KORINTOEK 1 1
1
Kagatet ak kongoi
1Paulo, ne kigiguur koek ne kiyoktoi ne bo Jesu Kristo eng’ magetab Jehovah, ak Sostene tupchennyo, 2kisirjini kanisetab Jehovah ne mitei Korinto, ichek che kigitaban eng’ Kristo Jesu, che kigiguur koek che tililen, koboto tugul che kuurei kainetab Kiptaiyandennyo Jesu Kristo eng’ komosta age tugul, Kiptaiyandenywa ak ko nenyo:
3Ingoteb kobotok mieindo ak kalyet ne bunu Jehovah Kwandanyo ak Kiptaiyat Jesu Kristo.
4Amwachini Jehovah nenyu kongoi kotugul agobo okwek, amu mieindab Jehovah ne kigigonok eng’ Kristo Jesu; 5amu kigeyaak oegu magorek mising’ eng’ inendet eng’ kiy age tugul, eng’ ng’alek tugul, ak naet tugul; 6ko u ye kigigimit baornatetab Kristo eng’ okwek: 7si moletu eng’ konunet age tugul; ogeni ng’ang’utietab Kiptaiyandennyo Jesu Kristo. 8Ne igimitok agine agoi let, ko motinye kiy ne kiruogunenok eng’ betutab Kiptaiyandennyo Jesu Kristo; 9Jehovah ko ne kiyani, kigeguurok eng’ inendet obwanji yamdaetab Werinnyi Jesu Kristo Kiptaiyandennyo.
Kabesiosiek eng’ kaniset
10Asomok mising’ anyun, che kitupche, eng’ kainetab Kiptaiyandennyo Jesu Kristo, ale, omwa tugul kit agenge, si mabiit kabesiosiek eng’ kwenung’wong’; ago si oegu che igesunotgei kibagenge eng’ kabwatet agenge ak eng’ kiruoget agenge. 11Amu kigoborua ichek che mi gotab Kloe agobo okwek, tupchosiekyuk, kole mi toiyosiek kwenung’wong’. 12Kit anyun ne amwae ko ni, ale, mwaei age tugul eng’ okwek, kole, A bo Paulo; ak a bo Apolo; ak a bo Kepa; ak a bo Kristo. 13Tos pcheat Kristo? Tos kigigartatwok Paulo? Anan kigibatisanjok kainetab Paulo? 14Amwachini Jehovah kongoi amu ma abatisan chi eng’ okwek, kobate Krispo ak Gaio, 15si mamwa chi age tugul kole kigibatisanjok kainennyu. 16Ak kiabatisan che bo gotab Stepana agichek: mangen kogeny, ngo kita abitisan chi age. 17Amu ma iyokwa Kristo abatisanis, ago aamda logoiywek che miach: ma eng’ ng’omnatet ne bo ng’alek, si ma kiyai kimurtoiyotab Kristo koek buch.
Kimnatetab kimurtoiyot
18Amu berberindo ng’olyotab kimurtoiyot eng’ icheget che lustos; ago eng’ achek che kisoru ko kimnatetab Jehovah. 19Amu kigisir kele,
Ang’eme ng’omnatetab che ng’omen,
Ak aesioi kaguiyetab icheget che iguitos.
20Mi ano ne ng’om? Mi ano sirindet? Mi ano kiptiiyotiot ne bo kenyisiechu? Tos ma yai Jehovah ng’omnatetab ng’onyuni koberberit?
21Amu eng’ ng’omnatet ne bo Jehovah ko ma nai ng’ony Jehovah eng’ ng’omnatennyi, kicham Jehovah kosor icheget che iyani, eng’ berberindo ne bo ng’olyot ne kiamdoi. 22Amu somei Yahudik kaborunoik, ak cheng’ei Yunanik ng’omnatet: 23ago kiamdoi achek Kristo ne kigigartat, ne kanagutiet eng’ Yahudik, ak ko berberindo eng’ Bororiosiek; 24ago eng’ ichek che kigiguur, Yahudik koboto Yunanik, Kristo ko kamuktaetab Jehovah, ak ng’omnatetab Jehovah. 25Amu berberindo ne bo Jehovah ko ng’om kosiir bik; ak nyalulnatetab Jehovah ko kim kosiir bik.
26Amu, ogeer kuurseng’wong’-o, tupchosiechu, ole ma kiguur che chang’ che ng’omen eng’ atebetab borto, anan che chang’ che kimen, ama che chang’ che toogunotin: 27ago kilewen Jehovah tuguk che berber che bo ng’ony, si kogochi kalilanet che ng’omen; ak kilewen Jehovah tuguk che nyalulotin che bo ng’ony, si kogochi kalilanet tuguk che kimen; 28ak kilewen Jehovah tuguk che ma toogunotin che bo ng’ony, ak tuguk che kisasei, ak tuguk che mamitei, si kowal koek buch tuguk che mitei: 29si mat kolosgei chi age tugul eng’ taitab Jehovah. 30Ago o bo inendet okwek eng’ Kristo Jesu, ne kigiyai eng’ Kristo Jesu, ne kigiyai eng’ achek koek ng’omnatet ne bunu Jehovah, ak imanda, ak tililindo, ak katiaget: 31si koek, ko u ye kigisir kele, Inendet ne ilosugei, ko ingolosgei eng’ Kiptaiyat.
Currently Selected:
KORINTOEK 1 1: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
