Ruka 20

Sanahe tipa ga Yesu tandu

(Mt. 21:23-27; Mk. 11:27-33)

1Si ki ta du wa gere, ni gu rago re, wa Yesu ayugo pai fu aboro yekaru yo, ki nitungusi wene pangbanga, abairamotumo agbia ko na abakeapai na ga aYudo abaakumba; 2i ki gumba pai fu ko ki ya, “Mo pé he fu rani ke, gini tandu mo amanga agi apai na ni re? na da asia pa manga agi apai re foro?” 3Ko ki karaga ha ki ya fu yo, “Mi nikasana roni ti pai a; oni pé pa ha fere ke, 4Gu bapatiza nga ga Yoane, watadu si aye ngbangbaturũ yo na be aboro?” 5I ki saki he dagba yo, niya, “Ka ani ya ‘Si aye ngbangbaturũ yo,’ ko aya, ‘Tipagine oni aida nga pa ko ti ni ya?’ 6Ono ka ani ya, ‘Si aye be aboro,’ aboro dunduko azúmuda rani: bambiko i naberã ha tigayo ya Yoane nangia nebi.” 7I ki karaga ha ya i aina nga ho si aye ni te. 8Yesu ki ya fu yo, “Mi agúmba nga pa gu tandu fu roni mi amanga agi apai na ni te re.”

Sanza: ati bakakue na ababanda ha

(Mt. 21:33-46; Mk. 12:1-12)

9Ko ki tona gumba gi sanza re fu aboro: “Boro nirũku bakakue ati yo, ki he he fu aboro i banda ha, ni ki ndu ku rogo kura ringara ki raki koyo gbe. 10Ho regbo zuzuhe ada ni ni ki kedi moyambu koyo du agu aboro ni nabanda ha, ya i fu zuzu ati bakakue fu ni. Ono agu aboro nabanda ha i ata ni ata, ki do ni ni ku be ni. 11Ni ki kedi kura moyambu. I ki ta ni ata a, ki mangi ni amanga gbegberẽ gbe, ki do ni ni ku be ni. 12Ni ki kedi gu biata ni. I ki hogi ni ahoga, ki niba ni aba ku sa yo. 13Ya iraati bakakue, ‘Mi amánga wãi? Mi akẽda wire du nyemuko ti re gbe; si ngia i aírisa ko.’ 14Ono ho agu aboro nabanda ati abi ko ni, i ki saki he dagba yo, niya, ‘Dikumbo du re; ani ími ko, ũkumbo du ni gaani.’ 15I ki ba ko aba ku sa yo ati bakakue yo, ki imi ko. Iraati bakakue amánga yo wãi? 16Ko ayé ka gbarasa agi ababanda ati re, ki fu ati bakakue fu agu yo.” Ho i agi he ni, i ki ya, “Ako Mbori wo te.” 17Ko ki ngere koyo du yo ni, ki ya, “Gine tie nga gi i ake he re:

‘Gu mbia aduabambu agindiga ha,

si i asa ha ni gu nidu ti tukpuhe ri he?’

18Gu ni ka ti kuti gu mbia re, ni adú ni kuadikuadi ni dunduko; ono gu ni si ka ti ku ri ni si agbátaka ni agbataka wa nvutu.”

19Abakeapai ki asadi ka zia ko ni kina gu rago re na abairamotumo; i ki gunde agunde be aboro: bambiko i aini he ya ko agumba gi sanza kuti yo re.

