KORINTOEK 1 2
2
Ng’omnatosiekab bik ak ng’ang’utietab tuguk
1Ak ye kianyonjok, tupchosiechu, ko kima anyo eng’ anyinyindab ng’alalet anan ne bo ng’omnatet, anyo aboruok ung’otietab Jehovah. 2Amu kiabegechi ale mamache anai kiy age tugul eng’ kwenung’wong’ kobate Jesu Kristo, inendet ne kigigartat. 3Ak kiami kobotok eng’ nyalulet, ak eng’ kaiyweisiet, ak eng’ botanet ne o. 4Ak ng’alalennyu ak ng’olyondennyu ne kiaamdoi ko kima ko ng’alekab kagaigaet che bo ng’omnatet, ago eng’ kaborunetab Tamirmiriet ak ne bo kamuktaet: 5si matonone kayaneng’wong’ ng’omnatetab bik, ago eng’ kamuktaetab Jehovah.
6Ago kimwae ng’omnatet eng’ kwenutab che igesunotingei: ago ng’omnatet ne ma bo betusiechu, anan ne bo bounikab betusiechu, che machei koek buch: 7ago kimwae ng’omnatetab Jehovah eng’ ung’otiet, noto ne kigeuny, ne kiga sib kong’at Jehovah agobo torornatennyo ye kitom kobiit ng’ony: 8ne manaei agot agenge eng’ bounik che bo betusiechu: amu nda kiga nai, ta kima kogartati Kiptaiyatab torornatet: 9ago ko u ye kigisir kele,
Tuguk che kima keer konda, ama kas itit,
Ak ne kima chut muguleldab chi,
Tuguk alak tugul che kichopchi Jehovah icheget che chamei inendet.
10Ago king’ang’wech Jehovah eng’ Tamirmiriet: amu isiachi Tamirmiriet tuguk tugul, agot tuguk che bo orit che bo Jehovah. 11Amu tos chi ng’o ne ingen tugukab chi, kobate tamirmirietab chichoto, ne mitei inendet? Ko u noto mami chi ne ingen tugukab Jehovah, kobate Tamirmiriet ne bo Jehovah. 12Ago kima kitaach tamirmiriet ne bo ng’ony, ago tamirmiriet ne bo Jehovah; si kenai tuguk che kigogonech Jehovah buch.
13Tuguchoto agichek che kimwae, ma eng’ ng’alek che ineti ng’omnatetab chi, ago che ineti Tamirmiriet; kiroge tugukab tamirmiriet ak tugukab tamirmiriet. 14Mataachei chito ne mi eng’ atebetab borto tuguk che bo Tamirmirietab Jehovah: amu berberindo eng’ inendet; ak temene kobesio tuguchoto, amu naoksei eng’ tamirmiriet. 15Ago inendet ne mi eng’ atebetab tamirmiriet kobestos tuguk tugul, ago mami chi ne ibestos ole teptoi chichoto. 16Amu ng’o ne kigonai kabwatutikab Kiptaiyat, si kobiit konet inendet? Ago kitinye achek kabwatutikab Kristo.
Currently Selected:
KORINTOEK 1 2: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
