JOHANA 17

1JESU nĩoigire maũndũ macio, agĩcoka agĩtiira maitho akĩrora Igũrũ, akiuga atĩrĩrĩ, Awa, hingo nĩ nginyu; goocithia Mũrũguo, nĩ getha Mũrũguo nake akũgoocithie; 2kũringana na ũrĩa wamũheire hinya wa gwatha andũ othe, nĩguo arĩa othe ũmũheete amahe muoyo wa tene na tene. 3Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo. 4Wee nĩngũgoocithĩtie gũkũ thĩ, tondũ nĩndĩkĩtie wĩra ũrĩa wa’heire ndute. 5Na rĩu, Awa, ngoocithia niĩ, twĩ hamwe nawe mwene, na riri ũrĩa twatũire naguo hamwe nawe tene thĩ ĩtaanagĩa. 6Nĩnguũrĩirie andũ rĩĩtwa rĩaku arĩa wa’heire gũkũ thĩ; maarĩ aku, nawe ũkĩ’he; nao nĩmamenyereire ũhoro waku. 7Rĩu nĩmamenyete atĩ maũndũ mothe marĩa ũ’heete nĩmoimĩte kũrĩ wee; 8amu mohoro marĩa wa’heire, nĩndĩmaheete o, nao makĩmetĩkĩra, makĩya kũmenya ma atĩ nĩndoimire na kũrĩ wee, na magĩĩtĩkia atĩ nĩwe wandekirie. 9Nĩo ngũhoera; ndikũhoera kĩrĩndĩ gĩa gũkũ thĩ, no acio ũ’heete, tondũ nĩ aku; 10akwa othe no aku, na aku no akwa, na niĩ nĩngoocithĩtio nĩ ũndũ wao.

11Na rĩu niĩ, gũkũ thĩ, ndicoka gũkorũo kuo, no aya megũikara o gũkũ thĩ, na niĩ nĩngũũka kũrĩ wee. Awa mũtheru, maikaragie thĩinĩ wa rĩĩtwa rĩaku rĩrĩa ũ’heete, nĩguo matuĩke ũmwe ki, o ta ithuĩ. 12#Thab 41.9; Joh 13.18.Rĩrĩa ndĩratũire nao, nĩ niĩ ndĩramaikaragia thĩinĩ wa rĩĩtwa rĩaku rĩu ũ’heete; na kũgitĩra nĩndĩramagitagĩra, na gũtirĩ worire, tiga o ũrĩa mwana wa kũũra, nĩ getha ũhoro ũrĩa mwandĩke ũhingio. 13Ĩndĩ rĩu nĩngũũka kũrĩ wee, na maũndũ maya ndĩroigĩra o gũkũ thĩ, nĩ getha maikarage na gĩkeno gĩakwa gĩĩ gĩkinyanĩru kũna ngoro-inĩ ciao. 14Niĩ nĩndĩmaheete ũhoro waku; nakĩo kĩrĩndĩ gĩa gũkũ thĩ gĩkamathũũra, nĩ ũndũ ti a gũkũ thĩ, o ta ũguo niĩ na niĩ itarĩ wa gũkũ thĩ. 15Ndigũkũhoya ũmarute gũkũ thĩ, no kũmaikaria ũmaikaragie matikanathũkio nĩ ũrĩa mũũru. 16O ti a gũkũ thĩ, o ta ũguo niĩ na niĩ itarĩ wa gũkũ thĩ. 17Maamũre ũmatherie na ũhoro-ũrĩa-wa-ma: ũhoro waku nĩguo ũhoro-ũrĩa-wa-ma. 18Ta ũrĩa wee wandekirie njũke gũkũ thĩ, niĩ na niĩ noguo ndamarekirie kĩrĩndĩ-inĩ gĩa gũkũ thĩ. 19Na nĩndĩĩamũrĩte nĩ ũndũ wao, nĩ getha nao ene maamũrũo matherio na ũhoro-wa-ma.

20Ningĩ ti aya oike ndĩrahoera; ndahoera arĩa nao marĩkoragwo meĩ’hokete nĩ ũndũ wa ciugo ciao; 21atĩ othe matuĩke ũmwe ki; o ta ũguo wee, Awa, wĩ thĩinĩ wakwa, na niĩ ndĩ thĩinĩ waku, o nao magĩe thĩinĩ witũ, nĩ getha kĩrĩndĩ gĩa gũkũ thĩ gĩĩtĩkie atĩ nĩwe wandekirie. 22Na niĩ, riri ũrĩa ũ’heete, nĩndĩmaheete o nao, atĩ nĩguo matuĩke ũmwe ki, o ta ũguo ithuĩ tũrĩ ũmwe; 23niĩ thĩinĩ wao, nawe thĩinĩ wakwa, nĩguo marĩkĩrĩrie gũtuĩka ũmwe o wega; nĩ getha kĩrĩndĩ kĩmenye atĩ nĩwe wandekirie, na atĩ acio nĩũmendete, o ta ũrĩa ũnyendete niĩ. 24Awa, arĩa ũ’heete, nĩngwenda atĩ, o harĩa ndĩ, o nao magĩage o ho hamwe na niĩ; nĩguo monage riri wakwa ũrĩa ũ’heete; amu niĩ nĩwanyendaga o na tene thĩ ĩtaanombwo. 25Awa mũthingu, kĩrĩndĩ gĩa gũkũ thĩ gĩtiakũmenyire, no niĩ nĩndakũũĩ; o na aya nĩmaamenyire atĩ nĩwe wandekirie; 26na niĩ ngĩmamenyithia rĩĩtwa rĩaku, na no ndĩĩmamenyithagia rĩo; nĩ getha wendani ũrĩa ũnyendete naguo ũikarage thĩinĩ wao, o na niĩ njikarage thĩinĩ wao.

Currently Selected:

JOHANA 17: OGKBIBLE

Highlight

Copy