Rũ he fu Kaisara

(Mt. 22:15-22; Mk. 12:13-17)

20I ki pidi Yesu, ki nikedi aboro ni abamoi, i ki sawia ya ruru aboro nangia yo ya i zi ko ti fugoko, si ki du wa ka i fu ko ku be gu tandu na gu nyaka nga ga bazogo. 21I ki sana ko, ki ya, “Bayugupai, ani ini ya mo nagumba pai ki yugu he wenengãi, mo angba nga na aboro kuti pa kindiga yo te, ono mo nayugo ga Mbori gene ni rengo. 22Ngba rũ he angba fu Kaisara?” 23Ono ko aini gayo biriki aina, ki niya fu yo, 24“Oni sa nga rukutu marã feda fere. Kpia da du ti ni?” I ki ya, “Ga Kaisara du.” 25Ko ki ya fu yo, “Agu ahe nga ga Kaisara oni fú kina ha fu Kaisara, agu ahe nga ga Mbori oni fú kina ha fu Mbori.” 26Ka si adu nga wa ka i zi ko na gi pai re barangba aboro ya; gako karagapai ki niiriwo airiwo ti yo, i ki ongo aonga.

Sanahe tipa zingabekpio

(Mt. 22:23-33; Mk. 12:18-27)

27ASadoke ki ye koyo du ko ni, nga agu yo naya zingabekpio ho te; i ki sana ko, ki ya, 28“Bayugupai, Mose ake gu pai fu rani nga ka wirina boro kpi, de nidu be ni, ka wirini adu nga ho ya, wirinani ka di diani ka vunga ku ba ni. 29Awirina adu saba; bambata ni ki di de, ki nikpi ka ni avunga nga ya. 30Gu ue ni ki di ri; 31biata ni ki di ri. I ki mangi kina wo dunduko wa du yo saba, i ki nikpi, ka wiriyo adu nga ho wa sa ya. 32Fuo gere de ki kpi ni yangara yo. 33Rago zingabekpio gini ni nikadia ri? bambiko i amongo rogo ri wa i adu saba.”

34Yesu ki ya fu yo, “Awiri zegino naroga ade, i ki fuku yo i nidu ni dereakumba. 35Ono agu yo i ka ya ti yo i rengbe na da ti gu ngbi re, na ti zingabekpio, i aroga nga ade te, i afu nga ade ni dereakumba a te; 36bambiko ka i kpi nga berewe te. Bambiko i rengbe na amaraika; ki du ni awiri Mbori, wa du yo ni awiri zingabekpio. 37Ono gu nga i azingisa aboro be kpio kina Mose ayugu he, rogo gu pai nga ga zigidiri ngua, ho ko aya ni ti Gbia ko nga ga Abarayama Mbori, nga ga Yisaka Mbori, nga ga Yakoba Mbori. 38Were ga kangba aboro Mbori nga ko te, ga unga aboro Mbori nga ko; bambiko bangiriko aboro dunduko du ni ungayo.” 39Agu abakeapai ki ta karaga ha niya, “Bayugupai, mo nagumba ha wenengãi.” 40Bambiko i angarã nga ka sana ko ti pai berewe te.

Sanahe tipa pa wiri Dawidi

(Mt. 22:41-46; Mk. 12:35-37)

41Ono Yesu ki ya fu yo, “Wiri yo pa ya wãi wiri Dawidi nga Kristo? 42Bambiko Dawidi aya tigako kitabu Tambuahe yo,

‘Gbia aya fu gi Gbia,

Mo súngu ku kumbabero,

43daho mi ka maa avuraro ni tii nduro yo wa gbada.’

44Were Dawidi tigako aya ti ko Gbia, wiri ko pa du wãi ni wiriko?”

Sino abakeapai

(Mt. 23:1-36; Mk. 12:38-40; Rk. 11:37-54)

45Ko ki ya fu gako abawiriki ku tu aboro yo dunduko, 46“Oni bánda tironi be abakeapai, nga agu yo nakpi nyemu ka ata na gbanga remu, ki nikpi nyemu aboro poi kuti yo bangbeahe yo, ki nikpi nyemu ambata irisa rogo abambutiria yo, na bairisa kporo pumbo yo; 47nga agu yo nata rita ga adekurugbo ahe, nikpari akpara kindi ni biriki. I ambusa yo ambusa bakere.”

Currently Selected:

Ruka 20: ZB1978

Highlight

Copy