MATHAYO 1

1IBUKU rĩrĩ nĩrĩo rĩandĩkĩtwo ũhoro wa rũciaro rũrĩa Jesu Kristo,#1.1 Kristo: ni kuuga ũrĩa mũitĩrĩrie maguta, atuwo mũthamaki. (Kĩhibirania nĩ Mesia). mũrũ wa Daudi, mũrũ wa Iburahimu, oimire.

2Iburahimu nĩwe waciarire Isaaka; nake Isaaka agĩciara Jakubu; nake Jakubu agĩciara Juda o na ariũ a ithe; 3nake Juda agĩciara Perezu na Zera, na nyina wao aarĩ Tamaru; nake Perezu agĩciara Hezironi; nake Hezironi agĩciara Ramu; 4nake Ramu agĩciara Aminadabu; nake Aminadabu agĩciara Nahashoni; nake Nahashoni agĩciara Salimoni; 5nake Salimoni agĩciara Boazu, na nyina aarĩ Rahabu; nake Boazu agĩciara Obedi, na nyina aarĩ Ruthu; 6#2 Ath 24.14,15; 2 Maũ 36.10; Jer 27.20.nake Obedi agĩciara Jesii; nake Jesii agĩciara Daudi, ũrĩa warĩ mũthamaki.

Nake Daudi agĩciara Solomoni, na nyina aarĩ mũtumia ũrĩa warĩ o mbere wa Uria; 7nake Solomoni agĩciara Rehoboamu; nake Rehoboamu agĩciara Abija; nake Abija agĩciara Asa; 8nake Asa agĩciara Jehoshafatu; nake Jehoshafatu agĩciara Joramu; nake Joramu agĩciara Uzia; 9nake Uzia agĩciara Jothamu; nake Jothamu agĩciara Ahazu; nake Ahazu agĩciara Hezekia; 10nake Hezekia agĩciara Manase; nake Manase agĩciara Amoni; nake Amoni agĩciara Josia; 11nake Josia agĩciara Jekonia na ariũ a ithe, hĩndĩ ĩrĩa andũ maatahirũo magĩtwarũo Babuloni.

12O na andũ maarĩkia gũtahwo magĩtwarũo kũu Babuloni, Jekonia ũcio agĩciara Shealitieli; nake Shealitieli agĩciara Zerubabeli; 13nake Zerubabeli agĩciara Abihudu; nake Abihudu agĩciara Eliakimi; nake Eliakimi agĩciara Azoro; 14nake Azoro agĩciara Zadoku: nake Zadoku agĩciara Akimi; nake Akimi agĩciara Eliudu; 15nake Eliudu agĩciara Eleazaru; nake Eleazaru agĩciara Mathani; nake Mathani agĩciara Jakubu; 16nake Jakubu agĩciara Jusufu, ũrĩa warĩ mũthuri wa Mariamu, ũrĩa waciarire Jesu, ũrĩa wĩtagwo Kristo.

17Noguo njiaro ciothe gwata Iburahimu kinya Daudi, nĩ ikũmi na inya; ningĩ gwata Daudi kinya andũ maatahwo magĩtwarũo Babuloni, nĩ njiaro ikũmi na inya; na ningĩ gwata andũ maatahwo magĩtwarũo kũu Babuloni, kinya Kristo, nĩ njiaro ikũmi na inya.

18 # Luk 1.27. Rĩu-rĩ, gũciarũo kwa Jesu Kristo gwatariĩ ũũ: nyina Mariamu orio nĩ Jusufu, matanonana, akĩonwo arĩ na ihu rĩa Roho Mũtheru. 19Nake mũthuriwe Jusufu, tondũ aarĩ mũndũ mũthingu, na ndendaga gũconorithia mũirĩtu ũcio kũrĩ andũ, akĩenda atigane nake na hitho. 20Na hĩndĩ ĩrĩa eciragia maũndũ macio-rĩ, atĩrĩrĩ, mũraika wa Mwathani akĩmuumĩrĩra kĩroto-inĩ, akĩmwĩra atĩrĩ, Jusufu, mũrũ wa Daudi, ndũgetigĩre kũhikia Mariamu atuĩke mũtumia waku, tondũ-rĩ, ihu rĩu arĩ narĩo nĩ rĩa Roho Mũtheru. 21#Luk 1.31.Nake nĩagaciara kahĩĩ, nako nĩũgagatua JESU, nĩ ũndũ nĩwe ũkahonokia andũ ake mehia-inĩ mao. 22Na rĩrĩ, maũndũ macio mekirũo nĩ getha ciugo iria cioigirũo nĩ Mwathani na kanua ka mũnabii ikinye, rĩrĩa oigire atĩrĩ:

23 # Isa 7.14. Onei, mũirĩtu nĩakagĩa ihu, na aciare kahĩĩ,

Nako gatuwo Imanueli;

ũguo naguo ũgĩtaũrũo, nĩ kuuga, Ngai hamwe na ithuĩ. 24Nake Jusufu agĩũkĩra toro, agĩĩka o ta ũrĩa mũraika wa Mwathani aamwathire, akĩhikia mũtumia wake, 25#Luk 2.21.na ndaigana kũmũmenya kinya aaciara kahĩĩ; agĩgatua JESU.

Currently Selected:

MATHAYO 1: OGKBIBLE

Highlight

Copy