ibesio borto. 30Amu nito anyun nyaluldos che chang’ eng’ kwenung’wong’, ak komiandos, ak koruitos che chang’. 31Amu ngot kitigonige, ko matun kiruokwech. 32Ago ye kiruokwech, kotigonech Kiptaiyat, si matun kigikyech koboto ng’ony. 33Noto anyun, tupchosiekyuk, ye oyumge oamisie, oganyge. 34Ngo amei chi age tugul rubet, koamis eng’ ga; si mabunji kayumeng’wong’ bo ge kiruoget. Ak ng’alek che kang’et ko ye kaitu, anyo achob.
Currently Selected:
KORINTOEK 1 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
