Ruka 19

Yesu na Zakayo

1Yesu ki rimi ku Yereo yo ki nisusi. 2Oni ngére, kumba ki du yo rimoko nangia Zakayo; nangia gbia abarogo marã ngbeti, boro kumuko nangia ko. 3Ko ki asadi ka bi Yesu ya da du? ka ko arengba nga na ni ya mbiko rimbasa, bambiko guru boro nangia ko. 4Ko ki oro ku mbata yo, ki dakpa vurumo ka bi ko; bambiko Yesu nikasusa pati he. 5Ho Yesu aye ni koyo, ko ki ngere ku ari, ki ya fu ko, “Zakayo, mo mó ka zorã; bambiko mi ka sunga kpuro yo areme.” 6Ko ki mo, ki nizorõ, ki di ko ku gume ni ngbarago. 7Ho rimbasa abi he ni, i ki gumba rimoko dunduko, niya, “Ko andu ka sunga koyo du boro ingapai ni.” 8Zakayo ki ru, ki ya fu Gbia, “Gbia, mo ngére, mi nagama bebere gi ũkumuko fu rungorungo aboro; ka mi adĩ he be boro wa aru nga ha ya, mi agása ha fu ni ki nimoi kura ha ti ri he bara biama ti gu nadu mbata.” 9Yesu ki ya fu ko, “Bata ye kuti gi bambu re areme, bambiko wiri Abarayama nga ko a. 10Bambiko Wiri boro aye ka gbata ngbuongbuo aboro ka batasa yo.”

Sanza: marã bawe

(Mt. 25:14-30)

11Wa i agia agi apai re, Yesu agumba kura pai ku ri he ni sanza fu yo a, bambiko ko ambedi ku Yerusarema yo, bambiko i aberẽ he ya ga Mbori ngbi nikada ni ba sa. 12Si du ko aya fu yo ti ni, “Gu gbia andu ku rogo ringara yo tuturũ, ka dia ngbi ni gako ki yega. 13Ko ki yambu gako amoyambu bawe, ki nifu marã fu yo bawe, ki niya fu yo, ‘Oni bábagi he da kina ho mi ka yega ni.’ 14Ono avuruko asogo ko asoga, i ki kedi sunge fuo ko, niya, ‘Ani aida nga ha fu gi kumba re ko zogo rani te.’ 15Si ki ta du wa gere, ho ko ayega ni, fuo dia ko ngbi, ko ki ya i yambu gu gako amoyambu, ko afu marã fu yo re, i ye koyo du ko ni, ya ko ini pa gu mokiisa i akiisi he na ni wa i ababagi he. 16Bambata ni ki ta ye koyo du ko ni, niya, ‘Gbia, ga marã si kii wa marã bawe ku ri gu nadu.’ 17Ko ki ya fu ni, ‘Wene moyambu nga mo! Mo amangi he wenengãi. Bambiko i abi ro ni kangara ro wa si adu be ro toni, mi aásia pa akporo bawe foro.’ 18Ue ni ki ye, ki niya, ‘Gbia, ga marã si kii wa marã bisue.’ 19Ko ki ya fu ni a, ‘Mi aásia pa akporo bisue foro a.’ 20Kura ni ki ta ye, niya, ‘Gbia, mo ngére, ga marã du re, mi aigi he ku rogo wiri roko; 21bambiko mi agunde be ro, bambiko wa du mo ni nyanyaki boro; mo nadia gu mo afu nga ha ya, mo nake gu mo arũ nga ha a ya.’ 22Ko ki ya fu ni, ‘Mi asápa ngbanga ro ti kina gu pai nakuru ngbaro yo, gbigbita moyambu nga mo! Mo aini he ya mi nga nyanyaki boro, mi nadia gu mi afu nga ha ya, ki nike gu mi arũ nga ha ya; 23tipagine tie mo aiga nga gi marã ti ni ku rogo bambumarã yo ya, ya ho mi ka yega ni mi bi he na kura ha ti ri he?’ 24Ko ki ya fu agu aboro naru ho, ‘Oni dí gu marã be ko re, ki fu he fu gu ko du na marã be ko bawe’ 25I ki ya fu ko, ‘Gbia, si du be ko bawe!’ 26‘Ya mi fu roni, gu ni du na he be ni i afú he fu ni; ono gu ni adu nga he be ni ya, gu toni he ka du be ni i adía ha be ni. 27Ono agi avurare re naida nga mi zogo yo te, oni yé na yo kono, ki imi yo barangba re.’ ”

