JOHANA 16

1NDAMWĨRA maũndũ macio nĩguo mũtikanae kũhĩngwo. 2Mũkagirio gũthiaga mathunagogi; o na hingo no ĩroka mũndũ wa kũmũũraga one ta arĩ Ngai aratungatĩra. 3Mageka ũguo nĩ ũndũ matirĩ maamenya Ithe witũ, o na kana maka’menya niĩ. 4No rĩrĩ, nĩndamwĩra maũndũ macio nĩ getha hingo yamo yakinya, mũkamaririkana, mũririkane atĩ nĩndamwĩrire ũguo. Na ndiamwĩraga maũndũ macio kĩambĩrĩria-inĩ, nĩ ũndũ twarĩ o hamwe na inyuĩ. 5Ĩndĩ rĩu nĩngũthiĩ kwĩ ũrĩa wandekirie; na inyuĩ gũtirĩ ũranjũria, Nĩ kũ ũgũthiĩ? 6No nĩ kũiyũrũo mũiyũrĩtwo nĩ kĩeha ngoro, nĩ ũndũ ndamwĩra maũndũ macio. 7No kaĩ ũguo ngũmwĩra nĩ ma, atĩrĩ, Nĩkũmwagĩrĩire niĩ thiĩ; amu ndaaga gũthiĩ, Mũteithia ndagoka kũrĩ inyuĩ; no ndathiĩ-rĩ, nĩngamũrekia oke kũrĩ inyuĩ. 8Nake aarĩkia gũũka, nĩakaiguithia kĩrĩndĩ kĩhooto ha ũhoro wa mehia, na wa ũthingu, na wa cira: 9akĩiguithie kĩhooto ha ũhoro wa mehia, nĩ ũndũ gĩtĩĩ’hokete niĩ, 10na ha ũhoro wa ũthingu, nĩ ũndũ ndathiĩ gwĩ Ithe witũ, na mũticoka kũnyona, 11na ha ũhoro wa cira, nĩ ũndũ mũnene wa gũkũ thĩ nĩarĩkĩtie gũtuĩrũo ituĩro. 12Nĩndigairie maũndũ maingĩ ma kũmwĩra, no mũtingĩhota kũmetiiria rĩu. 13No rĩrĩ, ũcio Roho wa ma oka, we nĩakamũtongoria amuumĩrĩrie ũhoro-inĩ ũrĩa wa ma wothe; tondũ ndakaaragia na kwĩĩra gwake mwene, ĩndĩ maũndũ o mothe marĩa akaigua, nomo akoiga; na nĩakamuumbũrĩra maũndũ marĩa magoka thutha. 14We nĩ niĩ akagoocithia; nĩ gũkorũo nĩ maũndũ makwa akanyitaga, amuumbũragĩre. 15Maũndũ o mothe marĩa Ithe witũ e namo nĩ makwa; nĩkĩo ndoiga atĩ nĩ maũndũ makwa akanyitaga, amuumbũragĩre inyuĩ. 16Kahinda kanini, na mũticoka kũnyona; ningĩ kahinda kanini, na kũnyona nĩmũkanyona.

17Tondũ wa ũhoro ũcio arutwo ake amwe makĩũrania atĩrĩ, Nĩ atĩa ũguo aatwĩra, atĩ, Kahinda kanini, na mũticoka kũnyona, ningĩ kahinda kanini, na kũnyona nĩmũkanyona; na atĩ, Nĩ ũndũ ngũthiĩ gwĩ Ithe witũ? 18Magakĩũrania, Nĩ atĩa ũguo ekuuga, atĩ, Kahinda kanini? Tũtikũmenya ũrĩa ekuuga. 19Nake Jesu akĩona atĩ nĩmekwenda kũmũũria, akĩmera atĩrĩrĩ, Anga nĩ ũhoro ũcio mũkũũrania, ũguo ndoiga, Kahinda kanini, na mũticoka kũnyona, ningĩ kahinda kanini, na kũnyona nĩmũkanyona? 20Nda mwĩra atĩrĩ, o ma, ma, Inyuĩ mũkarĩra na mũcakae, ĩndĩ kĩrĩndĩ gĩa gũkũ thĩ nĩ gũkena gĩgakena; inyuĩ-rĩ, nĩ kĩeha mũkaigua, ĩndĩ kĩeha kĩu kĩanyu nĩgĩkagarũrũka gĩkeno. 21Mũndũ mũka akĩrũmwo nĩaiguaga kĩeha, nĩ ũndũ hingo yake nĩ nginyu; no rĩrĩ, aarĩkia gũciara kaana, ndacokaga kũririkana ruo nĩ ũrĩa egũkena nĩ ũndũ kũrĩ mũndũ waciarũo gũkũ thĩ. 22O na inyuĩ nĩ kĩeha mũkĩrĩ nakĩo rĩu; no nĩngamuona rĩngĩ, ngoro cianyu ikene, na gĩkeno kĩu mũkagĩa nakĩo gũtirĩ mũndũ ũkamũtunya. 23Na mũthenya ũcio wakinya mũtirĩ ũndũ mũkanjũria. Ndamwĩra atĩrĩ, o ma, ma, Mwahoya Ithe witũ ũndũ o na ũrĩkũ, nĩakamũhe na rĩĩtwa rĩakwa. 24Mbere ĩno mũtirĩ mwahoya ũndũ na rĩĩtwa rĩakwa; hoyagai, na nĩmũrĩheagwo, nĩ getha gĩkeno kĩanyu gĩkinyanĩre.

25Mohoro macio ndĩmũheete na thimo; na kwĩ hingo ĩgũũka itagacoka kũmũhe ũhoro na thimo, no ndĩmuumĩrĩrie ũhoro wa Ithe witũ o wega. 26Mũthenya ũcio mũkahoyaga na rĩĩtwa rĩakwa; na ndikũmwĩra atĩ nĩ niĩ ngahoyaga Ithe witũ nĩ ũndũ wanyu; 27amu Ithe witũ we mwene nĩamwenda, nĩ ũndũ inyuĩ nĩmũnyendete niĩ, na mũgetĩkia atĩ ndoimire na kũrĩ Ithe witũ. 28Kuuma nĩndoimanire na kũrĩ Ithe witũ, na nĩ gũũka njũkĩte gũkũ thĩ; rĩu ningĩ nĩ kuuma nguuma gũkũ thĩ, thiĩ gwĩ Ithe witũ.

29Arutwo ake makiuga, One, rĩu ũratũhe ũhoro wega, na ndũkwaria thimo. 30Rĩu tũkũmenya atĩ wee nĩũũĩ maũndũ mothe, na ndũrĩ na bata ũũrio ũhoro nĩ mũndũ; tondũ wa ũhoro ũcio-rĩ, nĩtwetĩkia atĩ nĩwoimire na kũrĩ Ngai. 31Nake Jesu akĩmacokeria atĩrĩ, Rĩu githĩ mũgwĩtĩkia? 32Atĩrĩrĩi, hingo nĩĩgũũka, o na rĩu no nginyu, mũkũnyagana, mũinũke, mũndũ gwake, mũndũ gwake, mũndige o nyiki; no ningĩ ndirĩ nyiki, nĩ gũkorũo twĩ na Ithe witũ. 33Ndamwĩra maũndũ macio nĩ getha thĩinĩ wakwa mũgĩe na thayũ. Gũkũ thĩ mũrĩonaga thĩna; na no kĩũmĩrĩriei, niĩ nĩndoretie maũndũ ma gũkũ thĩ.

Currently Selected:

JOHANA 16: OGKBIBLE

Highlight

Copy