ATŨMWO 6

1NA rĩrĩ, matukũ-inĩ macio, rĩrĩa thiritũ ya arutwo yongererekaga mũno, Ayahudi arĩa maaciarĩirũo kwa Ayunani magĩitĩka kũng’ong’orera arĩa Ahibirania tondũ atumia ao a ndigwa matiagayagĩrũo wega ũteithio ũrĩa waheanagwo mũthenya o mũthenya. 2Nao arĩa ikũmi na erĩ magĩĩta arutwo othe mongane harĩ o, makĩmera atĩrĩ, Gũtiagĩrĩire atĩ ithuĩ tũtige kũheana Ũhoro wa Ngai nĩguo tũtuĩke ndungata cia wĩra wa metha-inĩ. 3Nĩ ũndũ ũcio, ariũ a Ithe witũ, thurai andũ mũgwanja thĩinĩ wanyu arĩa me na ngumo njega, na maiyũrĩtwo nĩ Roho o na ũũgĩ, o arĩa tũngĩhota gũtua a kũramataga wĩra ũcio. 4No ithuĩ-rĩ, tũrĩrũmanagĩria kũhoya na kĩyo, o na kũheana ũhoro. 5Naguo ũguo moigire ũgĩkenia andũ acio othe monganĩte: magĩgĩthura Stefano, mũndũ waiyũrĩtwo nĩ wĩtĩkio o na Roho Mũtheru; na Filipu, na Porokoro, na Nikanora, na Timoni, na Paramena, na Nikola mũndũ wa Antiokia ũrĩa wegarũrĩte agatuĩka Mũyahudi. 6Na makĩrũgamia andũ acio mbere ya atũmwo; nao atũmwo maarĩkia kũhoya makĩmaigĩrĩra moko.

7Naguo Ũhoro wa Ngai ũgĩikara o ũkĩingĩhaga; nayo thiritũ ya arutwo ĩkĩongerereka mũno makĩria kũu Jerusalemu; nao athĩnjĩri-Ngai, gĩkundi kĩnene, magĩĩtĩkia Ũhoro ũcio maathĩkage nĩguo.

8Nake Stefano-rĩ, aiyũrĩtwo nĩ Wega wa Ngai o na hinya, nĩekire morirũ manene akĩringa ciama nene kũrĩ andũ. 9No rĩrĩ, hagĩũkĩra andũ amwe a thunagogi ĩrĩa yetagwo thunagogi ya andũ Aliberitino,#6.9 Aliberitino: nĩo ngombo iria ciohoretwo ũkombo-inĩ. na andũ Akurene na Aisikanderia, gwata andũ amwe moimĩte Kilikia na Asia, magĩkararania na Stefano. 10Na makĩremwo nĩ gwĩtiiria ũũgĩ ũrĩa aarĩ naguo akĩaria, o na Roho. 11Hĩndĩ ĩo makĩgucĩrĩria andũ na hitho makoige atĩrĩ, Nĩtũmũiguĩte akĩaria ciugo cia kũruma Musa o na Ngai. 12Na magĩũkĩria kĩrĩndĩ na athuri na aandĩki-marũa, magĩthiĩ kũrĩ we, makĩmũnyita, makĩmũrehe harĩ kĩama, 13magĩcoka makĩrũgamia aira a maheni arĩa moigire ũũ, Mũndũ ũyũ ndarĩ hingo atigaga kũruma handũ haha hatheru, o na watho, akĩaria; 14tondũ nĩtũmũiguĩte akiuga atĩrĩ, atĩ Jesu ũrĩa wa Nazarethi nĩagatharithia handũ haha, na agarũre mĩtugo ĩrĩa Musa aatũtigĩire. 15Na andũ othe arĩa maarĩ kĩama-inĩ, makĩmũkũũrĩra maitho, makĩona ũthiũ wake ũtariĩ ta ũthiũ wa mũraika.

Currently Selected:

ATŨMWO 6: OGKBIBLE

Highlight

Copy