Yesu arimi na irisa ku Yerusarema yo

(Mt. 21:1-11; Mk. 11:1-11; Yo. 12:12-19)

28Ho Yesu agumba ha ni were, ko ki mere mbata yo nindu ku Yerusarema yo. 29Si ki ta du wa gere, ho ko ambedi ni ku Betefage yo na Betania yo, ku pati bagangara Aeraya, ko ki kedi abawiriki ue, 30niya, “Oni ndú ku rogo gu kporo du pati roni. Wa oni ka da yo oni abi paranga dongi vo yo ru; i ata sunga nga auru ru mbata te. Oni ki zaki ru, ki ye na u. 31Ka boro sana roni ya, ‘Oni nazaka ru tipagine?’ oni ki ya fu ni wẽ, ‘Gbia nakpi nyemu ru.’ ” 32Agu yo i akedi yo i ki guari, ki bi he kina wa ko agumba ha fu yo. 33Wa i azaka paranga dongi, airaru ki ya fu yo, “Tipagine oni nazaka paranga dongi ti ni?” 34I ki ya, “Gbia nakpi nyemu ru.” 35I ki ye na u koyo du Yesu ni; i ki ba gayo aremu auru paranga dongi, ki nitumba Yesu ku auru ru. 36Wa ko andu, i ki gbaragi gayo aremu gene. 37Ho ko ambedi ni ku Yerusarema yo, ti ngbadu bagangara Aeraya, rimbasa abawiriki dunduko ki tona ka ngi angi ki niirisi Mbori nipoi ku ari tipa agu apai du na tandu i abi; 38niya, “Mbori fu maku fu gu bakindo naye ni rimo Gbia! Zereda du ngbangbaturũ yo, na taarimo ri arago du!” 39Agu aFarusi nadu dagba rimbasa yo ki ya fu ko, “Bayugupai, mo zá gamo abawiriki.” 40Yesu ki karaga ha ki ya, “Mi nagumba ha fu roni ya, ka agi aboro ongo aonga re, ambia apáa ku ari.”

41Ho Yesu ambedi ni, ko ki bi bakporo, ki ta kpara mbiko ho, 42niya, “Ako! ka oni aini agu apai nga ga zereda, ni gi rago re tigaoni! Ono awere si ni okooko ho ti bangironi. 43Bambiko rago nikaye ku ri roni, ho avuraroni ka ba nduka ni kirikiri pati roni, ki ke pati roni, ki kisi rago pati roni dunduko, 44ki merẽ roni ku sande, na awironi a. I ahe nga gu mbia auru kura ha rogo bakporo wa sa te; bambiko oni aina nga gu rago ye Mbori ka manga pa roni te.”

Yesu agirisi yekaru

(Mt. 21:12-17; Mk. 11:15-19; Yo. 2:13-22)

45Ko Ki rimi ku yekaru yo, ki tona danda agu yo ku zegi yo nanababaga ahe, 46niya fu yo, “Si ni keke he, ‘I aya ti gi bamou bambu kparakpe,’ ono oni asa ha ni yaro abatuka.”

47Ko ki yugu pai na uru yekaru yo. Ono abairamotumo na abakeapai na abanyaki i aasadi ka imo ko: 48ka i aina nga gu i ka manga ya; bambiko aboro adege tuyo dunduko ka gia gako pai.

Currently Selected:

Ruka 19: ZB1978

Highlight

Copy